O le aofaiga o tagatanu’u o lea malo e 23miliona ona tagata. O le tasi le miliona o i latou nei, ua avea ma sui o le latou Vaega Au lea e matua fa’atusalia i le vaega au a Siamani i vaitaimi o Hitler le latou fa’atulagaga.

O le soifuaga uma o tagata e ao ina fa’alogo i le faigamalo ma ona ta’ita’i i le fa’atautaiga o latou soifuaga i aso uma. O latou oloa gaosi ma fa’atau atu, e fa’atautaia uma e le malo, ma ua iloga ona fa’afitauli fa’alotoifale e matua faigata lava o le tau le lava o mea taumafa mo tagata uma, le o’o le eletise i le tele o nofoaga, ma e le o fa’atulagaina lelei le lotoifale o lea malo i nofoaga mo fale nofo, pisinisi ma malae taalo.

Ua fa’ailoa mai, o le taimi ua maliu ai nei le ali’i peresetene o Korea i Matu, sa ia amata ona fuafua le soloa’i mai o Kim Jong-un e avea ma peresetene. O ia lava lea ua fa’ailoa mai e lea malo, o le a ta’ita’ia i latou i le aimi nei, ma ua fa’ailoa mai fo’i ua feiloa’i o ia ma le faletua o le ali’i peresetene fa’ato’a maliu atu.

E ui ina e le’i aloaia ona fa’atula’ia lea sui i le tofi peresetene, ae ua fa’atautaia lava ia ona tiute e afua mai i le taimi ua maliu ai Kim Jong-il, le uso o lona tama. O le malo o Korea i Matu, ua fa’ailoa mai o lo’o gaosia lava e i latou a latou meatau fa’aniukilia ma o se afuaga lea o le fa’ale-lelei o lo latou va ma le malo o Amerika. Lona lua, o i latou o se faigamalo fa’a-Komenisi.

O le tala mai, o se popolega sili o i ai i le faigamalo, ona o Kim Jong -un o se talavou e le’i atoa le 30 tausaga, ma e le’i iloga fo’i sona tomai i mataupu fa’avaomalo e le pei o le peresetene fa’ato’a tu’ua nei le nofoa. O le faigata, ina nei so’ona faia e le Kim Jong-un lona malosi’aga fa’alemalo ma fete’ena’i ai ma nisi ua loa le latou tautua i totonu o le faigamalo a Korea i Matu.

Ua fa’ailoa mai e le tama’ita’i Failautusi o le Setete a Amerika, Mrs Hillary Clinton, “O lo ua nofo sauni Amerika e fa’ao’o atu ia Korea i Matu se fesoasoani e mana’omia pe afai o le a i ai se fa’aletonu e alia’i mai e ono lamatia ai lo latou saogalemu fa’atasi ai ma ona lau’ele’ele tausi.”

Ua leva ona faia ni feutaga’iga i nisi o malo tuaoi ma malo sa masani fo’i ona i ai a latou so’otaga ma le malo o Korea i Matu, ina ne’i afaina latou fefa’ataua’iga ona o le tu’ua o le malo e le ali’i peresetene ua masoe nei.

O le malo fo’i o Korea i Saute ua mae’a fa’ao’o le latou fa’amaisega i le faigamalo a Korea i Matu ina ua maliu Kom Jong-il, ae o le tala mai, o le afuaga lea o le fe’eseesea’iga i le va o Korea i Saute ma matu, ina ua le amana’ia e Korea i Saute le maliu o le ta’ita’i muamua atu o Kim ll-sung i le tausaga e 1994. 

I le feiloa’iga lea i le va o le faletua o le Peresetene ua maliu ma le sui filifilia e avea ma peresetene fou o Korea i Matu, ua fa’ailoa mai ai, o le fa’ato’a fetaui lava lea o i la’ua. Ua fa’ailoa mai e lua aso o le a faia ai le falelauasiga o lea ta’ita’i, ma e tanumia o ia i le aso Faraile nei.

Aso Lulu o le a tu’uina lea asia ai lona tino maliu e tagata uma lava ae o tina ma tama’ita’i uma o le atunu’u o le a lae’ia le uliuli i so’o se vaipanoa o lea atunu’u.

Na fa’ailoa mai, e le’i auai Kim Jong-il i le solo a ta’avale mo le maliu o lona tama, ae o le a mata’i fo’i e le atunu’u, pe o le a se faiga o le a faia ai e Kim Jon -un le maliu o lona tama. O ia o le atali’i lona tolu o le peresetene ua maliu nei. O le isi mea mautinoa lava, e matua leai lava ni malo fa’aaloalogia mai isi malo i fafo atu o Korea i Matu o le a vala’aulia, ae o lea maliu ua fuafua lava na’o tagatanu’u lava o Korea i Matu e auai.

E afua mai lava ia Tesema 18, 2011 lea na maliu ai Kim Jong-il e o’o mai i le aso Lulu nei, sa taoto mai ai lava le ali’i peresetene mo le maimoaga a lona malo. Ua matauina ma fa’aalia mai ata tapu’e i video a televise le matua fetagisi o tagata uma e asia o ia, ma ua fa’aalia ai lo latou agaga fa’anoanoa i le amia o le latou ta’ita’i.

O le ulua’i aso o le maliu lea ua fa’atulaga e faia ai le savaliga fa’apitoa ma fa’apapa fana a le militeri mo le 24 itula. O la fa’aaliga a le Militeri e matua  faia lava i lea so atoa, leai se malolo.

Aumai: AP;  saunia: Leua Aiono Frost