O lo o ua faatalitali nei tagata i Luanuu i Ofu ma Olosega/Sili, nai lo le faatalitali i le taimi e toe amata aloaia ai femalagaaiga tau vaalele i le va o Tutuila ma le malae vaalele i Ofu, pe a mautu feutanaiga i le va o le malo ma le kamupani vaalele a le Inter Island Airways mo le faatau ese ina atu o le vaalele a le malo o le Segaula e faagaioi e le kamupani vaalele, ma talia e le FAA le talosaga mo se inisiua e faagaioi ai le tautua a le vaalele mo Manu’a.

I se talanoaga a le Samoa News ma le pule o le Ofisa o le Malae vaalele i Ofu, le afioga Leama Misiuaita i le vaiaso nei, sa ia taua ai lona fiafia tele ina ua maua faamatalaga e faatatau i feutanaiga o lo o faia i le va o le malo ma le kamupani vaalele.

“Ua silia i le tolu tausaga e le o toe sese’e se va’alele mo le fela’uaina o pasese mai Tutuila i Ofu nei, se’i vagana ai lava le taimi e lele mai ai le Segaula e aumai malaga a le malo, ae o le fuafuaga ua faia e le kovana ma le malo o se fesoasoani sili lea mo le itumalo i Ofu ma Olosega,” o le saunoaga lea a Leama.

E ui e le o mautu mai i le taimi nei pe manuia taumafaiga mo le faatau ese ina atu o le Segaula, ae na taua e Leama e faapea, o lo o nonofo tapua’i le itumalo ina ia manuia fuafuaga o lo o faia i le taimi nei.

Na taua fo’i e le alii faipule mai le itumalo o Manu’a #2 ia Toeaina Faufano Autele e faapea, sa moemiti le itumalo ina ia vavala mai se aso e maua ai se fesoasoani mo i latou.

Na taua e le sui sooupu mo le afioga i le alii kovana ia Iulogologo Pereira e faapea, afai e talia e le pulega o vaalele a le malo tele o Amerika i le FAA le tuuina atu o le inisiua mo le Segaula i lalo o le faamalu a le Inter Island Airways, lona uiga e tatau ona oo atu i le masina o Aokuso ua fuafua le ulua’i malaga a le Segaula mo Ofu e avea ai ma ave fu’a a le Inter Island Airways.

E pei ona silafia, o le faaleleia o auala o femalagaaiga mo Manu’a i le ea ma le sami, o le isi lea manulauti na faailoa e le tofa i le tootoo ia Lolo Matalasi Moliga o le a ave i ai lana faamuamua i le ulua’i fa tausaga o le la nofoaiga ma Lemanu.

O le aso Faraile la o le vaiaso na te’a nei na feiloai ai le alii kovana sili ma se sui o le kamupani vaalele ia Barney Sene i le setete o Hawaii, mo le faamautuina o talanoaga ma le lisiina atu o le Segaula i le kamupani vaalele e pei ona i ai se ulua’i talanoaga e uiga i lenei mataupu.

Na taua e Iulogologo e faapea, o se tasi o sini o lo o nofo ma le alii kovana, ia mafai ona faaitiitia mai i lalo i le $150 le totogi o le pasese mo le alu ma le toe fo’i mai i Ofu, ina ia fesoasoani ai i tagata o le itumalo atoa ai ma auala o femalagaaiga.

Saunoa Iulogologo e faapea, afai e sologa lelei feutanaiga uma o lo o faia e uiga i lenei mataupu, e tatau ona oo atu i le aso o le fu’a a Manu’a ia Iulai 16 ua sainia loa le maliliega i le taimi tonu e faamanatuina ai e Manu’a le 109 tausaga talu ona sisiina a’e le fu’a a le malo tele i totonu o ona laufanua.

E ui  e le’i talanoa mai Iulogologo i isi vaega o le maliliega o le a sainia nei, peitai sa ia taua e faapea, o ni isi o vaega o lea maliliega e aofia ai le lisiina atu o le vaalele i le kamupani vaalele mo le 12 masina.

Na faailoa e Lolo i taitai o Manu’a i lana malaga i le masina o Me na te’a nei e faapea, e manaomia se Inisiua mo le vaalele ina ia mafai ai ona faaaoga e la’u ai pasese, ina ne’i tula’i mai se faalavelave ae o lo o mafai e le inisiua ona kava tagata atoa ai ma le malo.

O le faafitauli na mafua ai ona le toe lele se vaalele a kamupani vaalele e lua i le atunuu i Ofu, o le tulaga laititi o le malae vaalele atoa ai ma le faaletonu o le vaega e sese’e ai le vaalele.

Na taua e le afioga Leama i le Samoa News ananafi e faapea, o lo o galulue pea le aufaigaluega mo le faaleleia o vaega o le malae vaalele ina ia mautinoa e leai se faaletonu e tula’i mai ai i le lumana’i.

Ae mo le taimi nei e pei ona saunoa le Faatonusili o Pulega o Uafu ma Taulaga ia Taimalelagi Dr. Claire Tuia Poumele e faapea, o lo o faagasolo pea i le taimi nei suesuega o lo o faatupeina e le vaega a le FAA i ni auala e fesoasoani ai mo le toe faaleleia atili o le malae vaalele i Ofu, e aofia ai le faalautele o le vaega e sese’e i ai va’alele, ina ia mautinoa e saogalemu mo le soifua o tagata.