Lagolago Manu’a taumafagai a le NOAA mo le Fagatele
O le vaiaso na te’a nei na sainia ai e taitai o le itumalo o Manu’a sa latou talosaga e fa’ailoa ai lo latou lagolagoina o le fa’amoemoe o lo o taumafai mai i ai le Vaega e Puipuia le Ea ma le Vanimonimo a le malo tele, le NOAA, ina ia toe fa’aopoopo atu nisi ogasami o lo o puipuia ma latou vaavaaia.
O le Aso Faraile na te’a nei na faamuta ai le tuuina atu o ni finagalo e uiga i le mataupu lenei o loo taumafai mai i ai le NOAA.
E ui e toatele taitai o le itumalo sa le’i malamalama i le aano atoa o lenei faamoemoe, peitai ina ua maea ni aoaoga sa faataunuuina e le Ofisa o Fefaatauaiga ma Alamanuia a le malo, na faatoa manino ai le mata o le vai i le aano tonu o loo taumafai ai le NOAA e faaopoopo ogasami e tuu atu i lalo o le latou vaavaaiga.
Saunoa le afioga i le alii Senatoa ia Galea’i Tu’ufuli ina ua fesiligia e le Samoa News, e leai se afaina o le taumafaiga a le vaega o le NOAA ina ia faalautele ogasami e i lalo o le latou vaavaaiga, peitai e tatau ona matua malamalama ma manino aiaiga uma o le a faia, ina ia malamalama ai foi tagata o le nuu, ma latou iloa ai manuia e maua e tagata uma pe a manuia nei taumafaiga.
“E taua tele lenei faamoemoe ona e talitonu taitai e manuia ai tagata o le nuu aemaise ai o Manu’a i le lumana’i, o le ala foi lena ua matou lagolagoina ai lenei taumafaiga, ae tatau foi ona manino aiaiga uma ma feagaiga e osia, ina ia mautinoa e tagata poo a alagamanuia o le a latou maua pe afai e manuia taumafaiga nei,” o le saunoaga lea a Galea’i.
E pei ona silafia e le atunuu, o le mataupu lenei i le Fagatele National Marine Sanctuary sa tele i ai ni manatu ma finagalo faaalia o le atunuu, ina ua faatoa alia’e mai i le tausaga na tea nei, ma mafua ai loa ona agai mai le faipule i le konekeresi ia Faleomaga Eni Hunkin, mo le faataunuuina lea o ni iloiloga ina ia saili ai finagalo o le atunuu e uiga i lenei mataupu.
E oo foi i le alii faipule ia Faleomavaega o loo tete’e o ia i le fuafuaga lea a le NOAA, e ui o loo lagolagoina e le alii kovana sili ia Togiola Tulafono ma nisi o taitai o le fono.
Sa faatumulia le poto fono o le Ofisa o Mataupu Tau Samoa i taitai o Manu’a sa auai atu mo le sainiaina o lenei talosaga.
Sau Galea’i, o le talosaga lea ua sainia nei e le itumalo o Manu’a, ua faailoa atu ai le malilie uma o ona taitai ina ia lagolagoina lenei faamoemoe, i le maea ai lea o le tele o taumafaiga e faamanino lenei mataupu.
I se vaega o le maliliega o loo taua ai e faapea, “ua malilie le motu o Manu’a e aofia ai Fitiuta, Ta’u ma Faleasao e pei foi ona lagolagoina e le matagaluega o Fefaatauaiga ma Alamanuia a le malo o Amerika Samoa, e lagolago taumafaiga mo le toe faaopoopoina lea o isi vaega o ogasami e tuuina atu i lalo o le vaavaaiga a le NOAA i le Fagatele Bay.”
“Ua matou sauni tatou te galulue faatasi ma le tou ofisa i soo se gaioiga ma fuafuaga ina ia mafai ai ona faaleleia le ola faalenatura o i’a ma amu o le sami, ma faaauau ai pea polokalame mo le faasaoina o meaola, ina ia manuia ai tagata ma aiga i le lumanai,” o se vaega lea o le maliliega.
O i latou o loo saini i lenei maliliega e aofia ai Galeai ma nisi o taitai e toa 11 o Manu’a, e pei ona tuuina atu ai lenei sainigalima i le aso 9 Mati, ma faamauina ai loa lo latou talitonuina atoatoa o lenei faamoemoe.
Saunoa Togiola i le taimi na faia ai le iloiloga lea na valaauina e le tofa ia Faleomavaega, e le o taumafai le malo tele e fao faamalosi ese atu ogasami ma vaega e tua i ai tagata Amerika Samoa, ae o lo latou talitonuga, afai e faasao ogasami mai le soona fagotaina i le taimi nei, e mautinoa e tua i ai tupulaga ma fanau lalovaoa a Amerika Samoa i le lumanai.
Fai mai le alii kovana, e iloa le tagata e moni lona alofa i fanau ma le lumanai na te taumafai e saili se manuia e tua i ai fanau a le atunuu, ae o le tagata e ola e aunoa ma se alofa, e manao na o le taimi nei lava e faaaoga ai manuia, a uma, ona uma foi lea.