Ads by Google Ads by Google

Iloilo Matagaluega Fefa’ataua’iga tulafono laisene o pisinisi

Ua i ai le faamoemoe o le Matagaluega o Fefaatauaiga ma Alamanuia a le malo, o le a latou tuuina atu i le Fono Faitulafono la latou ata faataoto i le toe iloiloina lea o le tulafono e uiga i laisene pisinisi ma totogi o laisene pisinisi, i le maea ai lea ona tuuina atu o ni fautuaga mai le Sui o le Aufai Pisinisi i le atunuu.

Na taua e le Matagaluega i se latou ripoti faataitai na tuuina mai, o loo manino le tatau lea ona faia o ni suiga i le tulafono o loo i ai nei, aemaise lava le tulaga pagatia o loo i ai le tamaoaiga o le atunuu i le taimi nei.

O se tasi o suiga e pei ona atagia mai i le ata faataitai mai le Matagaluega, o le aveesea lea o totogi mo le laiseneina o pisinisi lea ua silia ma le 20 tausaga o i ai i le tulafono, ae tuu i ai le malosi i le Faatonusili na te faatulagaina ai totogi, atoa ai ma le tuuina atu o tupe e maua mai ai i se teugatupe faapitoa.

I le suiga faataitai lea ua tapena e le Matagaluega o loo taua ai, o le Faatonu o le a ia faatulai taiala ma tulafono mo le totogiina o laisene mo pisinisi fou, faafouina o se laisene pisinisi, poo le toe faia foi o nisi suiga i laisene pisinisi uma lava, ma ia faatumauina pea nisi totogi o loo manaomia e nisi vaega o le tulafono, sei vagana ua aloaia suiga fou ua fuafuaina.

O tupe uma lava o le a maua mai i le suiga lea o le tulafono o le a teuina i se teugatupe faapitoa, e faaaoga i nisi manaoga e aofia ai le tau o laisene ma le faamalosia o le tulafono, totogi, aoaoga, o mea faigaluega atoa ai ma faamaumauga, e pei ona taua i le fuafuaga a le Matagaluega lea ua faalauiloa mai.

E le gata i lea, ae ua faamoemoe o le suiga fou lea ua fuafuaina nei, o le a taofia ai le toe tulai mai o le tulaga lea e pei ona tulai mai i le taimi nei, i le talanoaina lea e le Fono o siitaga o totogi o laisene mo le taimi muamua, talu mai le 40 tausaga talu ai.

O le vaega lea e faatatau i le pili tupe lea na faaulu e le malo i le fono i le amataga o le tausaga nei, e sii ai totogi o laisene o pisinisi, lea o loo taoto ai lava i le fono i le taimi nei, e lei faia i ai sa latou faaiuga.

O le pili tupe lea o loo taua e le matagaluega i lana ripoti, o se tasi lea o pili tupe e fa i ai pili tupe na ave e le kovana i le fono ona o le manatu ia maua ai se fesoasoani tau tupe  mo le malo, ina ua fetaiai ma faafitauli tau tupe, peitai o le atugaluga tele o le fono i le pili lea, o le silia lea ma le 100% o le siitaga, ma ua oo atu lava i le 600%.

O lea pili na matua tetee i ai le Asosi o le Aufai Pisinisi atoa ai ma isi foi pili tupe a le malo, ona o le talitonuga, o le mamafa o lenei avega o le a faaee atu i tauau o tagata faatau.

Ae i le talitonuga a le Matagaluega e pei ona latou taua, o le siitaga i totogi o laisene mo pisinisi, e le faia ina ia maua ai se tupe mo le malo, a ia mautinoa e mafai ai ona fesoasoani i le auala na faagaioi mai ai le tulafono mo pisinisi.

E le gata foi i lea, o le a fuafua foi siitaga i le tau o loo fausia ai le tulafono, ae le o le taumafai ina ia tali ai manaoga  tau tupe a le malo.

faaliliu Ausage Fausia