Ata o le Kalena: Fa’atatau i le Suiga o le Tau ma ona a’afiaga i le Siomaga!

O le taeao o le Aso Faraile, Fepuari 10, 2012 na fa’atasia ai i latou na fa’amanuiaina a latou ata na tusia ma vali e avea ma ata o masina ta’itasi o le Kalena o Masina a le Western Pacific Regional Fishery Management Council [WPRFMC], lea o lo o gafa ma le Matagaluega o le Vaomatua ma le Gataifale.

O lenei tauvaga sa aofia ai vasega mai i le K5 se’ia o’o i le Vasega 12. O i latou na avea ma fa’amasino, na aofia ai Moira Avapalu Fetuao ma Tumua Lokeni o le ASEPA. Trevor Kaitu’u o le ASCoral Reef Advisory Group; Lusila Minoneti, Sa’opapa Taifane ma Maria Vaofanua o le DMWR.

O le tauvaga tusiata lea sa taulia uma le fanau e afua mai le Level K -Level 2, soso’o lea ma le vaega o le fanau e Level 3 se’ia o’o i le Level 5; soso’o ma le vaega lona tolu o le Level 6 i le Level 8, ae mulimuli ai le Level 9 - Level 12 i A’oga Maualuluga i le tatou atunu’u lava.

Ia i latou na fa’amanuiaina ua va’aia ai le muamua mai i le Masina o “Toeutuva” o Ianuari, o se ata na tusia e Kujon Bae mai le Manumalo Baptist School i le vasega 3 ma na tulaga lua ai lana ata i le vaega o le Level 3 i le Level 5.

O le ata lona lua i le fa’asologa o le Kalena o Masina mo le Masina o “Fa’aafu” po’o Fepuari lea i Kalena masani, ua tula’i mai ai le ata matagofie na tusia e Saiata Fila mai le a’oga maualuga a Samoana, ma o le tulaga muamua lea i le latou vaega Level 9 - Level 12.

O le masina lona tolu o le “LO” ma ua fa’aigoaina lea masina o le Lo, ona e a’e ai le i’a o le LO i Samoa atoa. O le sui na maua le ata o le masina lea o Finiana Finau mai le Coleman Elementary i Pago Pago, ma o ia na tulaga tolu lana ata lea i le vaega a le Level 6-8.

O le masina lona fa e fa’aigoaina o “Aununu.” O lea masina e nunu ai le to’au o Ufi. O le tuaoi o timuga ma mugala i le tatou si’omaga. O le ata o lea masina na tusia lea e Gideon Finau mai Coleman Elementary mai le vaega a le Level K-Level 2. Na tulaga muamua lana ata lea i le latou vaega.

O le masina lona lima o le Kalena ua fa’aigoaina lea o “Oloamanu.” O lenei le vaitau e tausagi fiafia ai manufelelei, aua e maua ai fo’i le Atule i le gataifale i so’o se ituaiga o faiva e amata mai le Ofe se’ia o’o i le Lau a le Nu’u. O le ata na tusia e Joshua Finau mai le Samoana High ma e tulaga lua lana ata lea i le vaega a le Level 9 -12, na fai ma ata o lea masina.  Pe a o’o ina a’e le atule lea i se afio’aga, ae maise i Fagasa, e le fa’atauina i aso ua mavae. O aso o lea vaimasina e afua mai i le aso 21 o Me se’ia o’o ia Iuni 19 o lenei tausaga.

O le masina lona ono o le Kalena o Masina ua fa’aigoaina o le “Palolomua.” O le vaitau lenei e papa ai fatu o la’au, ma e matalatala ai fuga o la’au. O le ata o lea masina na tusia lea e Jenny Liang mai Manumalo Baptist School, ma sa tulaga muamua lana ata lea i le latou vaega Level 3-5. O lea tama’ita’i sa matua i ai e talia lona fa’ailoga i lea taeao.

O le masina lona fitu o “Palolomuli” lea ma ua fa’ailoa mai e matalatala mulimuli ai fuga o la’au, ae o le va’aiga i le gataifale, ua fa’ailoa mai e matele ina va’aia ai le i’a o le “I’amanu” [WHALES] ma ua fautuaina le au fagogota ia to’aga e fagota i le Tai Sua. O le ata o lea masina sa tusia lea eCandymichael Safune mai le Manumalo Baptist School ae na tulaga lua lana ata i le vaega Level K - Level 2. O aso o lea masina e afua mai le aso 19 Iulai se’ia o’o ia Aukuso 17 o lenei tausaga.

O le masina lona valu o “Mulifa” ma ua iloga lea vaimasina i le vaitaimi o mugala ma ua afu tele ai meatoto pe ua matua lelei ai fua o fa’aeleeleaga. Peita’i i le gataifale e tele na’ua ai le Masimasi i le toso, ma e fa’apena fo’i ona maua ai i faigafaiva fa’atauva ae o le i’a lava ina lelei le a’ano mo le oka. O le sui na tusia le ata o lea masina o Joe Paselio mai le a’oga maualuga a Samoana, ma na tulaga tolu lana ata lea i le vaega Level 9-12.

O le masina lona iva o “Lotuaga” ma e iloga i le toe amata ai le vaitau o timuga ma uaga. O le fa’ailo fo’i lea i le mua’i taga o le Palolo i le gataifale. O le sui na manumalo i le ata o lea masina o Filifili Su’a mai Pavaiai Elementary  ma na tulaga muamua lana ata mai le vaega Level 6-8. O aso o lea masina e afua mai Setema 16 se’ia o’o ia Oketopa 15 o lenei tausaga.

O le masina lona Sefulu o “Taumafamua” ma e iloga ona tele ai le Malau i le gataifale, ma e tele ai lava meataumafa i le laueleele aua ua matua mai ai fua o fa’aeleeleaga e ao ina fa’aaogaina. Mai le gataifale fo’i, e mua’i taina ai le Palolo i tausaga ta’itasi. O le sui na manumalo i le ata o lea masina o Johnny Su’a mai Pavaiai Elementary ma na tulaga tolu lana ata lea i le vaega Level 3-5. Ua fa’ailoa mai fo’i e matua momoga ai fo’i tuitui, vaga, tugane ma figota o le sami i lea vaitau.

O le masina lona 11 o “Toetaumafa” ua fa’ailo lea i le fa’ai’ui’u ai ona fa’aaoga taumafa o le masina na muamua atu, ma e fa’apea fo’i ona toe taina ai le palolo i le gataifale, ae o le Atu le i’a e a’e tele i le gataifale i le vaitaimi lea, ma ua fai mai nisi, e tele ai fo’i le igaga. O le sui na manumalo i le ata o lea masina o Leasuone Vaeoso mai le Coleman Elementary i Pago Pago, ma na tulaga tolu lana ata i le vaega Level K -Level 2. E amata mai aso o lea masina ia Novema 14 se’ia o’o ia Tesema 13 o lenei tausaga.

O le masina lona 12 o le Kalena o Masina o “Utuvamua” ma ua iloga i fa’ato’aga, e ao ina elia ai ufi vao a’o le’i o’o i le taimi e afu ai ufi toto. O le taimi lea i le gataifale e maua ai le Sa’ula Oso i faiva o le Toso. O le sui ua manumalo i le ata o lea masina o Zachary Polu mai Pavaiai Elementary  ma na tulaga lua lana ata lea i le vaega Level 6-8. O aso o lea masina e afua mai ia Tesema 14 se’ia o’o ia Ianuari 11 o le tausaga 2013.

O lenei kalena o se tasi lea o mata’aga ua saunia mo le fonotaga a le WPRFMC ia Iulai 17-20, 2012 e tauaofia lea i Uosigitone DC, ma e talosia fo’i ia aoga lea galuega tele e fa’ailo ai le feso’ota’iga mautu i le va o le laueleele ma lona gataifale, ma lona a’afiaga ua i ai nei, ona o le suiga tele i le tau o le lalolagi atoa.