Ads by Google Ads by Google

Lagolagoina fuafuaga a le Pulesili o le ASPA

E to’atele ni isi o le atunuu atoa ai ma faipisinisi ua latou lagolagoina se finagalo a le pulesili o le Faalapotopotoga o le Eletise ma le Suavai (ASPA), ina ia le toe sapalai e le ASPA le suauu i le teritori, ona e fete’ena’i ai ma ona tiute tauave e pei ona faatula’i ai lana tautua e le tulafono.

 

Na taua e Filiga Amituana’i, o se tasi o alii faipisinisi i Tafuna e faapea,  e le gata ua tele ai le tupe e manaomia e le ASPA mo lea tautua, ae ua atili ona taugata ai ma le eletise.

 

“Afai e taula’i le vaai a le ASPA i lana matafaioi na mafua ai ona faavaeina lana auaunaga i le atunuu, e le gata e manuia lana tautua ae maua ai foi e le atunuu se faamama avega i le tau o le eletise ma le suavai,” o le finagalo o Amituana’i, lea fo’i na lagolagoina Marieta Logotaeao, o se tina ua malolo litaea mai le galuega faa faiaoga mo le silia i le 30 tausaga o lana tautua.

 

“Na faavae le ASPA i lalo o le tulafono na te sapalaia le eletise ma le suavai mo Tutuila, Aunuu ma Manu’a, ae le’i faatula’i na te sapalai maia se suauu i le teritori, o le isi lea auala ua mafua ai ona taugata le eletise, ona ua auai le ASPA i faiga faapisinisi ma kamupani mai fafo, ma o se faiga ou te matua le lagolagoina lava e a’u,” o le finagalo lea o Logotaeao.

 

E to’alua isi tamalii o le atunuu e le’i finagalo e faailoa o laua suafa e uiga i lenei mataupu, ae sa la taua lo la lagolagoina o le finagalo o le afioga i le matua ia Utu.

 

Na taua e le isi o le toalua lea e faapea, o le itu e le o manuia i le gaioiga lea a le ASPA, o lo o penefiti le ASPA i le tupe o lo o maua mai i le sapalai ina mai o le suauu i le teritori, ae le o aumaia e le ASPA lea penefiti e fesoasoani ai i le faaitiitia o le tau o le eletise ma le suavai.

 

“Ou te matua talitonu i ripoti o lo o tuuina atu e le ASPA i luma o le Fono Faitulafono, o lo o penefiti le ASPA i tupe o lo o maua mai i le avea ma sapalai mo le suauu i le teritori,” o le saunoaga lea a se tasi o tamalii o le atunuu e le’i finagalo e faailoa lona suafa, ma e tutusa lelei lana saunaoga ma le finagalo o Utu na faailoa i luma o le Maota o Sui i le vaiaso na te’a nei, ina ua fesiligia e le alii Faipule ia Talia Faafetai Iaulualo e uiga i le mataupu lava lenei.

 

Saunoa Utu e faapea, o lo o taumafai le ASPA e alu ese mai i le avea ma sapalai o le suauu mo le atunuu, e pei ona i ai lana konekarate ma le kamupani o le Exxon Mobil Oil, lea e mae’a i le aso 30 Novema o le tausaga nei.

 

“E tatau lava ona taula’i le vaai a le ASPA i ona tiute tauave e pei o le uila ma le suavai, e tusa ai ma le tulafono na faatula’i ai lana tautua, ma, o lo o faia talanoaga i se auala e alu ese mai ai le ASPA e aunoa ma le faaletonu o nei tautua, ma ua i ai kamupani tua ua faia talanoaga ma le ASPA i le taimi nei mo le tuuina atu i ai o lenei tautua pe a malilie i ai,” o le saunoaga lea a Utu.

 

“E moni lava e tele le tupe e alu ai a le ASPA i le avea ma sapalai o le suauu, ae tele atu foi le polofiti o lo o maua mai ai i lana konekarate lea, ma ana leai le polofiti na maua mai se manu e faaletonu le ASPA i le totogiina ana aitalafu atoa ai ma le okaina o ni isi o parts mo galuega sa mana’omia, o a Utu lea.

 

“Afai e penefiti le ASPA mai le avea ma sapalai o le suau’u, aisea la ua e manatu ai e aveese lea tautua mai le ASPA,?” o le toe fesili atu lea a Talia ia Utu, ae na saunoa Utu e faapea, “E mafua ona ou naunau e aveese ona e le o tusa ai ma tautua na tofia le ASPA na te faatinoina o le atunuu.”

 

O le isi faafitauli o lo o feagai ma le ASPA e pei ona saunoa Utu, ua tele naua le aitalafu a le malo e le o totogia. Fai mai Utu, ana totogi le aitalafu e $10 miliona a le malo i le ASPA, atonu e maua ai ni isi afi fou se lua mo le ASPA, pe mafai foi ona faatau ai ni pamu vai se 50 e fesoasoani ai i le faaleleia atili o lana tautua.

 

“E i ai lo’u talitonuga e tatau lava ona totogi le aitalafu a le tagata, malo poo le pisinisi i le ASPA, ona faigofie ai foi lea i le ASPA ona faatino ana tautua ma manuia ai le atunuu atoa, ae afai e nofo aitalafu se tagata, pisinisi poo le malo i le ASPA, o le a faaletonu foi le tautua a le ASPA,” o le saunoaga faaiu lea a Utu.