Ads by Google Ads by Google

Iloilo tulafono mo le puipuia o fanau aoga ma le malo ona o manu’aga mai taaloga

Ua i ai le manatu o le Komiti o le Soifua Maloloina a le Maota o Sui, o le a faatali sa latou faaiuga i le tulafono lea e aiaia ai faaiuga mo fanau e aafia i manu’a i taimi o taaloga a aoga, sei maua se avanoa latou te fesiligia ai ni isi o faalapotopotoga o lo o faatautaia taaloga a fanau aoga i le atunuu, i ni o latou finagalo e tusa ai o lenei tulafono.

 

E le gata foi i lea, o lea ua taoto se fautuaga a alii fomai mai le Ofisa o le Soifua Maloloina e faapea, o le faia o se faaiuga i se tagata taalo pe talafeagai ona toe alu i totonu o le malae e taalo pe a manu’a, e tatau ona faia e se foma’i po o se tagata ua aoaoina faapitoa i lea ituaiga tomai, ina ia vaoia ai le ono tulai mai o ni faafitauli mulimuli e toe aafia ai le malo i le itu tau tupe.

 

O lea faaiuga na faia e le komiti ina ua maea sa latou iloiloga ma sui o le Ofisa o Aoga, atoa ai ma sui o le Soifua Maloloina i le vaiaso nei, lea e pei ona fesiligia ai ni ta’iala ua faataoto mo lenei mataupu.

 

Na taua e sui o le Ofisa o Aoga i le taimi o le iloiloga e faapea, ua i ai ta’iala ma faiga faavae ua faatulaga e le Ofisa o Aoga e ao ona mulimulita’i i ai Faiaoga o au taaalo a fanau, e aofia ai le tatau ona auai Faiaoga (coach) o au taaalo i ni aoaoga ina ia mafai ai ona  faamaonia ua latou maua le agavaa e faia ai faaiuga i taimi e manunu’a ai fanau i taaloga.

 

Ae na taua e le alii fomai ia Dr. Joseph Tufa e faapea, o le tagata e faia le faaiuga i le tagata taalo ua lavea pe talafeagai ona toe alu e taalo, o se tagata ua i ai le tomai faapitoa i vailaau ma tulaga o manu’a, ina ia mautinoa e lelei ma atoatoa lana faaiuga o le a faia.

 

Na faamaonia e Dr. Tufa i le komiti e faapea, e le o se faaiuga faigofie lea o le a faia e le tagata lenei  aua afai ae sao lana faaiuga o le a manuia le tagata taalo, ae afai e tulai mai ai se isi tulaga faaletonu i le tagata taalo, o itu faaeteete gata la ia e tatau ona matua malupuipuia.

 

Na taua e le sui fofoga fetalai ia Iaulualo Faafetai Talia e faapea, o lona atugaluga i le mataupu lenei, e le gata o ia o le matua o isi foi fanau aoga o lo o taaalo, ae o ia foi o le fai tulafono a le malo, e ao ona vaavaai i tulafono e malupuipuia ai le malo mai le ono aafia i ni su e faia faasaga i ai e tagata.

 

O le manu’a o le ulu (tulou) e mafua mai i taimi o taaloga, o se tasi lea o faafitauli tuga ua toatele tagata taalo ua aafia ai e pei ona saunoa le afioga i le alii faipule ia Taotasi Archie Soliai, o se tasi lea o faipule e toa 9 i ai faipule na faaulufaleina lenei tulafono taufaaofi.

 

Na taua e Taotasi e faapea, e 43 setete ma teritori o le malo tele o Amerika o lo o latou faaaogaina aoaoga faapitoa mo faiaoga (coaches), ina ia puipuia ai alo ma fanau mai le aafia i manu’aga tuga i taimi o taaloga.

 

O se ata faataitai na faailoa e Taotasi i luma o le komiti ua iloa ai le matuia o le manua e aafia ai le ulu, o le mataupu i le alo o samoa ia Junior Seau lea na maliu i se taimi e lei mamao atu, e mafua mai ona o se manu’aga tuga i lona ulu ua leva tele ona aafia ai ae sa faigata ona silafia e foma’i e pei ona saunoa le alii faipule.

 

Na fesili le sui fofoga fetalai i le sui o le Ofisa o Aoga poo i ai ni aoaoga ua faia mo faiaoga o au taalo a fanau aoga, ae na tali le molimau, ioe, pau le faafitauli, e na o le faiaoga sili (head coach) e mafai ona maua le avanoa e auai i aoaoga nei, aua o ia e faia le faaiuga i se tagata taalo ae lavea.

 

Sa i ai se faafitauli na aafia ai fanau aoga na tulai mai i taamilosaga a fanau aoga ua mavae atu e pei ona taua e le sui o le ofisa o aoga, ina ua taofia se alii taalo mai le aoga a Tafuna ma Faasao e lei toe taaalo, ana le mautinoa lava ua toe maua lo la malosi e le toe faatagaina i totonu e taalo.

 

O le vaiaso fou lea ua faamoemoe e faia ai le iloiloga a le komiti mo le fesiligiaina o isi faalapotopotoga o taaloga i le atunuu, e pei o le vaega o lo o faatautaia taaloga Football a fanau aoga, taaloga Baseball ma le Softball