E fa’apefea ae fetoi tagata

Tina ua gasegase i le ma’itaga

Le au fa’amama toto ua alalaga

Tagata matutua ma le au toto masa’a

O fea a sulu i ai i le fia ola

Oe ua mama’i ma fai ta’otoga

Le falema’i i Faga’alu ua tele le ova

I si’itaga ua fai ma le le alofa

Fai mai le pulega e leai sau fe’au

E pisa ai fua pe tauanau

O le si’itaga o pili o le’a fai pea

Se falema’i ina le migao ma le kea

O ai ea nei tagata o pulea le LBJ

Ni ali’i mai o po ’o se vaega i ga’igei

Tafefe ua fai ma le leai o se utaga

Aunoa se alofa, le talia fautuaga

O le fesili, a si’i pili e i ai ni suiga

I foma’i ma togafitiga

E leai, o foliga leva a nei

A tau malua mai pei o se laumei

O le’a su’e au tou tupe i ola oe mama’i

Ae tatau ona sa’ili se isi lavea’i

Le malo o Kovana Togiola e le popole

Ua malosi le pipi’o ma le tala ‘o’ole

Le Fono Faitulafono i ona maota e lua

Le ita o tagata ua tau i le ua

Na’o le pisa o faipule ma Senatoa

I tupe mo le LBJ ae na’o le fuamoa

A fa’atino le si’i o pili a le Falema’i

E mautinoa le nonofo o le ‘au mama’i

I o latou fale e tatali ai le vala’au mai luga

Ua le gafatia vaila’au ua faitau selau tala

Kovana Togiola ma le Fono i ona maota

Saga’i maia e  fofo fa’atasi le pologa

O ou tagata nei ua tagi atu mo se avea’i

Tu’u ‘ese le polokiki ae sa’ili se lumana’i

Le muagagana a Samoa e fai i le aitu o le tagata

A sese le tu’ugamau e fa’asoesa lona agaga

E alu ma le ita talu lo outou fa’atamala

Kovana ma le Fono, o le oti i nu’u ‘ese e ta’a ma sasala