Ads by Google Ads by Google

KRUSE: Aisea e sosola so’o ai i tua pagota

I le tele ai o taimi e faasala ai e le fa’amasinoga maualuga ni pagota e ta’usala i le moliaga o le sosola i tua mai le toese ao tuli ai a latou faasalaga, o le vaiaso na te’a nei na faatoa fesili ai le alii faamasino sili ia Michael Kruse i le fesili lenei, “Aisea e sosola soo ai i tua pagota.?”

 

Ua atulasi ona tulai soo mai lea faaletonu, ma o ni isi o taimi e sosola ai pagota, e tula’i mai ai ma ni faalavelave e aafia ai le saogalemu o tagatanuu lautele, e pei o le faalavelave lea na tulai mai i Vailoa i le tolu tausaga talu ai, ina ua sosola ni alii pagota se toalua, ma la ave faamalosia ai se taxi, ae fasi le avetaxi.

 

Na taua e Kruse i le aso na lau ai le faasalaga o nei alii pagota, o le gaioiga na la faia i le ave taxi, ua le mafai ai ona toe faigaluega lea ave taxi, aua se tupe e tausi ai lona aiga, a ua feagai nei o ia ma se manu’a tuga tumau i lona olaga atoa.

 

O ni isi o mafuaga e sosola ai pagota e pei ona taua i faamaumauga a le faamasinoga, o le le lelei o meaai i le toese, sosola e fia vaai i le aiga, poo le sosola foi e faatino ni solitulafono.

 

Ae mo alii pagota o Derek Ropati ma Pouniu Liu, lea ua tausala i le moliaga mamafa o le sola ese ma le toese, ona o le faalavelave lea na tulai mai i le masina o Aperila 2011 ao tuli a laua faasalaga i le toese i Tafuna.

 

Ina ua fesiligia e leoleo Ropati ma Liu i le mafuaaga o le la sosola ese ma le toese, na faailoa ai e Liu i le leoleo e faapea, ua ua le lava tuli lona faasalaga faafalepuipui, ae o Ropati na mafua ona sola ese, ua le lava ai i meaai mafu o lo o fafaga ai latou e leoleo.

 

Na faatoese nei alii pagota i le faamasinoga ma le malo o Amerika Samoa faapea le pule o le falepuipui ona o le ta’uleaga o lona igoa i le gaioiga sa la faia, atoa ai ma leoleo na tigaina i le tau su’eina o i laua.

 

Na talosaga Liu i le faamasinoga i se avanoa e mafai ai ona tuli faatasi lana faasalaga o lo o tuliina nei, ma se faasalaga ua manatu le faamasinoga e faasala ai o ia i lenei mataupu.

 

Saunoa Kruse e faapea, o tala tuai lava nei o lo o faalogo ai le faamasinoga mai alii pagota nei i le taimi e sosola ai, ma o se mataupu ua tatau ai i le Ofisa o le Loia Sili ona talanoa ma le Komesina o Leoleo, ina ia sailia se auala e foia ai le toe tulai soo mai o lenei faalavelave o pagota sosola, aemaise ai, ua tatau ona i ai ni suiga i le toese i Tafuna, e pei ona saunoa tuusa’o ai Kruse i le loia a le malo o Julie Pasquale.

 

Na faailoa e Kruse ia Liu e faapea, o se taimi muamua lenei ua talosaga atu ai se pagota i le faamasinoga ina ia tuli faatasi lana faasalaga.

 

“E le o se taimi muamua lenei ua lua sosola ese ai mai le toese, ma ua manatu ai le faamasinoga, o le faatele ona oulua faia o lenei solitulafono, ua tatau ai ona oulua faalogo i le upu o le ‘tuli eseese’ ae le o le upu o le ‘tusi faatasi’ o a oulua faasalaga,” o le isi lea saunoaga a Kruse ma ia faasala ai loa Ropati ma Liu i le ta’i 5 tausaga i le toese, ma o lea faasalaga faatoa tuli pe afai ae maea ona tuli a laua faasalaga o lo o tuliina i le taimi nei.

 

I faamaumauga a le faamasinoga o lo o taua ai e faapea, o le faatolu ai lea ona sola i tua Ropati mai le toese i Tafuna ae faalua mo Liu.