Ua fa’aalia e ni isi o ali’i ma tama’ita’i leoleo le taua tele o le poloaiga mai le alii komesina o Leoleo lea ua latou galulue e fa’amalosia i le taimi nei, o le faia lea o fa’amaumauga mo so o se tasi e taofia faapagota i soo se taimi e ala i le pu’e o lona ata, fai faamaumauga o alofilima (finger print) ina ia mautinoa e mulimuli ta’i e leoleo ta’iala e tatau ma onomea mo le fa’atinoina o a latou tiute fa’aleoleo.

E ui na fa’amatalaina e ni isi o leoleo sinia lea galuga o se galuega “e fa’alavelave toe leai se taimi e mafai ai ona fa’atino”, na taua e ni isi o leoleo lea gaioiga “o se gaioiga e tatau lava i so o se leoleo ona ia fa’atinoina”.

“O le faigata ona faatino o le gaioiga e pei o le faia lea o fa’amaumauga mo le tagata ua taofia faapagota e pei o le faia o ‘finger print’ toe pu’e lona ata, aua a o o lava i le taimi e pisi mai ai le telefoni i ni vevesi o lo o manomia mai ai le fesoasoani a leoleo, ua le iloa po o fea le galuega e tatau ona fa’atino muamua, po o le nofo o le leoleo e pu’e ata ma fai ‘finger print’ mo le tagata ua maea ona pu’e fa’apagota, po o le tuu o galuega ia ae aga’i atu e tali le valaau mai le atunu’u mo se fesoasoani”, o le saunoaga lea a se tasi o leoleo sinia e le i finagalo e fa’ailoa lona suafa.

Na taua e le leoleo lea e fa’apea, “e tumu i matou i le fa’aaloalo i fa’atonuga uma e tuuina mai i le alii komesina, peita’i o le fa’afitauli o lo o tula’i mai, o isi Sifi (Shift) e na o le ta’ito’a 3 tagata o lo o galulue ai, e le taitai lava leoleo ia e e to’atolu latou te fa’atinoina le galuega pe afai e tau fai tutupu mai ni fa’alavelave se tolu pe sili atu fo’i i le taimi e tasi”.

Ae maise lava pe afai e tau fai atu finger print ma pu’e lona ata mo le tagata ua taofia, ae toe tatagi le telefoni o lo o i ai le isi vevesi e manaomia ai se fesoasoani, lona uiga e tatau ona taofi le faia o finger print ma le pu’eina o le ata ae aga’i atu leoleo e tali i le valaau.

Na taua e le leoleo sinia lea e fa’apea, o se tasi o vaega e faa faigofie ai le faatinoina o le galuega, o le faatino lea e le aufaigaluega a le falepuipui o gaioiga uma e pei o le pueina o ata ma fai finger print, ina ia aua ai nei faalavelave i le faatinoina o le latou galuega.

Ae na taua e ni isi o leoleo e fa’apea, o le tiute o soo se leoleo na te pue faapagota se tagata ona o tuuaiga i le soliina o le tulafono, o le mautinoa lea e fai uma faamaumauga e manaomia mo le tagata lea, e pei o le pueina o lona ata, fai finger print atoa ai ma le ripoti ina ia mautinoa e maua ni faamaumauga a le ofisa o leoleo mo le tagata ua molia.

Na taua e le isi leoleo i le Samoa News, e le o se gaioiga faigata ia te ia le faia pu’e o le ata ma fai finger print a soo se tagata na te taofia faapagota, aua e talitonu o ia, o le isi lea vaega o ana tiute tauave.

O le masina na te’a nei na tuuina mai ai e le komesina o leoleo ia William Haleck sana poloaiga e faamalosia ai leoleo, ina ia amata ona latou tausisia taiala e tatau i soo se leoleo ona ia faatinoina, e pei o le pueina lea o le ata ma fai finger print, aua o gaioiga fo’i ia o lo o faaaoga e ofisa o leoleo uma i setete ma isi teritori o le malo tele.