Ads by Google Ads by Google

Joe Neru Tolo, sui tauva polokalame TV o le ‘VOICE”

Ua fa’asalalauina mai i alaata televise ma feso’ota’iga i upega tafa’ilagi le sao o Joe Neru Tolo mai Malaeloa ma Afonotele, i le tauvaga pese lauiloa i Amerika, le VOICE, lea e pu’e mai i le Universal Studio i Los Angeles.

 

Faailoa mai e le tama o lea alo o Amerika Samoa, le susuga Tolo Tolo Jr. o Malaeloa, i le Samoa News e faapea, “O se mea uiga ese le tu e tatalia le taumafaiga a le atali’i, ae maise fo’i la’u fa’alogo i o’u tino i le taimi ua pese ai o ia! E ese fo’i lagona sa o’o mai, ua vaivai ane ai ma le loto.”

 

I le fa’amatalaga a Joe Tolo i luga o le televise a’o le’i faia lana pese, sa ia fa’ailoa ai, “O a’u o le ui’i o le fanau e to’avalu a o’u matua, ma e le’i faigofie fo’i ia te a’u ona ou malamalama, pe aisea ua toe taliu ai i fanua le malaga a lo’u tama, a’o o’u itiiti, ina ua matou o’o uma mai i Sacramento, Kalefonia i latou uma ma lo matou tina ma fa’amautu ai le aiga.

 

“Peita’i, o lo’u fiafiaga tele, ina ua mafai ona auai mai lo’u tama i la’u taumafaiga amata i le Voice 2015.”

 

O lana pese fo’i na piki mo lana taumafaiga lea, o le fesili, “Pe afai e te Alofa i se Tasi,” e atagia ai lona lagona fa’aalia, ma o se pese na matua si’i lava e ia nisi nota e usuina ai, ma maofa ai le vasega o fa’amasino o le tauvaga pese.

 

O Joe N. Tolo sa soifua a’e lava i Amerika Samoa, peita’i, o lona fa o ona tausaga, sa masi’i atoa ai loa le latou aiga i Kalefonia, ma sa fa’apea fo’i ona amata ai ana a’oa’oga i vasega amata e o’o lava i lana High School i Sacramento.

 

A’o fa’aauau ana a’oa’oga i le kolisi i Sacramento lava, ae tau ane ai o ia i pepa talosaga mo se avanoa e tauva ai i le Boot Camp Singing Contest ma oso  ai loa i lena avanoa. O i’ina sa ia mauaina ai le tulaga muamua i le itu atoa o Northern California. O lona ala lea i le tauvaga o lo ua auai ai nei, ma tapena ai lona sao e toe fa’ailo lona tupuaga o Amerika Samoa.

 

I se fa’amatalaga a le tama sa ia fa’apea ai, “Pau le mea ia vi’ia le Atua i se mea ua o’o i ai le taumafai a le fanau, ia sili fo’i ona aoga le leo o Joe e pese ai i vi’iga o le Atua ae le o nei ituaiga o tauvaga, aua e i ai lava le taimi e sasi ai fa’aiuga e faia e le tagata, ae o le Atua ia, e fa’amasino tonu mai lava i taimi uma!”

 

Ina ua fesiligia o ia, i sana toe upu i si ona atali’i, ma o lana tali mai, “E tasi lava le mea na toe fa’atepa i ai le atali’i, ia fai le mea sili ua o’o i ai lona leo fa’atasi ma lana taumafaiga, ae o isi mea uma e faia le fa’ai’uga e le Atua, afai lava e le pale, aua le popole, e tele isi fuafuaga a le Atua e toe aofia atu ai fo’i o ia mulimuli ane. O nei mea uma, e le popole ai le tagata o le Atua.”

 

Sa auai le tama ia Tolo Jr i le taimi o le tauvaga pese i Los Angeles ma sa toe taliu mai i le teritori i le aso Gafua ua te’a atu nei. O le vaiaso ua te’a sa pu’e ai le tauvaga ae sa faasalalauina i Amerika Samoa i le po o le aso Lua, lea sa va’aia ai le tama o fa’atasi ma lona atali’i ma le aiga atoa i Los Angeles, ma sa toe fiafia lava o ia e maimoaina le polokalama ae ua o’o mai o ia i’inei.

 

 “Ua toe tau fa’atep’a fo’i a’u i tua i na taimi o eva ane i laufanua o Los Angeles,” o sana tala ata lea e tusa o lana maimoaga i le televise i inei.