Lafoa’i lapisi nisi o meaai aoga Peter Coleman

E le i nofo lelei i le finagalo o le afioga i le Matua ia Pulu Ae Ae Jr, tulaga fa’aletonu o lo o alia’e mai pea i taumafa o lo o auina atu e le Vaega a le School Lunch mo le fofoga taumafa a fanau aoga i le Aoga a Peter Coleman i Pago Pago, ina ua toe alia’e mai fo’i i le aso ananafi se fa’aletonu o lo o tula’i so’o mai pea, o le lafoa’i lea i le lapisi o le anoanoa’i o fualaau ‘aina o lo o kiliva atu ona o le fa’aletonu ma le leaga.

 

“E le o ni ta’ifau fanau a le Itumalo o lo o aooga i le aoga lenei, e ala ai ona soona la’u so’o mai nei meaai leaga e fafaga ai tamaiti, na tupu i le tolu vaiaso talu ai le fa’aletonu lenei, na toe tupu fo’i i le vaiaso na te’a nei, a’o lea fo’i ua toe tula’i mai i le aso (aso ananafi) ina ua siaki atu pusa meaai na la’u mai mo tamaiti e leaga,” o le saunoaga lea a le afioga i le Matua ia Pulu.

 

Na asia e le Samoa News le Fale ‘ai a le Aoga i Pago Pago i le aoauli ananafi, ma maitauina ai fualaau ‘aina e pei o Saga; Kukama ma pusa moli ua lafoa’i uma i le lapisi ina ua siaki atu e leaga uma.

 

O isi pusa moli e pei ona taua e Pulu i le Samoa News, e leaga uma moli o lo o i totonu o  pusa, e le gata e pala ae polopologa fo’i, o Saga e mamago uma aano, e leaga pe a saka mo tamaiti aoga, e oo fo’i i isi fualaau ‘aina e pei o kukama, e mamago isi vaega e le lelei.

 

Na matua si’i si’i le si’ufofoga o le afioga i le matua ia Pulu ina ua fesiligia e le Samoa News e tusa ai o lenei fa’aletonu.

 

“O ai la e aia meaai leaga nei, e le o ni manu fanau a le itumalo lenei e fafaga ai i meaai leaga ia, ua tupu so’o tele le fa’aletonu lenei i meaai e la’u mai i le aoga,” o le saunoaga lea a Pulu ma lona si’ufofoga ua atili ai ona si’i si’i i luga.

 

Sa ia taua fo’i e fa’apea, ua mae’a ona ia logoina le Ofisa o le School Lunch e tusa ai o le fa’aletonu e pei ona tula’i mai i meaai a tamaiti aoga.

 

“Pau le tulaga lea ua aoga i ai meaai nei, ua la’u e fafaga ai lafu pua’a a tagata o lo o fai a latou lafu pua’a, e fa’aaoga i ai, ao se upu e fafaga ai tamaiti e le talafeagai,” o le isi lea saunoaga a Pulu.

 

Na taua e le Pulesili o le School Lunch ia Christina Fualaau e fa’apea, o fualaau ‘aina na aveese ua leaga, e le o meaai ia na fuafua e fafaga ai fanau, ae o meaai na aveese e le au kuka ina ua siaki atu ua fa’aletonu.

 

“E le o taumafai le School Lunch e fafaga alo ma fanau aoga i meaai leaga, o le matou galuega, soo se taimi e taunuu mai ai container o lo o la’u mai ai fualaau ‘aina mai fafo e pei o moli, apu ma meleni, matou te siaki uma pusa ina ia mautinoa e aveese vaega ua faaletonu ae tuu i ai na o vaega o lo o lelei mo le fofoga taumafa o fanau,” o le saunoaga lea a Fualaau i le Samoa News.

 

O fualaau ‘aina e i ai moli, apu ma meleni, o fualaau ‘aina ia o lo o aumai i fafo, se’i vagana ai fualaau ‘aina e pei o kukama ma saga, faapea ai fa’i ma taro, o taumafa ia o lo o fa’atau mai le aufai fa’atoaga i le atunuu.

 

Saunoa Fualaau, e fono lana aufaigaluega i vaiaso ta’itasi mo le fa’amautuina o a latou tiute fa’atino, ina ia mautinoa e lelei taumafa latou te tuuina atu mo fanau aoga i aso ta’itasi.

Comment Here