Ads by Google Ads by Google

Ioe ALJ ua tatau ona fa’ate’a se faiaoga

O le faaiuga a le Fa’amasinoga o Mataupu Tau Pulega a le malo (ALJ), lea na tuuina mai i le amataga o le vaiaso, ua saga fa’amautu ai le faaiuga a le malo o Amerika Samoa i se tasi o alii faiaoga, e fa’amalolo mai ai o ia mai lana galuega fa’a faiaoga, ina ua ia le ausia le amio e tatau ona fa’atinoina e soo se faiaoga.

O le matagaluega o aoga a le malo o Amerika Samoa na faia le fa’aiuga e faate’a ai Louie Segi mai lana galuega, ina ua mae’a se su’esue’ga sa faia, i se fa’asea na fa’aulu e se tasi o matua, i se gaioiga fa’aluma sa faia e Segi, i ni isi o tamaiti o lana vasega, pe afai e le faia meaaoga a tamaiti.

O Segi sa faiaoga  i le Aoga Maualuga a Fagaitua, ma o lana loia ia Mark Ude na tulai mo ia i le taimi o lenei iloiloga, ae o le alii o Daniel Woods na tulai mo le malo o Amerika Samoa ma le Ofisa o Aoga.

Na ta’ua i se fa’asea a se matua, sa faia fa’asaga ia Segi, o nisi o taimi e tago ai Segi ua valivali foliga o tamaiti ae tu’u i luga o lana itulau i totonu o le “Facebook”, ae ia tusia ai fa’aupuga e fa’apea, “Ta’usala i le gaoia o se lotion” po o le “Pagota i le falepuipui i Tafuna”.

O ni isi o taimi, e pei ona ta’ua e se tasi o matua, afai e le faia meaa’oga a tamaiti o le vasega a Segi, ona filifili lea pe totogi le $1 ia Segi po o le tu’u o lona ata i luga o le ‘facebook’.

Na fa’aalia e ni isi o matua e fa’apea, o le tiute a le faiaoga, o le telefoni lea i matua, pe afai e le faia meaa’oga a le tamaititi a’oga, ae le o le faia o ia uiga e fa’amaasiasi ai fanau aoga.

Ina ua tau’a’ao e le Ofisa o Aoga fa’asea mai matua, sa faia ai loa se su’esu’ega e uiga i lenei mataupu, ma tu’uina atu ai loa le fa’aiuga a le Ofisa o Aoga, e faamalolo Segi mai lana galuega  Peitai na fa’aulu e Segi sana tagi i le ofisa a le ALJ, e fesiligia ai le moni ma le tonu o lea fa’ai’uga.

O le autu la o le iloiloga sa faia i luma o le alii faamasino ia Toetagata Albert Mailo, pe sa mulimulita’i le malo ma le Ofisa o Aoga i tulafono ma ta’iala e fa’avae ai i luga a latou fa’aiuga i mataupu fa’apenei.

Na ta’ua e Toetagata e fa’apea, “O le fesili, pe sa mulimulitai le malo ma le Ofisa o Aoga i tulafono ma taiala e faatino ai faaiuga mo mataupu faapenei, o le tali, Ioe.”

Sa saunoa Toetagata, e tusa ai ma molimau na tu’uina atu e le malo i le iloiloga sa faia mo lenei mataupu, na matua manino ai le faia e Segi o ni amioga ma gaioiga e le tusa ai ma taiala i tagata faigaluega a le malo, ma ua alaga tatau ai foi le faaiuga e faatea ai o ia mai lana galuega.

Saunoa foi Toetagata e faapea, o le mea sa faia e Segi, ua ia faia ni tusitusiga i foliga o ata o tamaiti o lana vasega, pe afai latou te le faia a latou meaaoga, ona tuu lea o latou ata i luga o fesootaiga tau initaneti e mafai ona vaai i ai soo se tagata i se auala e le puipuia, e aunoa ma le malilie i ai o matua o tamaiti na aafia.

“O nisi o tusitusiga sa faia e Segi i ata o tamaiti o lana vasega e aofia ai faaupuga e pei o le ‘Tamaititi aoga leiloa o le tausaga,’ ‘taitai o fualaau faasaina mai Aoga,’ ‘manaomia i le tatauina o susu o le povi o le latou tuaoi,’ ‘o le mea lea e oo i ai tamaiti o la’u vasega pe a le faia a latou meaaoga,” e pei ona taua e le alii faamasino i lana faaiuga.

Saunoa Toetagata, soo se tagata faigaluega tumau a le malo e faamaonia ua ia soli aiaiga ma taiala i le faatinoina o latou tiute i totonu o ofisa ma galuega o loo galulue ai, e mafai ona faamalolo mo se taimi le tumau, faatea poo le suia foi lea o le galuega e filifili i ai.

I le vaega mulimuli o le faaiuga a le faamasinoga e tusa ai o lenei mataupu, e le gata ua saga faamausali ai le faaiuga sa faia e le Ofisa o aoga a le malo, ae ua tuuina atu ai foi ma la poloaiga ina ia aloaia loa le faaiuga i totonu o aso e 5, talu mai le aso na tuuina mai ai le faaiuga lenei a le faamasinoga.