LAKAPI
Ili mai le faili o le laufali
Taufetuli atu i totonu au lakapi
au a Samoa ma le au a Am. Samoa e
fetaui i le falelaumei po o le maota o Lee.
Kapeteni mai le Palemia i lana au malaga
Ae kapeteni atu ia tatou le kovana.
A’a atu loa le polo e le motu o fiafiaga
Faaoga mai e le laina i luma a Samoa fai mai o ofisa a faigamalaga.
Lusi mai le polo maua atu e le tatou uigi
Oso atu i luma ae pu’e afiai mai e Samoa e le latou loia sili
Oso mai le laufali ili lana faili
Yellow Card outou Am Samoa e leaga le tou fesili.
Finau atu le tatou numera fa.
Aisea ua yellow card ai matou o le polo na lusi mai ia outou lea sa matou faaaoga
Eu faatopetope loa e Samoa le polo, sau le latou osofaiga i luma
E pu’e atu e le tatou hooker ae fai mai e mananao i se laueleele i Tafuna.
Faasala e le laufali Samoa o le pu’e ua fai si maualuga
Fai mai e maua foi le tatou fanua ae masalo o luga o se mauga.
O lona uiga e tu i le vaalele oso latou i Tafuna i le latou fanua
Ae taunuu tatou i o pu’e le pasi uma le kesi ae oso i le solofanua.
Vaaia le tau fai malolosi uma o au toe lelei
Ae sikoa loa ma tatou i le au amiovalea ae ova aso iinei
Aa atu le polo mo se ai faaopoopo mo le motu o fiafiaga
E tatau ona avatu e loka i Tafaigata.
Ae oso mai le loia sili fai mai o le atunuu sa tuu ai le amioleaga
O iina foi e tuli ai lona faasalaga.
E le faapea e lusi le polo i le taaloga o lo o fai i Ausetalia
Ae aumai le sikalamu fai i Apia
Maimau le tatou sikoa le aa atu i le pou ae le manuia
Ae soisoi le susuga i le loia.
Ili le faili ua maea le taimi o le taaloga
O tatou e tasi le sikoa ma le aa e le ova
Ae foi foi Samoa ia ma le usoga
E tasi foi le sikoa ma manava o le a papa i le maoona