Ads by Google Ads by Google

LA’A UMA A MAKOU KUPE GA KAIKIPI

TOMUMUMU LE TO'ATELE O LE 'AU PIKI SIAKI LAFOGA

Na tomumumu ni isi o le 'au piki lafoga ina ua latou va'aia i a latou siaki le tele o se vaega tupe ua tipi 'ese, ona o le tau fa'apaleniina lea o le lafoga e 2% lea sa tatau ona tipi mai latou totogi i le tausaga na te'a nei.

E tomumumu lava le isi fafine i le sui o le Samoa News ao u'u lana siaki ma fai mai, “O legei e le koe akoa se kau o se 'apa susu i legei kupe e kokoe, ua le iloa la po o fea o le a sulu i ai kagaka pe afai o le faiga legei o siaki e fai a ma kipi e le malo.”

E to'atolu isi tagata faila lafoga na mafai ona fesiligia e le Samoa News i le fa'afitauli ua tula'i mai, ona sa matauina le suia o latou foliga ina ua o latou taulimaina a latou siaki mai le ofisa o lafoga.

“Ou te le musu e fa'ailoa lo’u igoa, pau la’u fa'asea, o lea ua fa'aaoga e le malo le 'auala lenei e tipi ai la’u siaki, ae sa tatau ona latou sa'ilia se 'auala e ao mai ai le tupe lenei, pe fautua fo'i i kamupani ma pisinisi tua, e o'o fo'i i ofisa 'ese'ese a le malo e togitogi atu tupe i totonu, nai lo le fa'aaoga o la’u lafoga e tipi atoa mai ai le $243 sa ou nofo  'aitalafu ai i le malo,” o le tomumu lea a le ali'i o Fagalilo Amituana'i,o se tama e 42 tausaga mai Tafuna, ae galue i se tasi o kamupani fau fale i le atunu'u.

O le lagona fo'i lea o le isi tama na tu'uina mai i le Samoa News ina ua ia taulimaina lana siaki e silia i le $200 le tupe ua tipi 'ese mai le tupe sa fa'aali atu na te mauaina.

O ni isi tagata e le'i fia talanoa mai i le Samoa News ina ua taumafai e fesiligia i latou, se'i vagana ai lo latou tali mai e fa'apea, “o lo o aofia ai fo'i makou i le ma’i lega, ae o le a sau mea e mafai ga koe fai e koe fa'afo'i mai ai makou kupe ua kipi?”.

E le'i mafai e le Samoa News ona fa'amalieina fesili ma mana'oga e pei ona fa'atula'i e ni isi o tagata, se'i vagana ai le taumafai e fa'amanino le 'auala na ta'ua e le Pule o le Ofisa o Lafoga ia Melvin Joseph o le a fa'aaoga e le malo ina ia maua mai ai le tupe sa tatau ona totogi e tagata faigaluega, ina ua fa'atoa pasia le pili lenei e fa'aopoopo ai le lafoga e 2% i luga o totogi i le tausaga na te'a nei.

E leai se vaega o siaki na maua ananafi se'i vagana ai le vaiaso fou lea ua fa'amaonia mai e le Ofisa o Lafoga o le a maua ai siaki mo tagata faila lafoga.

Na ta'ua e le isi ali'i e faigaluega, e leai se alofaga o tagata faigaluega mai le le totogiina o le lafoga 2%, pe afai e le'i totogiina e le fale faigaluega, aua o le i'uga lava lea o le tipi mai e le Ofisa o Lafoga.

Na ta'ua e Melvin e fa'apea, o tagata faigaluega uma lava ia e le'i totogiina atu a latou ta'i 2% mai le lafoga na pasia i ulua'i masina e fa o le tausaga na te'a nei, ua fa'amoemoe le ofisa o lafoga o le a tipi mai i le taimi e maua ai a latou siaki o lafoga toe fa'afo'i, ma o se fa'ai'uga na le fiafia ai se tasi o tina tipi lafoga.

“E le sa’o le fuafuaga lea, fai mai le tulafono na pasia, o le 2% e tipi mai i le totogi a le tagata faigaluega, ae le fa'apea e tipi mai i le siaki o lana lafoga toe  fa'afo'i, e tatau ona fa'amanino e le malo tulaga ia ina ia aua ai nei toe tula'i mai ni isi fa'afitauli i le lumana'i,” o le fa'amatalaga lea a Epenesa Leatigaga ina ua fesiligia e le Samoa News.

“Sa i ai isi fuafuaga a le aiga sa fa'amoemoe ai i le siaki o le lafoga toe fa'afo'i pe afai e maua mai, peita'i o lea ua misi atoa ina ua alu atu le isi vaega tele o la’u siaki e totogi ai la’u 'aitalafu i le malo,” o le saunoaga lea a Epenesa.

Na ta'ua e le faletua e fa'apea, e le tete'e i le tipiina o le lafoga 2%, peita'i o le itu sa tatau ona fai e le malo, e le tatau ona tipi atoa mai se vaega tupe tele fa'apea mai tupe a tagata, ae tatau ona tipi auaua’i.