Ua faia nei se maliliega i le va o Ausetalia ma Initonesia ina ia fa’aleleia a la’ua feso’ota’iga i ala e mafai ai ona mautinoa ua utagia se auala e mafai ona fesoasoani ai i tagata o lo’o sulufa’i atu i Ausetalia mo se olaga manuia. Na faia lea fonotaga i le va o ta’ita’i e lua i le masina ua te’a nei.

O le tama’ita’i palemia o Ausetalia, Julia Gillard i Darwin ma peresetene Susilo Bambang Yudhoyono o Initonesia, ua la’ua fa’ailoa mai, o Initonesia lea ua foliga mai, o se malo e mafai ona auina mai ai ni tagata galulue fa’ato’aga ma isi fo’i agaga a le malo o Ausetalia.

Peita’i, i le masina talu ai, e lua va’a tutumu i pasese o tagata Initonesia ua magoto i le vasa ma ua maliliu uma ai lea to’atele sa fia o’o mai i uafu o Ausetalia.

E ese mai ia va’a e le’i tuta ma pasese o tagata, ua i ai se isi va’a o lo’o taofia i Ausetalia, ona o lo’o tumu le pasese i tamaiti ma teineiti e le’i atoa tausaga e mafai ai ona o ese mai latou aiga e aunoa ma se fa’atagaga a matua.

O le tulaga o fefa’ataua’iga ma le saogalemu o malo e lua mai le avea ma to’omaga o le to’atele e fia sulufa’i mai i totonu, ua avea ma se isi mataupu ogaoga o lea fonotaga. Ua autasi manatu o nei ta’ita’i e ao ina fa’aleleia atili le so’otaga o malo e lua, e ala i feso’ota’iga ma va’a feoa’i i le sami, ma tagata sulufa’i e fia ulufale i Ausetalia e pei ona matauina nei.

Ua fa’ailoa mai se lagona o Julia Gillard o Ausetalia, “Ua tula’i mai ua gaua’i le ali’i Peresetene Susilo, ina ia mautinoa ua mautu le la’ua feagaiga osia lea, ae ua mana’omia lava ona toe fa’asao atu le vasega o tamaiti talavou nei sa ‘auina mai i se au pasese o lo’o taofia nei e Ausetalia. Ua fa’ailoa mai e 54 le aofai o nei fanau talavou.”

Ua iloga mai le to’atele o e ua maliliu a’o taumafai e o’o mai i gataifale o Ausetalia, i le va’a na magoto i le aso 21 o Iuni, e to’a 110 le pasese na fa’asaoina ae to’a 17 ua maliliu ai, peita’i, na fa’ailoa mai, e 200 i latou na i luga o le va’a i le taimi na magoto ai. E to’afa isi tagata na maliliu i le vaiaso na soso’o ai, ina ua magoto fo’i le va’a sa folau mai ai.

O le to’atele o tagata e fia o’o mai i le Motu o Kerisimasi, lea e i le itu i saute o Ausetalia, ona e fia o’o mai i Ausetalia i latou mai Initonesia. O va’a e malaga mai ai i latou e matele ina to’atele na’ua ae le lelei va’a, ma o le afuaga fo’i lea o le magoto o va’a nei a’o malaga i le sami.

Ua mae’a sainia e Ausetalia se feagaiga ma Initonesia ina ia foa’ia atu le $1piliona Ausetalia ina ia fesoasoani ia Initonesia e fa’aleleia ai le tausiga o tagatanu’u o itumalo lea e sosola mai tagata ma fia to’ai taunu’u i Ausetalia e ola ai. O se tasi o mea ua aofia i lea maliliega, ua maua fua ai va’alele e fa e sailia ai va’a i le vainu’u, ma le tinoitupe ua mae’a fa’ailoa i luga, ina ia maua e nei tagata e vaivai le tamaoaiga se avanoa e saili ai so latou olaga mautu fa’aletupe i Initonesia lava.

Ua fa’ailoa mai ua mautinoa ua fa’afaigata nei ona toe sao mai se va’a ma sana pasese fa’apea i le vainuu lea, aua ua mae’a tapena malo e lua i ala e feso’ota’i lelei ai e tusa o tagata sosola pe sulufa’i fo’i.

saunia: Leua Aiono Frost