Ads by Google Ads by Google

Lagolago ni isi matua faasea faipule faasaga i pasi aoga

E to’atele ni isi o matua o lo o lagolagoina se faasea a se tasi o Faipule, i le vave usu o pasi aoga e piki fanau aoga ae le’i taitai ona malamalama le taeao.

 

Na faailoa mai e ni isi o matua i le Samoa News e faapea, afai o lo o naunau le Ofisa o Aoga e faasoasoa taimi o pasi ina ia mafai ona la’u uma fanau i aoaoga, e tatau foi ona silasila mamao i le saogalemu o fanau aoga.

 

“O isi taeao e taunuu le pasi aoga i luma i e piki fanau aoga ua ta le 6:00, a’o le taimi lea e le’i malamalama lelei le taeao, e na o le momomo o le loto i le vaai atu i nai fanau aoga ua vave usu i le aoga ae le’i taitai oo i se taimi e tatala ai faleaiga a le aoga poo potu aoga fo’i,” o le faasea lea a le tina o Luisa Vaoleti o Fagatogo, o se tasi o matua o lo o aooga ona alo i le aoga tulaga muamua i Pago Pago.

 

Fai mai ni isi o matua, e tatau i le Fono ona fautua i le Ofisa o Aoga, ina ia faatulaga lelei taimi e piki ai e pasi aoga nai fanau, ona o isi taimi e fia momoe fanau aoga i totonu o le potu ae lei taitai uma le aso aoga, e mafua mai i le vave ala i luga ona o le tau tuliga o le taimi o le pasi.

 

Fai mai le isi tina, e popole o ia i le saogalemu o lana fanau teine o lo o aooga i le aoga, ona o lea e vave usu le pasi ae le’i malamalama lelei le taeao.

 

O le mataupu lenei na laga e le afioga i le alii faipule mai Fagatogo ia Maugaoalii Leapasi Tusipa Anoa’i, i se iloiloga ma le Faatonusili o Aoga a le malo, le tofa Vaitinasa Dr. Salu Hunkin-Finau i le vaiaso na te’a nei.

 

Na taua e Maugaoalii e faapea, “O isi aso ou te mulimuli ai lava i tua o le pasi aoga seia oo atu i le faleaoga i Pago Pago, ona ou te fia vaai poo a gaioiga a fanau aoga e fai i le taimi e taunuu atu ai, peitai o ni isi o taimi ou te vaaia ai fanau e nofonofo solo i fafo o le faleaoga, ona e le’i oo i le taimi e tatala ai potu aoga ma le fale ai, a’o lenei ua vave usu atu ona ua vave piki latou e le pasi aoga”.

 

Sa ia fautuaina ai le Faatonu o Aoga, ina ia ona toe fai se suiga i taimi o pasi aoga ina ia mautinoa e usu fiafia ma usu malosi fanau i taeao uma i le aoga.

 

Na taua e le tama o Motuga Tagoa’i o Fagatogo e faapea, e tele faalavelave e ono aafia ai fanau pe a vave taunuu i le faleaoga, aemaise lava pe afai e taunuu ae lei i ai ni faiaoga ua taunuu i le aoga.

 

O le faasea lava foi lea na laga e le faipule o Manu’a, le afioga ia Toeaina Faufano Autele ina ua maua lona avanoa e fesiligia ai le tamaitai faatonu.

 

Na taua e Toeaina e faapea, o le isi lea mafuaga e ala ai ona tutupu faalavelave i fanau teine aoga, ona o le vave momoli i le faleaoga, ae mafua mai ona ua vave alu atu le pasi aoga.

 

“E le mafai ona malu le pito laau a matua o lo o taumafai atu i ai e puipui fanau teine, pe afai e lape mai foi le pito laau a le malo, pau le auala e foia ai le faafitauli lenei, o le lava o pasi aoga e la’u ai fanau, ona le toe vave usu lea o pasi aoga i le vaveao e le’i malamalama,” o le saunoaga lea a Toeaina.

 

Na taua e ni isi o matua mai le afioaga o Fagatogo o lo o aooga a latou alo i Pago Pago, o isi aso pe afai e le maua e a latou fanau le pasi aoga, latou te faaaoga ai pasi tua e momoli ai a latou fanau i le aoga ae totogi pasese.