Na vaaia le tutu faatasi o ta’ita’i o le atunuu mai le tafatolu o le faigamalo i le lagolagoina o le Polokalame o Pesepesega o le Kerismasi mo lenei tausaga, e pei ona tatalaina ai i le afiafi ananafi i se sauniga lotu sa faia i le Malaeoletalu i Fagatogo.

O le susuga i le alii faifeau ia Rev. Iasepi Ulu na tatalaina le polokalame i le tatalo, sosoo ai loa ma le saunoaga autu o le afiafi na saunoa i ai le afioga i le alii kovana ia Lolo Moliga.

O isi saunoaga faapitoa e tolu na sosoo ane ai na saunoa i ai le Peresetene o le Senate, le afioga i le Tamaitai o le Ao ia Gaoteote Palaie Tofau; le Fofoga Fetalai o le Maota o Sui ia Savali Talavou Ale, ae faai’u i le saunoaga mai le afioga i le Faamasino sili ia Lealailoa M. Kruse.

(O se vaega o saunoaga a ta’ita’i o le atunuu o le a mafai ona lomia i le Lali i le aso Lua, 17 Tesema 2013.)

E 23 au faafiafia ua lautogia e faafiafia i le faamanatuina o le polokalame lona 36 a le ‘American Samoa Council on Arts, Culture & Humanities’, lea e pei ona la vaavaalua ai ma le Matagaluega o Tupulaga Talavou, Tina ma Tama’ita’i mo le faatautaiga o le polokalame mo lenei tausaga.

E lata i le 50 le aofa’i o au faafiafia e aofia ai aoga, autalavou, aufaipese a ekalesia faapea ai faalapotopotoga taumaoti na tusi talosaga mo se avanoa e faafiafia ae na o le 23 o latou na filifilia.

Na taua e se sui o le Ofisa a le Arts Council o lo o galulue i le tuu faatasia o lenei faamoemoe e faapea, e le’i faigofie le filiina mai o au faafiafia e pei ona lautogia i le poloakalame o lenei vaiaso, ona o le tele o au faafiafia sa talosaga sa matua manaia ma lelei a latou tapenaga, ae i le faaiuga e na o au faafiafia lava e sili atu ona lelei ma matagofie a latou tapenaga ua tuu atu i ai le avanoa e faafiafia i lenei tausaga.

E 5 au faafiafia na mafai ona faalauiloa a latou faafiafiaga i le po anapo ina ua tatala aloaia lenei polokalame, ma o ia aufaafiafia e aofia ai le aufaipese a le Autalavou mai le Ekalesia EFKAS, atoa ai ma le aufaipese a le Maria Faustina mai Pago Pago; o le aufaipese a le Autalavou a le Ekalesia Katoliko mai Fagasa; aufaipese a Sagota Maria mai Nuuuli, ma le aufaipese a le autalavou EFKAS i Fagatogo.

O le autu o le polokalame o lenei tausaga, “O le faamanatu lea o le Kerisimasi e ala i Musika,” e pei ona fuafuaina e le alii kovana, le tofa i le tootoo ia Lolo Moliga, ma ua faamoemoe e fa po o le a faagasolo ai lenei polokalame.

Na faailoa e Lolo i le fonotaga a le kapeneta i le vaiaso na te’a nei, o le autu o le polokalame o lenei tausaga, o le a mafai ai ona tuu faatasi taitai o le atunuu ma tagatanuu uma o le teritori, e faataua le agaga o le Kerisimasi e ala i le faaleoina o musika eseese.

Saunoa Lolo e faapea, o le a atili ona lelei ma mamalu le polokalame o lenei tausaga, pe afai e auai faatasi sui o le kapeneta mo le lagolagoina o le faamoemoe, e aofia ai le faatasi atu o i latou i po uma e fa o le a faagasolo ai lenei faamoemoe.

Sa ia taua fo’i le la faanaunauga ma le lutena kovana ia Lemanu Peleti Mauga, ia faataua le taleni musika ma pesepesega faaleagaga e momoli mai ai le agaga o le Kerisimasi, e pei ona talenia ai aufaipese, autalavou, aoga aemaise ai faalapotopotoga i le atunuu, nai lo le toe o mai fo’i o ofisa o le malo e pepese ma sisiva ae leai se avanoa e faaali ai taleni a tagata lautele o le atunuu.

Mo po e tolu o lo o totoe o lenei polokalame, e ta’i ono aufaipese o le a faalauiloa ai a latou faafiafiaga.