Ads by Google Ads by Google

IOE I LONA GAOIINA O TUPE A LE MALO

O le tina e 46 tausaga le matua lea na tuuaia i lona gaoiina o se vaega tupe e silia ma le $7,000 mai le Ofisa o le malo sa faigaluega ai, ua ia ta’utino i luma o le faamasinoga maualuga i le vaiaso nei, e fa’amaonia tuuaiga faasaga ia te ia.

 

E 16 moliaga mamafa na ulua’i tuuaia ai e le malo ia Fiapapalagi Eteuati Letuli, ae i lalo o se maliliega na sainia e le ua molia ma le malo, lea fo’i na talia e le faamasinoga maualuga i le vaiaso nei, ua ia tali ioe ai i moliaga mamafa e lua ae solofua e le faamasinoga moliaga e 14 o lo o totoe ai i le pepa o tagi.

 

O moliaga e lua sa tali ioe i ai Letuli o le gaoi atoa ai ma lona faia o faamaumauga tau faasese.

 

I le tali ioe ai o le ua molia, sa ia tautino ai e faapea, i se taimi o le aso 14 Ianuari 2011 a’o avea o ia ma tagata faigaluega o le Ofisa o le ASESRO a le malo o Amerika Samoa, sa ia gaoiina ai ni siaki mo totogi a le malo o Amerika Samoa, sa tuuina atu ia Gale Clarke, ona ia saini faamalosi lea o le igoa o Gale Clarke i le tino o le siaki, ina ia mafai ai ona tala le siaki ae ona faaaoga le tupe sa maua mai ai, i le aofaiga e $7,860.65

 

Na ta’utino Letuli e faapea, o le gaioiga sa ia faia na mafua ai ona ia faia lenei solitulafono, o lona tuuina atu lea o pepa e faamaumau ai taimi faigaluega o Gale, ina ia maua ai lona totogi, e ui sa ia iloaina lelei lava, o Gale o lo o ave ana livi, ona o lo o malaga i fafo mo ana talavai, e le o totogiina fo’i o ia (Gale) i le taimi sa malaga ai i fafo mo ana talavai.

 

Ina ua fesiligia e le faamasinoga maualuga le ua molia po o fea sa ia talaina ai siaki nei, na taua e Letuli e faapea, e lua faleoloa sa ia talaina ai siaki nei, o le faleoloa o le Mini Mart Store ma le faleoloa o le Christopher Store.

 

Ua malamalama le ua molia i tuutuuga o le latou maliliega ua faia nei ma le malo, tusa lava pe finau loia i le faamasinoga mo se faasalaga mama mo ia, e pule le faamasinoga pe teena pe talia ia faafinauga.

 

Ua malamalama fo’i Letuli, e le mafai ona toe suia lana tali ioe ua tuuina atu i le faamasinoga, pe afai e tuuina mai le faasalaga a le faamasinoga ae le tusa ai ma lona mana’o.

 

E tusa ai ma faamaumauga a le faamasinoga o lo o taua ai e faapea, e tusa ma le 8 siaki sa saini faamalosi e le ua molia ma tala ae faaaoga tupe sa i ai.

 

O le va o le aso 14 Ianuari e o o atu i le aso 5 Aokuso 2011 na tula’i mai ai lenei faalavelave, a’o galue le ua molia i le Ofisa o le malo a Amerika Samoa e taua o le ‘American Samoa Economic Stimulus Recovery Office’.

 

O lo o tumau pea poloaiga a le faamasinoga o lo o tatala ai Letuli i tua, e faatali ai le aso 7 Fepuari lea ua faatulaga e lau ai lana faasalaga.