Ads by Google Ads by Google

Lagolago e nisi o le atunuu si’itaga fou a le LBJ

Na taua e nisi o le atunuu lo latou lagolagoina o le fuafuaga a le falemai o le LBJ, e sii totogi o nisi o ana tautua ina ia maua ai se isi tupe fesoasoani i lana tautua mo le atunuu, peitai sa taua e nisi, o se avega mamafa ua faaopoopo i le tulaga pagatia o lo o i ai le tamaoaiga o tagata.

O le taeao ananafi na amata faamamalu ai siitaga i pili a le falemai, peitai sa vaaia lava le tumutumu atu o le atunuu mo le vaaia o le foma’i, aemaise ai o le faia o a latou talavai.

O le te’a o le itula e 9:00 i le taeao ananafi na asia ai e le Samoa News le nofoaga autu o le falemai i Fagaalu, ma vaaia ai e feololo lava le mamalu o le atunuu o loo i ai i le potu e faatali ai gaegase e fia vaai le foma’i.

O nisi sa fesiligia sa fiafia e faailoa o latou finagalo e tusa ai o siitaga, peitai o nisi sa le’i fia talanoa i le Samoa News, e le’i mananao fo’i e faailoa o latou igoa.

Na taua e le tama matua o Ikenasio Sootaga o Utulei lona lagolagoina o siitaga a le falemai, ina ia maua ai se tupe e faaleleia atili ai lana tautua. Fai mai Sootaga, o le taua o siitaga a le falemai e tele ai tupe e fesoasoani ai mo le aumaia o foma’i lelei mai fafo, ma toe faafou ai le falema’i ua tuai.

Ae na taua e Enele Sululoto o Aua, e faigata ona toe fai se faitioga leaga o lea ua faamamalu siitaga fou a le falemai, pau le mea e fai o le usita’i ma totogi.

“E le toe i ai lava se isi alofaga mo i latou mai fafo o loo aumau i le atunuu, ona o lea ua amata siitaga a le falemai, pau le mea ou te faia o le usitai ma totogi le tupe pe afai ou te asiasi mai i le falema’i,” o le tala ata lea a Sululoto.

“Ou te tautino atu foi, ua fai lava si mamafa o lenei siitaga pe a fuafua atu i le tulaga o loo i ai le tamaoaiga o lo’u aiga i lenei taimi, na o a’u o loo faigaluega e tasi ai si a’u fanau to’a fa faapea ai lo’u tina matua o loo i ai, maimau pe ana i ai se isi fesoasoani e maua mai i le malo ina ia taofia ai siitaga a le falemai,” o faanaunauga ia o Sululoto.

Ae na taua e le tina o Metala Seumanutafa mai Tafuna, na te lagolagoina siitaga a le falema’i ona o le manaoga tau tupe o loo i ai i le taimi nei, ina ua le mafai e le malo ma le Fono ona tuu atu le fesoasoani o loo manaomia e le falemai.

“E ui ua maualuga siitaga ae ou te lagolagoina le tatau lea ona sii pili a le falemai, aua a lava tupe o le a lelei foma’i e aumai latou te togafitiina i tatou ma nai a tatou fanau, ae afai lava ou te le gafatia le maualuga o pili a le falemai, e tatau la ona ou ola maloloina ina ia aua ai ne’i o’u alu i le falema’i,” o le tala ata lea a Seumanutafa i le Samoa News.

E to’alua isi tina e lei finagalo e faailoa o la suafa i le Samoa News, peitai na la taua lo la tete’e i siitaga a le falemai, ona ua atagia mai ai le pau atu o le mamafa i tagata mai fafo o loo aumau i le teritori e ui o loo tofu sao uma i latou i le totogiina o lafoga.

“O lea ua amo e tagata mai fafo le taugata o pili a le falemai, ae o le toatele o tagata mai fafo o loo faigaluega ma totogi lafoga i le malo, totogi pili i le ASPA, lona uiga a toe faaopoopo atu ai ma pili a le falemai, ua matua mamafa le avega,” o le tomumu lea a le isi tina.

E $10 sa totogi pe afai ete fia vaai i se foma’i, peitai talu mai le taeao ananafi, ua sii atu i le $20 mo tagatanuu o Amerika Samoa faapea ai ma i latou mai fafo ua avea ma tagata nonofo mau, ae $105 mo tagata mai fafo.

Afai e te fia asia le potu mo gasegase tigaina (emergency clinic), e $30 mo tagatanuu ma tagata nonofo mau i Amerika Samoa ae $130 mo tagata mai fafo, ae o le fale talavai o loo tumau pea i le $10 le totogi.

E faalua ona taumafai le LBJ e sii totogi o ana tautua peitai e le’i taunuu, ona o feutanaiga sa faia i le va o le malo ma le Fono Faitulafono, mo le tau sailiina mai lea o se fesoasoani tau tupe mo le falema’i, peitai ina ua le pasia e le Fono Faitulafono nisi o pili tupe sa tuuina atu i ai e le kovana, na ia taua ai lona lagolagoina o siitaga fou ua faia a le falemai.

Ui o lea, na taua e Togiola Tulafono lona faanaunauga o loo i ai, na te toe tuuina atu i le Fono i le tauaofiaga lona fa lea o le a tatala i le aso Gafua o le vaiso fou, isi pili tupe e fesoasoani ai i le falemai.

Na tuuaia e le alii kovana le leai o se faaiuga a le Senate na faia i pili tupe sa ia tuuina atu, ma mafuaaga ua sii o pili a le falema’i