Ads by Google Ads by Google

James Aulava sailiina o se Manaia o AmSam

Na manumalo le susuga a James Aulava i le tauvaga e sailia ai se Manaia a Amerika Samoa, po o le ‘Mr. American Samoa’ e pei ona lauiloa ai le tausaga, lea na faia i le po o le aso Tofi na te’a nei i le Fale Laumei i Utulei, i lalo o le fa’atautaiga a le Fa’alapotopotoga a Fa’afafine i Amerika Samoa, le ‘SOFIA’.

 

O le tauvaga e pei ona tausinio ai taulele’a lalelei o le atunuu e to’a 8, na faaautu lea i auala e fa’alauiloa ai lapataiga mo le puipuiga o le gasegase o le fatu ga’o, atoa ai ma auala e puipuia ai Amerika Samoa mai le gasegase o le fa’amama toto.

 

Na fa’atumulia le maota o le Fale Laumei i Utulei i uo ma aiga, aemaise i latou sa lagolagoina ali’i lalelei e to’a 9 na tausinio i le ulua’i tauvaga e sailia ai se Manaia a Amerika Samoa, i lo latou lolofi atu lea e fia molimauina lenei tauvaga mataina.

 

E tolu vaega sa vaevaeina i ai le tauvaga, ma sa maitauina ai le mataina o le maimoa a le atunu’u i le lava tapena o ali’i na auai i le tauvaga, ma o ni isi o a latou gaioiga sa maua ai fo’i le ata a le au maimoa.

 

O se tasi o vaega sa lu’itauina ai ali’i na auai i le tausaga, o le fesiligia lea o i latou i ni o latou finagalo e tusa ai o ni auala e tatau i le atunuu ona faia ina ia puipuia ai i latou mai le aafia i gasegase e pei o le fatu ga’o aemaise ai o isi gasegase lea e i’u atu ai i le fa’amama o le toto.

 

Na taua e ni isi o i latou le tatau lea i le atunuu ona toaaga e faamalosi tino, tausami i taumafa paleni, ma ia tau mamao mai ituaiga taumafa e tele ai le ga’o ma le suka.

 

Na taua e se tasi o ali’i talavou le tatau lea ona toaaga tagata Amerika Samoa e koleni pe ta’i 30 minute i le aso, ti’eti’e uila pe aau fo’i.

 

O ni isi o vaega na asia e le au tauva i le vaiaso na te’a nei ao lumanai ai le tauvaga, o le latou asia lea o le fale fa’amama toto i le falema’i o le LBJ i Fagaalu, lea na latou taua ai le fa’amomoi loto o le vaaiga sa latou maitauina, i tama ma tina matutua ua faamama o latou toto, e oo lava fo’i i fanau laiti.

 

O le agaga o le faalapotopotoga a le SOFIA e pei ona latou lagolagoina ai lenei tauvaga, ia mafai ai ona faalautele atu lapataiga ma ta’iala mo se soifua maloloina mo Amerika Samoa.