Lagolago ta’ita’i malo auala tete’e atu ai fa’ama’i HIV/AIDS

I le avea ai o le aso 1 Tesema, 2013 o le aso e faataua ai le tete’e atu o le lalolagi i le gasegase mata’utia o le HIV/AIDS, na fa’aalia ai e ta’ita’i o le malo, ekalesia faapea ai le atunuu lo latou lagolagoina fo’i o nei taumafaiga uma e tete’e atu ai i lenei fa’ama’i, e ala i lo latou auai lea i se sauniga lotu sa faia i le malumalu o le Ekalesia EFKAS i Iliili i le afiafi o le aso Sa na te’a nei, mo le tatala aloaiaina o lenei fa’amoemoe.

 

Na faamamafa e le ta’ita’i o le sauniga, susuga Rev. Tony Hollister i lana saunoaga e faapea, e leai se isi auala e sili e mafai e tagatanuu o Amerika Samoa ona faia ina ia tete’e atu ai i lenei fa’ama’i, nai lo le ola mama ma aua le fiafia i olaga tu’inanau.

 

Saunoa le alii faifeau e faapea, “afai na faia e le Atua le tagata o le paleali’i o ana galuega i le foafoaga, ma ia faaigoa le tagata o lona malumalu paia, lona uiga fo’i e tatau i le tagata ona ola fiafia, ola mama ma ola e aunoa ma ma’i mata’utia e a’afia ai lona soifuaga atoa.”

 

O le afioga i le Lutena Kovana ia Lemanu Peleti Mauga ma lona faletua, na fai ma sui o le afioga i le Kovana Sili ma lona faletua i lenei sauniga, sa faapea fo’i ona auai nisi o sui o le kapeneta atoa ai sui o le Fono Faitulafono, ma le mamalu o nisi o le atunuu lautele sa mafai ona faatasi atu e molimauina lenei faamoemoe.

 

O le afioga i le alii faipule ia Lemapu Suiaunoa Talo na faitauina le Poloaiga Faalaua’itele a le alii kovana, e faalauiloa ai le avea o le aso 1 Tesema, 2013, o le aso lea e faataua ai e le atunuu puipuiga uma ma auala o lo o faia e lala o le vaega o le Soifua Maloloina i le lalolagi, e tete’e atu ai i le gasegase o le HIV/AIDS.

 

Na taua e Lolo i se vaega o lana poloaiga faalaua’itele e faapea, o le faapitoa ai o le aso 1 Tesema o tausaga taitasi e fai ma aso e faataua ai puipuiga mo lenei faama’i mata’utia, ua faapea fo’i ona auai faatasi atu ai ma le malo ma tagatanuu uma o Amerika Samoa, ina ia lagolagoina polokalame o lo o faia e malo aufaatasi (United Nation Program) e tete’e atu ai i le sosolo fa’a afi o lenei gasegase.

 

“I le o o atu ai i le 34.3 miliona le aofa’i o tagata o le lalolagi ua faamaonia le aafia i le siama o le HIV i le taimi nei, o le tausaga na te’a nei sa faamauina ai le aofa’i e 2.3 miliona o tagata fou ua aafia i le siama o le HIV, ma le to’a 1.6 miliona na maliliu ona o le faama’i o le AIDS,” o se vaega lea o le poloaiga faalaua’itele a le alii kovana.

 

I le saunoaga autu o le sauniga na saunoa i ai le afioga i le Lutena Kovana, sa ia faamamafaina ai le tatau lea ona malamalama ma silafia e tagata uma o le atunuu, tulaga pagatia ma le matuia e o o i ai le tagata, pe afai ae maua i a’uga o lenei gasegase.

 

“Ae mo i tatou uma e le o aafia i le siama o lenei fa’ama’i, o la tatou galuega o le faalauiloa lea o auala e puipuia ai isi o tatou uso a tagata, ina ia faatumauina ai pea lo tatou ola fiafia ma ola mama i totonu o le atunuu ma aiga,” o se vaega lea o le saunoaga a le afioga Lemanu.

 

Na faamamafa e Lemanu le taua o fesoasoani ma togafitiga ua mafai ona ofoina atu e le Vaega o le Soifua Maloloina i le lalolagi ma le atunuu, e fesoasoani ai i tagata faatoa a’afia i le siama o le HIV, ina ia mafai ai ona vave foia le ono tula’i mai o se isi tulaga e sili atu ona matuia.

 

“O le fautuaga mo le atunuu, fai ma siaki o tatou tino i le falema’i manu o lo o maua fesoasoani mo i tatou, e lelei lou ola mautinoa e te le o aafia i se vaega o lenei fa’ama’i,” o le saunoaga lea a Lemanu.

 

O se itu lelei mo Amerika Samoa i le taimi nei, e pei ona saunoa le afioga i le Faatonusili o le Matagaluega o le Soifua Maloloina ia Motusa Tuileama Nua, e foliga mai e le o sosolo lenei fa’ama’i i totonu o le atunuu, pe a fuafua i isi atunuu o le lalolagi ma le Pasefika.

 

“Na pau faamaumauga lea o lo o maua e le matou matagaluega, e na o le toatasi lava le tagata o le tatou atunuu o lo o aafia i siama o le fa’ama’i lenei, ma o lo o i ai nei o ia i atunuu i fafo mo le faatinoina o togafitiga i lona soifua maloloina,” o le saunoaga lea a le alii faatonu.

 

Ae ui i le na o le to’atasi, na taua e Motusa e faapea, e le o se alofaga lea e le tatau ai ona aga’i atu le atunuu e faia ni a latou siaki ina ia mautinoa o lo o soifua maloloina tagata.

 

“E tatau lava ona i ai se taimi e te sau ai e fai sau siaki i le matou ofisa, ina ia saga faamausali pea le talitonuga, o lo o saogalemu pea Amerika Samoa mai aafiaga o lenei gasegase,” o le saunoaga lea a le alii faatonu, ma ia talosagaina ai le atunuu ina ia faafesootai atu le matagaluega i soo se taimi, mo ni fesili e fia malamalama auiliili ai e faatatau i lenei gasegase.

Comment Here