La’u Toe Sa’afi mo Tinei Liu Akapo

“E le tau sulaina le toga lelei, sa ola lava ia ma teuteu e ia lona ala sa savali ai, afai fo’i e i ai sona lape, sa ia fa’ato’ese ma taumafai atili, o tagata auauna fa’amaoni, e le faigofie ona maua i lenei fo’i tafa o le galuega. Peita’i, e ao ina faia le galuega e tusa o le finagalo o le Matai.”

 

O nisi ia o le saunoaga a le ta’ita’i o le toe sauniga o Tinei, a’o loma le molimau fita a le tama o le aiga, le na mafuta ma tinei i lona olaga faito’alua, tausifanau ma osiaiga, Leilua Mase Akapo.“O se tina e naunau i le li’o o lona aiga fa’apea ma ona aiga uma Tokelau ma Samoa.

 

O le olaga o le tina sa soifua a’e i ona matua Lolani Liu ma Iemaima Liu, ia Mati 4, 1955 ae ua maliu Tesema 30, 2013. Na alaala i latou ma ona matua i Faga’alu, peita’i ina ua mafuta ma le afioga Leilua Mase ona fa’amautu ai lea ma le fanau i Vaitogi.

 

E to’afa o la’ua alo ma le susuga le Faia’oga, lea ua avea nei ma tagata faigaluega i le Ofisa o Va’ai Tau a le Malo tele, Leilua Mase Akapo: Osema Roland, Adulbeau Lomi, Taumei John ma Gloryana Rofetta. Ua maliu o ia, ae ua atoa le to’a tolu fanau a lana fanau ua ia mafuta i ai.

 

Na a’oa’oina Tinei Akapo i Samoana High School ina ua mae’a ana a’oa’oga i vasega laiti, ma sa avea ai o ia ma Ms Samoana i lona tausaga fa’ai’uaso. Na ulufale lea o ia i le a’oga tama’ita’i tausima’i, ma sa ia avea le togisilia i lea fa’au’uga i le tausaga 1974.

 

O lana ulua’i galuega fo’i lea i lona olaga tama’ita’i talavou, Tausima’i Pasi Laisene i le Matagaluega o le Soifua Maloloina, mai le tausaga e 1974 se’ia o’o i le tausaga e 1979. Na si’itia i la’ua ma Mase Akapo e alaala i Alaska, ma sa faigaluega a lea o ia o le Supavaisa i le Falema’i o Tagata Afaina Tino i Valdez, Alaska mai le 1980-82.  Suia lea o lana galuega i le vasega Tausitusi & Su’etusi lava a le Boyles & Associates CPA Firm i Anchorage, Alaska ma sa avea ma pule o lea Ofisa  1982-84. Toe suia lea o lana galuega i le tofi Tausitusi a le Northway Builders Inc, i Alaska lava mai le 1984 - 85. Sa ia mauaina lea o le galuega i le Barlett Memorial Hospital, Juneau Alaska e fa’atautaia totogi o tagata faigaluega uma i lea falema’i mai le 1985-89. Toe soso’o lea ma le si’itia ane i le avea ma Su’etusi ma Tausitusi a le Tlingit-Haida Powere Authority mai le 1989-91.

 

O le latou toe taliu mai i fanua i Amerika Samoa, na muamua ai faigaluega o ia i el Ekalesia o le Pule i le tatou faletusi EFKAS i Kanana Fou mai le 1992-2001. Soso’o lea ma si’itia mai e avea ma se tasi o Tausitusi ma Su’etusi  i le Falema’i tele i Faga’alu LBJ Med. Center o se supavaisa i lea vaega.

 

O nisi o Sosaiete tetele sa ia amatalia ma mafuta i ai i le tele o taimi o lona soifuaga i Samoa nei sa ia avea ai ma se tasi o i latou na fa’avaeina le WIND - Mafutaga Tina Tatalo i se suiga fou o le soifua. O ia o se tasi o faia’oga mo le fanauiti i le Aso Sa mo le EFKAS i Vaitogi.

 

Na aofia lona suafa i le Komiti Fa’afoe e sailiilia Pagota e fia Palola mai fa’asalaga i le To’ese. O se tasi fo’i o totino o le Komiti Fa’afoe o le A’oga SPICC i Fatumafuti, ae o ia fo’i o se tasi o totino o le Komiti Fa’afoe o Kanana Fou Seminare.

 

I lona toe sauniga i le aso 20 Ianuari, 2014, sa tutula’i ai le Fa’afeagaiga Taulagi i Vaitogi ma fa’ailoa lana molimau ola i le olaga galue o Tinei, o le faletua o le A’oa’o Fesoasoani i lana ekalesia, lea sa o mai mai fafo ma le la’ua tofi Tiakono ma amata galulue ai i’inei.

 

 O lana sosaiete o le WIND sa latou pepese ma fai vi’iga i le Atua i lona sauniga i le Fale Laumei ma sa auai fo’i i le lona toe sauniga i le Malumalu EFKAS i Vaitogi, lea sa latou teuina fa’apitoa e fa’ailo ai lo latou alolofa i le latou peresetene ua maliu, ma o se tasi e fa’agalogata ia i latou ona o lana ta’ita’iga maumaua’i. “O ia o se ta’ita’i e le fefe e ta’uta’u le Upu, ma fai mea tetele mo lona Matai.” O le latou lea mau.

Comment Here