Ads by Google Ads by Google

Lagolago Pulu finagalo Togiola palota tofi Senatoa

O le tula’i mai ai pea o faafitauli i ni isi o Itumalo i le filifiliina lea o ni a latou Senatoa i totonu o le Maota Maualuga o le Senate, ua faaalia ai e se tasi o Tamalii o le atunuu sona finaglo na te lagolagoina ai le finagalo o le Kovana Sili, ua oo i le taimi ua tatau ai ona palota le tofi Senatoa.

I se faatalatalanoaga a le Samoa News ma le afioga i le matua ia Pulu Ae Ae Jr e uiga i lenei mataupu, na faaalia ai e Pulu lona faanoanoa tele, ona o tulaga ua maitauina i ni isi o Itumalo, i le le maua lea o so latou fealofani ma le feavata’i i le sailiina o latou tofi Senatoa.

“Ua ese le mea lea ua ou vaavaai atu i ai, ua amata ona le toe maua se fealofaniga i totonu o ni isi o Itumalo ona o le naunau uma o tagata e fia oo i le tofi Senatoa, ae o lea lava ua maea ona taoto faavae o Itumalo ma le atunuu, o le tofi Senatoa e le gata e tofi faaleaganuu, ae o le tofi foi e tuu faasolo i totonu o Itumalo, ae afai o le tulaga lea ua tulai mai i le le maua ai o se fealofaniga o Itumalo, ou te lagolagoina ai le finagalo o le kovana sili, ua tatau ona palota le tofi Senatoa,” o le saunoaga lea a Pulu.

Saunoa Pulu, o le faavae na faataoto mai e Tuaa ua lagomau mai Tia Sa ina ia filifili mai i le aganuu le tofi Senatoa, o se faavae sa mausali ma atamai lona amataina mai, peitai o augatupulaga i ona po nei ia i latou ua avea ma faauluuluga o aiga ma Itumalo lea ua mafua ai ona tulai mai faafitauli i totonu o Itumalo, ina ua naunau i viiga ma le mamalu, ona naunau ai lea e faomalo i le tofi, ae galo ai le mea moni e ao ona fai.

“O le alafua na faataoto mai e tuaa i aso ua mavae, o se tulaga sa manaia ma mamalu, ae ina ua oo mai i tupulaga i aso nei, ua avea lo latou naunau i le tofi ma le naunau e saili ai mea a le tagata lava ia ma itu ua tulai mai ai fevaevaeaiga i le va o aiga, nuu ma Itumalo ma ua le maua ai se fealofaniga o tagata,” o le saunoaga lea a Pulu.

Sa ia taua foi e faapea, “Sa lelei lava foi le faataotoina mai e Tama ua mavae atu o le faamoemoe lenei, ae o Tama o le atunuu lea ua i ai i aso nei, ua naunau e saili lo latou mamalu ma le fia iloa e ala i tofi o le Itumalo e ui o lo o latou iloaina lelei lava e le o sa’o le mea o lo o latou faia,” o le isi lea saunoaga a Pulu.

E talitonu Pulu, afai ua i ai ni Itumalo ua le mafai ona maua se tasi i le filifiliina o latou tofi Senatoa i ala faaleaganuu, o le pine faamau lena o lona talitonuga, ua tatau ona palota le tofi Senatoa, ona le toe tulai mai ai lea o ni vevesi poo ni fevaevaeaiga, ae o le a maua e tagata uma le nonofo fealofani.

Sa ia teena foi le tuuina atu o mataupu faapenei e iloilo ma fai mai i ai se faaiuga a le Faamasinoga, aua o ituaiga mataupu nei e le tatau ona oo atu i le faamasinoga.

“I lo’u lava talitonuga e le tatau ona oo atu mataupu nei i luma o le faamasinoga, ae tatau lava ona soalaupule i totonu o Itumalo, o le mafuaaga lena na ala ai ona tofia Faasuaga ma Faauluuluga o Itumalo, ina ia fai ma le alofa faaiuga fai ma ia fai ma le amiotonu, ae o le mea lea ua ou vaai atu i ai, ua leai se alofa ae ua saili ai le tamaoaiga o isi tagata,” o le isi lea saunoaga a Pulu.

O le mataupu e faatatau i le palotaina lea o le tofi Senatoa, na faatulai e le afioga i le alii Kovana Sili ia Togiola T.A Tulafono i le masina o Setema na te’a nei, ina ua pasia e le Senate le tuuina atu o se fesili i le au palota, pe tatau ona tuuina atu le malosi i le Fono latou te suia ai le malosi o le kovana na te teena ai se tulafono poo se pili na pasia a le Fono.

Ina ua alia’e lea mataupu, na saunoa ai loa le alii kovana e faapea, afai o le finagalo lea o le Senate e tuu atu le malosi i le Fono latou te suia ai se faaiuga e faia e le kovana, o lona uiga foi ua tatau ona palota le tofi Senatoa ina ia mautinoa ai, o i latou o le a filifilia e le atunuu e fai ma Senatoa, o i latou ia ua na filifilia mai e ala i le palota a le atunuu.

Na saunoa faalauaitele kovana Togiola e uiga i lenei mataupu, ma ia taua ai loa lona sauni e faaulu se pili i le Fono Faitulafono mo le palotaina o Senatoa, peitai o lea mataupu na lagalaga ai finagalo o Senatoa ma o latou taua ai e faapea, ua taumafai le alii kovana e talepe le aganuu ma faavae na faataoto mai e tuaa ua mavae.

E toatele Senatoa na faaalia o latou finagalo le fiafia ma le tete’e i saunoaga a kovana Togiola e faatatau i lenei mataupu, ma o latou taua ai le le manatu mamafa o le kovana i le puipuiina lea o le aganuu ma measina a Samoa.

Ae na toe saunoa Togiola e faapea, o ia sa tu malosi e lagolago le manatu ia tumau pea le filifilia o Senatoa i tu ma aganuu faa Samoa, ae talu ai ua manatu le Senate e avatu le malosi latou te suia ai faaiuga ua faia e le kovana na filifilia e le atunuu, o lona uiga foi la ua tatau ona palota le tofi kovana, ma o lea manatu ua matuå lagolagoina e le afioga a Pulu.

Na taua e se tasi o Fitafita Tuai e lei finagalo e faalauiloa lona suafa e faapea, e mafua ona tulai mai feeseeseaiga i le sailiina o tofi Senatoa, pe afai ua manatu faapito le tagata ma ua leai se alofa.

“E afua loa ona leai se alofa ma ua manatu faapito le matai Samoa, ua lava ia ma lona aiga e umia le tofi, ona afua mai ai loa lea iina le leai o se nonofo fealofani ma se fegalegalea’i,” o le saunoaga lea a lea Fitafita Tuai i le Samoa News.

O Itumalo e lua lea o lo o tulai mai ai le le mautonu i lana tofi Senatoa, o le Itumalo o Manu’a #2 ma le Itumalo o Alataua, ma e foliga mai i le faalogologo atu i ai, e ono tofu atu i luma o le Faamasinoga mataupu a Itumalo ia e lua.