Ua fa’aalia e ni isi o tagata faila lafoga i le atunuu lo latou lagolagoina lea o se finagalo ua fa’aalia e le afioga i le ali’i faipule ia Larry Sanitoa mai le itumalo o Tualauta, mo se avanoa e toe iloilo ai e le malo tulafono o lafoga o lo o i ai i Amerika Samoa i le taimi nei.

Mai le anoanoa’i o mafua’aga na taua e ni isi o le au faila lafoga e tatau ai ona toe iloilo lea tulafono, o ni isi o ia mafua’aga e aofia ai le tatau lea ona laina tutusa tagata faila lafoga i setete uma ma teritori o le Iunaite setete i fa’amanuiaga tau tupe o lo o latou mauaina.

“O le isi mafua’aga e ao ai i le faigamalo ona toe vaavaai i le tulafono, ina ia taofia ai le lolofi atu o tagata e faila a latou lafoga i Amerika, e le gata ua soli ai le tulafono ae a’afia ai tulaga o tupe maua mo le malo o Amerika Samoa,” o le saunoaga le a Malaki Ugapo, o se tama e 56 tausaga le matua ua 26 tausaga o lana tautua i se tasi o matagaluega a le malo.

“E fui lava le malo e faafefe tagata faila lafoga e solitulafono le faila o a latou lafoga i fafo, e le taitai popole i ai tagata leaga e malosi tele le tupe o lo o maua mai ai, afai la e toe vaavaai le faigamalo i se suiga o le tulafono ina ia feololo ni nai tupe e maua e tagata faila lafoga i tausaga taitasi, e i ai lo’u taofi ailoga e toe i ai se isi mai Amerika Samoa e toe faila sana lafoga i Amerika,” o le saunoaga lea a Ugapo na lagolagoina fo’i e le tama’ita’i faiaoga ia Margret Talosaga-Logovi’i o Pava’ia’i.

Na taua e Talosaga-Logovi’i e fa’apea, afai ua silia ma le 10 tausaga talu ona le toe faia se suiga i le tulafono o lafoga a le malo o lo o i ai, lona uiga o se fautuaga taua tele lea ua faia e le ali’i faipule mai Tualauta, ina ia mafai ai ona toe vaavaai le faigamalo i ni isi auala e fesoasoani atili ai i tupe maua a tagata ae faapea ai le malo.

“O tagata Samoa e naunau tele i latou i le tupe, ma afai e tumau pea le tulafono o lafoga o lo o fa’aaogaina i le taimi nei, e atili fo’i ona le fa’amaoni le to’atele o tagata faila lafoga i le tulafono, ona e laititi le tupe o lo o maua mai lafoga pe a faila lotoifale, ae tetele atu fa’amanuiaga o lo o maua mai i lafo e faila i fafo,” o le saunoaga lea a Talosaga-Logovi’i.

E to’alua isi ali’i faigaluega i kamupani tumaoti na la fa’ailoa i le Samoa News lo la lagolagoina o le fuatuaga a le ali’i faipule mai Tualauta, mo se avanoa e tofifa ai se komiti faapitoa latou te iloiloina se suiga i le tulafono o lafoga.

E to’atasi se ali’i e faigaluega i se tasi o kamupani tua sa ia fa’amaonia mai i le Samoa News, e tolu tausaga o faila lana lafoga i fafo, ona o le tele o le fa’amanuiaga tau tupe sa ia maua mai ai.

Ae ina ua fesiligia po o faaauau pea ona faila lana lafoga i fafo i le taimi nei, na tali le ali’i lea, “e leai, talu lava ona fa’ailoa mai e le malo e solitulafono le faila o le lafoga i fafo, na ma manatu ai loa ma lo’u to’alua e aua ne’i toe failaina le ma lafoga i fafo, ae faila pea loa iinei.”

I se tusi sa tuuina atu e le alii faipule ia Sanitoa i le afioga i le kovana sili ia Lolo Matalasi Moliga, sa ia faailoa ai ni isi o atugaluga mai ni isi o tagata o lona itumalo, e aofia ai ma le tulaga le talafeagai o lo o i ai le tusi o le 2000 lea o lo o fa’aaoga i le taimi nei mo le failaina o lafoga a tagata totogi lafoga i le atunu’u.

Na taua e Sanitoa e fa’apea, ua tusa nei ma le 14 tausaga talu ona le toe i ai se suiga i le tusi o lo o faaaoga e faila ai lafoga i le teritori, lea na gata suiga i le aso 31 Tesema 2000.

Saunoa Sanitoa e faapea, e ui sa manino le auala na faia e le faigamalo a Tauese Sunia i le tulaga o le tulafono o le lafoga e pei ona i ai i le taimi nei, ae i ai lona talitonuga o suiga ua taumafai i ai le faigamalo fou o le a manuia ai le lautele o le atunuu.

Na fa’aleoina fo’i e le afioga i le alii faipule ia Legae’e Palepoi Mauga le talosaga lava fo’i lenei i luma o le maota o sui i ni nai masina e le i mamao atu, mo se avanoa e toe vaavaai ai le faigamalo i le tulafono o le lafoga o lo o fa’aaogaina i le teritori i le taimi nei, o le tusi tulafono lava lea o le 2000.

Saunoa le afioga Legae’e, o se tasi ua tele tausaga o galue i le Ofisa o Lafoga a le malo, o faamanuiaga tau tupe o lo o maua e tagata faila lafoga, e fa’avae mai i le tusi lafoga o lo o fa’aaogaina i le taimi nei, e le taitai faatusatusa i faamanuiaga tau tupe o lo o agava’a ai tagata faila lafoga i Amerika ma isi ona teritori.