Ona o le Kamupani Suau’u a le British Petroleum sa i ai fo’i se vaitaimi na latou tautuaina ai le tatou nei malo e ala i le sapalai o le suau’u ma oloa tau suau’u, ae o lea ua fa’ailoa mai, i le taimi nei, ua taofia nei e le Malo o Amerika i ona setete ma ona teritori ona toe fa’akonekarateina  le BP mo ia sapalai. O le fa’asalalauga ua fa’alauiloa mai e le Associated Press ina ia utagia e setete ma teritori uma o Amerika.

O lenei fa’ai’uga, ua mafua mai le lipoti na taua’aoina e le USEPA. E le o mailoa po’o le a le umi e taofia ai le BP mai le toe sainia o ni Konekarate ma so’o se vaega o Amerika. Ua mautinoa o lea fa’ai’uga ua afua mai le tele o mea e tutupu mai e a’afia ai lava va’a suau’u a le BP lea na pa, ua fa’atautaia su’esu’ega mae’ae’a a le EPA ma fa’asalaina ai i latou i le tausaga 2010. O le suau’u masa’a, ae ese ai le pa o le va’a ma maliliu ai le 11 tagata i le Gulf o Mexico na fa’ailoa mai e $14piliona le tinoitupe fa’aalu a le BP e taumafai fa’aleleia ai lea fa’alavelave.

O le taofi lea ua i ai nei, e fa’amautinoa ai ua va’ai toto’a le BP i a latou galuega fa’atino ma ala o latou auaunaga po’o aiaia e tusa ma tulafono a le feterale, aua e iloga mai, o lo’o tele mea o sasi, ma afua ai le tele o fa’alavelave matuia talu mai ona tu’uavanoa atu pea i ai le Feterale e toe fa’asa’o ai nisi sasi ogaoga. O le fa’asalaina o i ai le BP ua fa’ailoa mai e le EPA, o mea lava e tatau ona faia, pe a matauina e i latou, ua solitapula’a so’o se kamupani suau’u.

I le taimi nei, ua na’o ni konekarate fou e toe sainia ma fa’afou e le toe mafai ona faia, ae o nisi o konekarate o lo’o fa’aauau pea se’ia mae’a le taimi atofa e galulue ai le BP e tautua Amerika. O se fa’amatalaga lea mai le BP ma le EPA fo’i.

Peita’i, ua mautinoa e i tatou ua tulata fo’i i le taimi e fa’afouina ai Konekarate o Kamupani Suau’u e tautuaina Amerika Samoa, e tauofo uma lava Kamupani Suau’u o mafai ona tautuaina setete ma Teritori. E mautinoa lava e le tatau ona fa’aulu maia se ofo a lea Kamupani Suau’u i la tatou tauofoga i lenei tausaga mo le tausaga fou.

Ina ua talanoa atu i se sui iloga o le Pacific Energy i Gataivai, sa ia fa’ailoa mai, “E moni sa i ai le BP i ni tausaga ua mavae i tauofoga fa’apenei, ae le o i ai i le tausaga nei i Kamupani e Lua o lo’o aumaia le Suau’u ma Oloa tau Suau’u i totonu o Amerika Samoa. O lo ua mae’a fa’aulu fo’i le matou ofo, le Pacific Energy lea o lo’o latou fa’atautaia le Lotoa o Tane Suau’u i Gataivai, ma sapalaia le isi vaega o le suau’u ma oloa tau suau’u o le atunu’u.

O le lona lua o Kamupani Suau’u lea e tautuaina le atunu’u o le Mobile Oil, ae o lo’o avea le ASPA ma latou Kamupani e kilivaina le suau’u ma va’aia fefa’ataua’iga i le tatou malo nei. Ua le mautinoa nei, pe toe fa’aulu se ofo a le ASPA-Mobil Oil i lea fo’i Konekarate o le Suau’u mo le tausaga fou.

Peita’i, ua fai si tele na’ua o afaina o lo’o feagai ma le BP i le taimi nei, aua sa pa fo’i le va’a suau’u tele a le BP ia Aperila 2010, ma e 11 i latou na maliliu ai, ae 36 itula o mu pea lava lea va’a ae le’i magoto ane i le alititai, ma o lea lava e le’i mae’a ave’esea mai.

E ese mai le tele o latou mea sese, ae ua matauina e tusa ma le $52piliona le sao o le BP i totonu o le tamaoaiga o Amerika, ae ese ai ma le silia ma le $14piliona le isi vaega tupe ua fa’aopoopo mai i totonu e tau totogia ai nei fa’aletonu fa’aletulafono. Ona o lea tetele o pili, ua iloga ai e numera tasi le BP i lana tautua ia Amerika e ala i le sapalai o le suau’u ma oloa tau suau’u.

Ua fa’ailoa mai fo’i, o le BP fo’i lea e tusa ma le $1.35piliona lana konekarate mo le Pulega o Vaega Au ma le Saogalemu o Amerika i le tausaga e 2011.

saunia: Leua Aiono Frost