O le fetufa’iga i le va o Tautua Eseese ua ofoina mo le Fanau Fa’apitoa a le tatou malo ma le vasega o Matua o fanau fa’apitoa i le atunu’u, sa fa’atautaia lea i le Fale Laumei i le aso ananafi mai le itula e 9:00 i le taeao se’ia o’o i le itula e 12:00 i le aoauli.

O lea fa’atalanoaga sa fa’atautaia lea e le UCEDD, Ofisa o lo’o nafa ma le vasega o fanau fa’apitoa ma le va’aia lelei o latou aia tatau i le Kolisi Tu’ufa’atasi o Amerika Samoa.

“O lenei fa’amoemoe, ua toe fa’amanatu tasi atu i matua, le taua na’ua o le latou pitola’au, o le tima’i lea o le Ofisa o le Special Education lea sa latou fa’auluina tatou fanau fa’apitoa mo a’oa’oga fa’apitoa i a’oga maualuluga, ae peita’i, o lea o le a muta lea tautua ae tatau ona ulufale i latou i kolisi, po’o le fia faigaluega po’o se isi fo’i la’asaga fou ua manatu i latou ma oe le matua, ua tatau ona agava’a ai lou alo.”

Na amata tautalaga fa’apitoa e le faletua o le Kovana sili, Cynthia Moliga, ma sa tele lana folasaga i lona tima’ia malosi o matua, “Ia lava lou iloa o si ou alo fa’apitoa, i ona malosi’aga ma ona agava’a, ina ia faia se fa’atalanoaga e outou ma sui o le Special Education, ae ua manino i lona mafaufau se mana’oga o le a si’itia i ai le taumafaiga a lou alo. Pe fia faigaluega, pe toe a’otauina atili i ni tomai e faaleleia atili ai lona agava’a i se galuega fa’apitoa e te silafia e fiafia o ia e faigaluega ai, pe ua mana’o fo’i oulua ma lou alo e fa’aauau a’oa’oga i le Kolisi Tu’ufa’atasi.”

I le agaga o lea faletua po’o le tina fo’i o le atunu’u, na ia fa’ailoa mai ai, “O lo’o i ai se avanoa fa’apitoa i lo’u lava tagata auauna, e mafai ai ona ou maua avanoa lelei, e auai mai ai i so’o se fonotaga po’o ni fa’atasiga o auaunaga eseese e fa’ao’o mo le fanau fa’apitoa a le tatou atunu’u!”

Sa tele fo’i se tima’i a Cynthia i le vasega o matua, “E tatau lava ona tatou naunauta’i e faia se mea sili lava e nei tautua eseese e aga i a tatou fanau fa’apitoa e aoga ai i lou alo fa’apitoa, e ao ina tatou fa’ataua muamua i latou ma o latou mana’oga, ia faia lou sao atofa mo le fa’atalanoaina o le la’asaga o le a soso’o mai, pe a mae’a le a’oa’oga i a’oga maualuluga! O le to’atele o fanau fa’apitoa, o le taimi tonu lea ua tatau ai ona a’otau i latou ia mafai ona soifua pea, pe afai o le motusia le mafutaga ma i tatou matua!”

O Avanoa e Faigaluega ai Tagata ma fanau fa’apitoa i le Vocational Rehabilitation sa soso’o ai le latou folasaga. Ua fa’ailoa mai ai, e mafai ona mae’a loa le a’oga maualuga a le fanau fa’apitoa, ona fa’atumu loa lea o le latou talosaga mo avanoa faigaluega e fa’auia mai e le Matagaluega o Galuega Fa’apitoa lea e auga mo le ‘au’aunaga o i latou e i ai afaina tumau o le tino ma le mafaufau.

O Elisapeta Mavaega sa fai ma sui o lea matagaluega mai le vaega o le “Basic 110” ma e muamua lava ona o’o atu matua fa’atasi ma le sui talosaga i le latou Ofisa mo se su’esu’ega fa’apitoa o lona tomai fa’apitoa o i ai. “O lea talanoaga i le va o lenei ofisa ma le sui, e toe iloilo toto’a ai agava’a ma malosi’aga o lou alo fa’apitoa, e iloa patino ai ituaiga o faiva e fiafia e galue ma agava’a i ai.

“E mafai ona a’otau atili le sui, pe ulufale loa i se avanoa e faigaluega ai mo sina vaitaimi, pe o lona olaga atoa fo’i, pe afai e mae’a talia atoatoa e le pisinisi po’o le matagaluega o ia ona o ona agava’a!”

Na fa’amalamalama atili fo’i e i ai nisi o le fanau, o le a matua le mafai ona ofoina i ai ni avanoa e faigaluega ai, ona ua ogaoga tele o latou mana’oga tau le tino po’o le mafaufau. O i latou na e taumafai le latou fo’i matagaluega e ofoina i ai nisi tautua mai isi vaega o le latou Ofisa, ma e tatau ai lava ona o’o atu le matua e fa’amalamalama ma fa’apupula atili i ai nei tautua eseese.

E i ai aiaiga o so’o se tautua mo fanau fa’apitoa, ma o aiaiga ia e mafai ai ona le maua e nisi o nei agava’a e faigaluega ai, ae o nisi fo’i, e mafai ona fa’aleleia ai e le Voc Rehab nofoaga o lo’o faigaluega ai, ia fa’afaigofie ma fa’afiafia le sui fa’apitoa e galue.

Na i ai fesili sa fefa’asoaa’i ai lea sui ma le lautele o matua sa auai, ma sa fesiligia fo’i, le toe mafai ona fa’aauau se galuega na galue ai se tasi o alo fa’apitoa sa fa’ao’o ane i lea fonotaga. Ua matauina, sa mua’i faigaluega lea sui fa’apitoa i le polokalama o galuega fa’avaitaimi, e le tumau ai. Peita’i, o lo ua toe fa’atonuina e toe o’o atu ma lona matua se’i toe fa’atalanoa se isi ona avanoa faigaluega i lenei tausaga.