Kruse: “Sili atu matuia o se mea tupu pe ana fa’a a’upega Leoleo”

Na taua e le afioga i le ali’i fa’amasino sili ia Michael Kruse i le aso na lau ai le faasalaga o le ali’i o Afa Te’o, ana faapea ua aloaia i le taimi nei le fa’a a’upegaina o leoleo e pei ona taumafai i ai le Komesina o Leoleo, semanu faapenei e le nofo i totonu o le potu fa’amasino le alii o Te’o mo le lauina o lona fa’asalaga,

 

O se tasi lea o vaega o le saunoaga a le afioga i le alii faamasino sili i le taimi na ia fofogaina ai le faasalaga a Te’o, ina ua ta’usala o ia e se vaega iloilo iuga i le solitulafono mama o le faatupu vevesi i nofoaga faitele.

 

Saunoa le alii faamasino sili e faapea, o se tasi o vaega e le i nofo lelei i finagalo o alii faamasino i le taimi na faagasolo ai le iloiloina o lenei mataupu, e foliga mai sa i ai se tulaga le malamalama o leoleo sa molimau e faatatau i le tulafono, ae faapea fo’i i loia na tutula’i mo itu e lua o lenei mataupu.

 

Na taua e Kruse e faapea, e foliga mai e le i malamalama leoleo i le gaioiga tonu e ao ona latou faia ina ua tula’i mai le fa’alavelave i le aso lea.

 

“E foliga mai, ina ua aga’i atu leoleo ma le talitonu o se vevesi o lo o tupu, ae ina ua latou taunuu atu sa latou iloa ai ua maea le vevesi, e leai fo’i se isi o i latou na vaaai i le faalavelave sa tupu, na manatu ai loa ni isi o leoleo ua leai se isi gaioiga e tatau ona latou toe faia,” o se vaega lea o le saunoaga a Kruse e tusa ai o faamaumauga a le faamasinoga e uiga i le aso na lau ai le faasalaga a Te’o.

 

I le aso o le faamasinoga e pei ona saunoa Kruse, na fesili ai le loia a Te’o i leoleo sa molimau, pe sa i ai se poloaiga a le faamasinoga na o ma latou e taofia faapagota ai le ua molia, ae pe sa i ai fo’i se malosi e mafai ai ona latou taofia faapagota le ua molia, ma e le i iloa e leoleo sa molimau pe faapefea ona tali atu i le fesili a le loia.

 

Na taua e le faamasinoga le faaleaoga a le malo i le moliaga sa faia faasaga ia Te’o, o lona tete’e lea i leoleo i le faatinoina o a latou tiute.

 

Na taua e Kruse e faapea, sa faalavelave le ua molia i galuega a leoleo sa faatinoina i le aso lea, ae na taua e Te’o i lana molimau, sa ia faia le mea sa’o.

 

“O gafea e mafai ai ona ia fai i leoleo o lo o ia faia le mea sa’o? O gafea fo’i e mafai ai ona ia fai i fa’amasino sa ia faia le mea sa’o? O fea le aoga loia sa aoga ai?” o ni isi ia o vaega o le saunoaga a le alii faamasino sili.

 

Na toe faatepa e Kruse loia i se tasi o faafitauli o lo o maitauina pea i le atunuu i le taimi nei, i fusuaga a fanau aoga o lo o faaauau pea, ma o se tasi o faafitauli o lo o mafua ai ona tupu soo mai vevesi, e le o malamalama leoleo po o le a tonu la latou vaega e fai.

 

“O lea na finau mai le itu tete’e i se tasi o faafinauga pito tele fai mai, e leai se isi na taofia faapagota, ma ua manatu ai e faapea, afai e leai se isi na taofia faapagota, lona uiga e leai se solitulafono sa faatinoina,” o le saunoaga lea a Kruse.

 

I le silasila a alii faamasino i le ata atoa o le mea sa tupu, e tasi lava le tagata sa mafai ona faaaoga lona mafaufau e pei ona saunoa Kruse, o le alii leoleo sinia sa i ai i le taimi lea, ina ua ia tula’i ma fai lana faatonuga i leoleo ma faapea atu i ai, “toe fo’i mai sei tatou talatalanoa laititi e faatatau i le mataupu lenei....”

 

Na taua foi e le alii faamasino sili e faapea, faamata ana faapea e faaaupegaina leoleo i le taimi lea, e pei ona taoto ai le taumafaiga a le komesina o leoleo ina ia faaaupega leoleo, o le a se mea e tula’i mai i lea aso.

 

Na faaiu lana saunoaga i lea faapea atu, o se tasi o itu o lo o atugalu i ai le faamasinoga, o le faanaunauga o le alii komesina o leoleo e faa aupega leoleo i le aso lea, atonu e faapenei e le o nofo mai le ua molia i totonu o le potu faamasino mo le lauina o lona faasalaga.

 

E 6 masina lea ua faasala ai e le faamasinoga maualuga i le falepuipui le alii o Afa Teo, faapea ai ma le salatupe e $500, ina ua ta’usala o ia e se vaega iloilo iuga i le moliaga mama o le fa’atupu vevesi i nofoaga faitele.

 

O Te’o na ulua’i tuuaia e le malo i moliaga mamafa e lua e aofia ai le faaoolima i le tulaga lua ma le faalavelave i leoleo faatino a latou tiute, atoa ai ma le moliaga mama o le faatupu vevesi i nofoaga faitele.

 

Ae ina ua mae’a le fa’amasinoga autu a Te’o sa faia i luma o tagatanuu o Amerika Samoa, na solofua ai e le vaega iloilo iuga le moliaga mamafa o le faaoolima i le tulaga lua, solofua e le malo le isi moliaga mamafa o le faalavelave i galuega a leoleo, sei vagana ai le moliaga mama o le faatupu vevesi i nofoaga faitele na ta’usala ai o ia e le vaega iloilo iuga.

 

O lea moliaga ua ta’usala ai Te’o na afua mai i se faalavelave na tula’i mai i le tausaga na te’a nei, ona o le faalavelave lea na ia tau taina ai le leoleo i se tala pa’u, a’o aga’i atu leoleo e faato’a filemu se vevesi sa aafia ai le ua molia.

 

O le alii loia fautua ia Doug Fiaui na tula’i mo Te’o ae o le alii loia sili lagolago ia Tony Graf na tula’i mo le malo i le mataupu lenei.

 

Comment Here