Ioe se ali’i na ia sasa foliga lona tuafafine i le samala

O le ali’i mai Pago Pago lea na tu’uaia e le malo i lona fa’ao’o o manu’a tuga i lona tuafafine, e ala i lona sasa o ona foliga i le samala, ua ia ta’utino i le fa’amasinoga i le aso Tofi na te’a nei e fa’amaonia tu’uaiga fa’asaga ia te ia.

 

I le tali ioe ai o Harry McCarthy i le moliaga mamafa o le fa’ao’olima i le tulaga muamua, i lalo o se maliliega na latou sainia ma le malo ma talia e le fa’amasinoga, sa ia ta’utino ai e fa’apea, i se taimi o le masina o le amataga o le tausaga nei, sa ia faaoo ai manu’a i lona tuafafine ina ua ia fa’ao’olima i ai.

 

Na fesili le ali’i fa’amasino sili lagolago ia Lyle L. Richmond i le ali’i ua molia, pe na fa’apefea ona ia fa’ao’o manu’a tuga i lona taufafine, ae na tali le ua molia, sa ia fa’aaoga le samala e sasa ai ona foliga, e mafua mai ina ua ova tele lona ‘ona.

 

Sa ia taua fo’i e fa’apea, e leai se fa’amoemoe ia te ia e fa’ao’o manu’a i lona tuafafine, peita’i o le fa’alavelave sa tupu, o se mea na tupu fa’afuase’i e le i mafaufauina.

 

E tusa ai o vaega o le maliliega a le ua molia ma le malo, sa ia tautino ai e fa’apea, i le aso na tula’i mai ai le fa’alavelave, sa tula’i mai ai se feeseeseaiga i le va o ia ma lona tuafafine, ma i’u i lona fa’ao’olima ai ia te ia, e ala i lona fa’aaogaina o se samala.

 

O ata sa tu’uina atu e le itu a le malo i le loia a McCarthy e tusa ai o manu’a na a’afia ai le tama’ita’i na a’afia i lenei mataupu, sa manino mai ai tulaga matuia o manu’a na a’afia ai le isi ona fofoga.

 

Ua sauni loia e finau i le fa’amasinoga mo se fa’asalaga feololo mo le ua molia, peitai ua malamalama le ua molia, tusa lava pe finau loia i le fa’amasinoga mo se fa’asalaga mama mo ia, e pule le fa’amasinoga pe talia pe teena ia fa’afinauga.

 

Ua ia malamalama fo’i, e le mafai ona toe suia lana tali ioe ua tuuina atu i le fa’amasinoga, pe afai e tuuina atu se fa’asalaga a le fa’amasinoga ae le tusa ai ma lona mana’o.

 

O le moliaga o le fa’ao’olima i le tulaga muamua, o se solitulafono A o le vaega o solitulafono mamafa, lea e mafai ona fa’asala ai se tasi i le toese mo le olaga atoa, pe fa’asala fo’i i le isi ituaiga fa’asalaga, o le taofia lea i le toese mo le umi e amata atu i le 10 tausaga ae le silia ma le 30 tausaga.

 

O lo o taofia pea le ua molia i le toese i Tafuna e fa’atali ai le aso 14 Me, 2014 lea ua fa’atulaga e le fa’amasinoga e fofogaina ai lana fa’asalaga e tusa ai o lenei mataupu.

Comment Here