O alii e toalua lea o loo tuuaia i mataupu eseese e lua o le faia lea o uiga mataga i ni tamaitai e laiti i lalo o le tulafono, ua la tautino i le faamasinoga e faamaonia tuuaiga faasaga ia te i laua.

O le alii o Siloma Siotalima na tuuaia i lona aveina o se tamaitai e 16 tausaga ma la nonofo i se tamaitai i lana maumaga i le tausaga na tea nei, ae o le isi alii o Faamanu  Aokuso sa ia tautino foi i le faamasinoga, e faamaonia tuuaiga faasaga ia te ia i se faalavelave na tulai mai i le masina o Oketopa o le tausaga na tea nei.

Na fiu le aiga o se teineititi e 16 tausaga e tau saili o ia poo fea ua alu i ai, peitai ao faagasolo pea sailiga, na maua mulimuli ane o loo nonofo ma le ula lenei o Siloma i luga o le ma’umaga, i le va o le masina o Iulai ma Novema o le tausaga na tea nei.

E 8 moliaga na uluai tuuaia ai e le malo le ua molia, ma o ia moliaga e aofia ai moliaga e 5 o le faiaiga ma se teineititi e laititi i lalo o le tulafono, tasi le moliaga o le faia o amioga mataga, tasi le moliaga o le tagofia o itutinosa o se tamaitai, ma le moliaga mama e tasi o le faia o gaioiga e ono lamatia ai le saogalemu o se fanau.

Ae i lalo o le maliliega lea ua saini e Siloma ma ua talia foi e le faamasinoga maualuga, ua ia ioeina ai le moliaga o lona faia lea o ni uiga mataga faafeusuaiga i se tamaitai e laititi i lalo o le tulafono.

I le tali ioe ai o le alii ua molia i lea moliaga, sa ia tautino ai e faapea, i le va o le masina o Iulai ma Novema o le tausaga na tea nei, sa ia faia ai uiga mataga i le tamaitai na aafia i se auala e le tusa ai ma ala o le tulafono.

Ina ua talia e le faamasinoga le tali ioe a Siloma, na solofua ai loa isi moliaga e 7 o loo totoe ai faasaga ia te ia, e pei ona talosagaina e le malo.

Ae o le alii o Aokuso, o ia o se alii fusu mai Samoa na malaga mai i le aufusu a Samoa, lea na tauva ma le aufusu a le teritori nei i le taamilosaga o le Mosooi i le masina o Oketopa o le tausaga na tea nei.

Ina ua maea le taamilosaga o le a toe foi le aufusu a Samoa, ae alia’e ai loa le mataupu e pei ona tuuaia ai Faamanu, i lona faia lea o ni uiga mataga i se teineititi e laititi i lalo o le tulafono.

Na tuuaia faatasi Faamanu ma le faiaoga o le au fusu a Samoa, susuga Lautapaa Wong King, peitai ina ua maea le uluai iloiloga sa faia, na toe faaui ai i tua moliaga mamafa faasaga i le alii faiaoga, sei vagana ai le moliaga mama o le faaoolima na ta’usala ai o ia, i lona pa’i lea i le tino o le tamaitai na aafia.

Ua toe foi atu nei i Apia le faiaoga o le aufusu a Samoa ma le tuutuuga a le faamasinoga, e lua tausaga ua faasa ai o ia ona toe ulufale mai i le teritori, o le umi foi lea ua faanofovaavaaia ai o ia e le faamasinoga faaitumalo.

Ua malilie loia o loo tulai mo i laua ua molia faapea ai le loia a le malo, o le a tuuina atu ni a latou faafinauga i le faamasinoga mo ni faasalaga mama mo Siloma ma Aokuso, peitai ua malamalama i laua ua molia, tusa lava pe finau loia i le faamasinoga mo ni faasalaga mama mo i laua, e pule le faamasinoga pe talia pe teena ia faafinauga, aua o loo i ai i le faamasinoga le malosi e faasala ai i laua i se faasalaga e manatu le faamasinoga, e talafeagai ma le solitulafono ua tausalaina ai i laua.

Ua malamalama foi Siloma ma Aokuso, e le mafai ona toe suia a la tali ioe ua tuuina atu i le faamasinoga, pe afai e tuuina mai se faasalaga a le faamasinoga ae le tau ai o la manao.

O loo taofia uma i laua nei i le toese e faatali ai le aso lea ua faatulaga e lau ai a laua faasalaga.

O le mloliaga lea ua tali ioe i ai le au ula ia e toalua, e mafai ona faasala ai se tasi i le toese mo le umi e le sili atu i le 7 tausaga, pe faasala foi i le salatupe e le sili atu i le $5,000, poo le faasala foi i faasalaga uma ia e lua.