IOE I LE FAIA O I.D PEPELO MO TAGATA ASIA

O le ali’i faigaluega o le Ofisa o Femalagaaiga a le malo lea sa tuuaia i lona tuuina atu o ni I.D pepelo i ni fafine Saina i le 2011, ua ia ta’utino i luma o le fa’amasinoga maualuga e faamaonia tuuaiga faasaga ia te ia.

 

E lua mataupu eseese o lo o tuuaia ai e le malo ia Savea, ona o le tuuina atu o I.D pepelo ni tamaitai Saina se to’afa i taimi eseese.

 

O le taeao ananafi na fofogaina ai i luma o le faamasinoga se maliliega na sainia e le susuga ia Savea Polone ma le malo, ae ina ua maea ona tolaulau e le loia a le malo ia Camille Phillipe le maliliega i luma o le faamasinoga, na manatu ai loa le alii faamasino sili e toe tolopo le faaauauina o lenei mataupu i le aso Tofi o le vaiaso fou.

 

I vaega o le maliliega sa tolaulau i luma o le faamasinoga maualuga, o lo o taua ai le tali ioe o Savea i le moliaga mamafa e tasi o lona faia lea lea o ni tusitusiga tau faasese.

 

I le ta’utino ai o Savea i lona faia o ni tusitusiga tau faasese, sa ia tautino ai e faapea, i le va o le masina o Aokuso ma Setema 2011 a’o galue o se alii Ofisa o le vaega o Femalagaaiga a le malo o Amerika Samoa, sa ia sainia ai ni pepa I.D ne le moni mo ni tagata mai Asia ma le faamoemoe, ia foliga pepa I.D nei o ni mea mo’i. ma ia mafai ai pea ona faaauau le aumau o tagata mai Asia i le teritori.

 

E tolu moliaga mamafa na ulua’i tuuaia ai e le malo ia Savea i le mataupu lenei, o ia moliaga mamafa e aofia ai moliaga e lua o le faia o tusitusiga tau faasese, atoa ai ma le isi moliaga o se tagata faigaluega lautele na te talia ni taui i ni auala ui fa’a’alatua.

 

Ina ua maea ona sainia e le malo ma Savea lenei maliliega, na talosaga ai loa le malo i le faamasinoga e faapea, afai e talia e le faamasinoga le tali ioe a Savea i le moliaga mamafa e tasi o lona faia o tusitusiga tau faasese, ona latou talosaga loa lea e solofua moliaga mamafa e lua o lo o totoe ai i le pepa o tagi sa latou faaulu, faapea ai ma le solofua o moliaga o lo o i le isi mataupu sa latou faaulu fo’i faasaga ia Savea, le mataupu ‘155-12’.

 

I le mataupu lea ua sauni Savea e tali ioe ai, o lo o tuuaia faatasi ai i laua e le malo ma le tamai’ita’i o Matagi Lelili’o, ma o le masina na te’a nei na tali ioe ai Lelili’o i le moliaga mama, o lona fesoasoani lea i se tagata faigaluega lautele e faatino le solitulafono o le faia o ni tusitusiga tau faasese.

 

I le tali ioe ai o Lelili’o i le moliaga muamua lea ua toe suia e le malo, s ia tautino ai i luma o le faamasinoga e faapea, i le va o le masina o Aokuso ma Setema 2011 i Amerika Samoa, sa ia totogi tupeina ai le alii Ofisa o Femalagaaiga ia Savea i le aofa’i e $600, mo le faia o I.D pepelo mo ni tamaitai Saina se to’alua.

 

Na ta’utino Lelili’o i luma o le faamasinoga, sa ia tuuina atu le tupe ia Savea ina ia mafai ai ona ia fesoasoani i le faanatinatiina lea ona maua o I.D mo ni tamaitai Saina se to’alua, ma o lea gaioiga sa ia faia sa le tusa ai ma ala o le tulafono.

 

E tusa ai ma faamaumauga a le faamasinoga o lo o taua ai e faapea, na ave e Lelili’o le tupe ia Savea ao latou i ai i le Ofisa o Femalagaaiga.

 

Na taua e faapea, o Lelili’o na vili ia Savea ma talosaga i ai mo se fesoasonai, mo ni tamaitai Saina se to’alua o lo o fia vave maua ni la I.D, ona fai lea i ai o Savea e o atu i le Ofisa e pu’e ata mo la I.D.

 

O I.D sa tuuina atu i tamaitai Saina nei e to’alua e pei ona taua i faamaumauga a le faamasinoga, o numera o isi I.D ua maea ona tuuina atu i isi tagata mai fafo.

 

O lo o faatali le lauina o le faasalaga a Lelili’o i le aso Faraile o le vaiaso fou, se i mae’a le fofogaina o le maliliega aufaatasi i le va o le malo ma Savea, lea ua faatulaga e faia i le aso Tofi o le vaiaso fou, ma o lo o tumau pea poloaiga a le faamasinoga o lo o tatala ai Savea ma Lelili’o e faatali ai le aso e toe fofogaina ai a laua mataupu.

 

O le mataupu lona lua na faila e le malo faasaga ia Savea, sa molia ai o ia ma se fafine mai Saina, peitai ua toe solofua e le faamasinoga moliaga sa faia faasaga i le fafine Saina lea, ona sa taua e le malo i luma o le faamasinoga e faapea, o le latou molimau autu mo le mataupu lea ua malaga i fafo, ma ua le toe mafai ona toe maua mai o ia.

 

I faamaumauga a le faamasinoga i le mataupu lea o lo o taua ai e faapea, e to’alua ni fafine mai Saina na ulufale mai i le masina o Me 2011 i pemita ta’i 30 aso.

 

I le aso 11 Setema 2011, na toe tuua ai e fafine Saina nei e to’alua le teritori, ae ina ua toe ulufale mai i le atunuu i le aso 14 Setema 2011, sa laua faaaoga ai ni I.D e ulufale mai ai i le teritori.

 

Na saili e leoleo le sponsor a tamaitai Saina e toalua ma fesiligia pe na faapefea ona vave maua I.D a i laua nei, ao lea na faatoa ulufale mai i le masina o Me 2011, ae na faailoa e le sponsor i alii suesue, e o o fo’i ia te ia na te le o iloaina pe na faapefea ona vave maua I.D a tamaitai nei e to’alua.

 

Ao faagasolo pea suesuega na iloa ai, o le fafine Saina e igoa ia Jin Hua Sullivan lea ua solofua e le malo moliaga faasaga ia te ia, o ia lea na taua e Savea e le gata sa ia tuuina atu le $200 ia te ia, ae o ia fo’i na o atu ma fafine Saina e to’alua mo le pu’eina o laua I.D.

 

O le tula’i mai ai o le mataupu lenei i le tuuina atu o I.D pepelo i tagata mai fafo aemaise lava i tagata mai Asia, na lagalaga ai finagalo o ni isi o le atunuu, ma latou fesiligia, pe le o le mafuaaaga lea o le televave o le to’atele o tagata mai Asia ua aumau i totonu o le teritori.

 

Saunoa le afioga i le alii Senatoa ia Tuiasina S. Esera, o ia fo’i o le sui taitai komiti o le Komiti Faafoe o le Ofisa o Femalagaaiga e faapea, e tatau ona mata’itu e le Ofisa o Femalagaaiga ituaiga mataupu faapenei, ina ia mautinoa e le toe tula’i mai i le lumana’i.

Comment Here