Lagolago sui Litaea i le auai o pisinisi tua I Litaea a le malo

Na taua e ni isi o sui o le Komiti Faafoe fou a le Litaea ua teena e le Fono Faitulafono, lo latou lagolagoina o le fuafuaga i le auai o Kamupani tua i faaputugatupe o le litaea a le malo, ae tatau ona ese mai se vaega tupe latou te totogiina ina ia agavaa ai tagata faigaluega i le litaea a le malo.

 

O le afioga i le ali’i faipule ia Larry Sanitoa na faatulaia le fesili i sui o le komiti fou a le litaea, pe latou te lagolagoina le auai o kamupani tua i le litaea a le malo, ina ia fesoasoani ai i le faatupuina o le teugatupe o le litaea.

 

Na taua e le tofa Nanai Afuola e faapea, talu ai o le tiute o le komiti o le puipui ma saili auala e faatupu ai le teugatupe a le litaea, e talitonu ai lona taofi, o se fuafuaga lelei lea ma talafeagai mo le teugatupe a le litaea.

 

“Ou te lagolagoina le fuafuaga lea o le auai o kamupani tua i totonu o le teugatupe a le malo, aua o se auala lelei lea e faaopoopo ai isi vaega tupe i le teugatupe a le litaea, pau le mea e manaomia, e tatau ona matou toe vaavaai ma iloilo i le tulafono ina ia mautinoa e leai se aafiaga o le teugatupe a le litaea a le malo e tula’i mai ai,” o le saunoaga lea a Nanai i luma o le komiti a le maota o sui.

 

Ae na saunoa le susuga a Avamua Dave Haleck e faapea, talu ai o se mataupu taua lea ua fesiligia e faipule, e tatau i le komiti ona matua vaavaai toto’a i le tulafono ina ia mafai ai ona faamanino lelei le tulaga e faatatau i le auai o pisinisi tua i le teugatupe a le litaea.

 

I le avea ai o le susuga Avamua o se tasi o tagata faipisinisi i le atunuu, na ia taua ai mo se faataitaiga i luma o le komiti le eseesega o ituaiga tagata faigaluega ma le eseesega o latou totogi, e pei o le tagata e $200 lona totogi i le lua vaiaso ma le tagata e $2,000.

 

“I la’u vaai faatagata faipisinisi, e le gata e pito sili atu ona toatele tagata faigaluega latou te maua le $200 i le lua vaiaso, ae toe pito sili atu foi ona taua i latou nai lo le tagata o lo o ia maua le $2,000, aua afai e faaopoopo tupe e maua mai i tagata e maualalo latou totogi ona tele lea o le tupe e maua mai ai,” o le saunoaga lea a le susuga Avamua.

 

Na tutu faatasi le susuga Avamua ma isi sui o le komiti i le talitonuga lenei e tasi, o le latou tiute ina ua tofia i latou e le kovana e fai ma totino o le komiti faafoe o le litaea, o le puipui lea o le teugatupe o le litaea a le malo, ma saili auala e faatupulaia ai le teugatupe.

 

Ina ua fesiligia e le komiti le susuga John Marsh i sona finagalo e uiga i le mataupu lenei, na taua ai e le sa avea muamua ma pulesili o le Faalapotopotoga o le Eletise ma le Suavai lona musu e fai sona manatu, ae tatau ona fai muamua sana sailiiliga ina ne’i maoluma ona manatu ae afaina le mea moni e tatau ona fai.

 

O le finagalo foi lea o le susuga a Su’a Carl Schuster ina ua fesiligia o ia e le komiti si ona finagalo, e tatau ona lava se taimi latou te faamasani ai i le galuega ma le tulafono, ona faatoa mautu lea o se fuafuaga e tatau ona fai.

 

O le mataupu i le auai o pisinisi tua i totonu o le teugatupe a le litaea, o se tasi lenei o mataupu sa masani ona afea i saunoaga ai le afioga i le matua ia Togiola Tulafono a’o avea ma kovana i le tele o tausaga ua mavae atu.

 

Na mafua lea tulaga ina ua maitauina le toatele o tagata o le atunuu e fiafia e saili galuega i le malo ona o le penefiti o le litaea, ae ua amata ai ona faatuatuana’i i pisinisi ma kamupani tua.

 

Saunoa Togiola, afai e mafai ona auai pisinisi i tua i le litaea a le malo, e tatau ona ese atu se vaega tupe latou te totogiina nai lo le tupe o lo o totogi e le malo mo ana tagata faigaluega.

 

Ae na taua e Nanai i le vaiaso na te’a nei e faapea, e ui o se fuafuaga lelei le auai o pisinisi tua i le litaea a le malo, pau lona faaletonu, e mautinoa lava le alu o le tupe a le malo i totonu o le litaea, ae o pisinisi tua e alu alu lava misi.

 

E ui i le taua o finagalo o totino fou o le komiti a le litaea, peitai e leai ma se isi o i latou e to’aono na molimau na pasia e le Senate, se’i vagana ai lava le to’alua na pasia e le maota o sui, o le susuga ia Talalemotu Mauga ma Toafala Iafeta.

Comment Here