Ads by Google Ads by Google

Iloilo e Faipule tulaga o galuega mo le toe faaleleia o auala

O faipule uma lava o le maota o sui na maua le avanoa e fesiligia ai le Faatonusili tofia o le Matagaluega o Galuega Lautele a le malo i le taeao ananafi, na autu o latou finagalo i tulaga faaletonu o lo o i ai auala i totonu o latou itumalo faapea ai le atunuu atoa.

I se ripoti na tuuina atu e le Faatonusili tofia o le matagaluega ia Faleosina Voight i luma o le komiti, o lo o faailoa atu ai galuega ua maea ona faatinoina e le matagaluega i totonu o le 20 tausaga talu ai, atoa ai ma galuega ua maea ona fausia i totonu o le fa tausaga talu ai, e 100% o lo o faatupeina mai e le Vaega a le ‘Federal High Way’.

O le afioga i le alii faipule mai le Itumalo o Fofo ia Puletuimalo D. Koko na fesiligia le molimau i le mafuaaga ua ala ai ona tuai le fausiaina o le auala i le malae vaalele, lea ua tele ina faasea ai le atunuu i le faaletonu ma le omoomo o lea auala.

Saunoa Puletuimalo e faapea, e mafua ona faanoanoa lona loto, ua uma ona tuuina atu le galuega i le konekarate ae foliga mai e leai se mea e tasi o faia.

Na faamanino e Faleosina e faapea, na mafua ona taofi le galuega, ona ua maea le aoga o le pemita e tasi le tausaga sa tuuina atu i le konekarate e faatino ai le galuega, peitai o lea ua maea ona toe faafou le pemita, pau le tulaga o lo o faatali ai, o le pasia e le matagaluega o mea e faaaoga i le galuega ma afai ae pasia ona toe faaauau lea o le galuega.

E 330 aso e tatau ona maea ai le galuega e pei ona aofia i le sainiga o le konekarate, ma ua faamoemoe o le masina o Oketopa 2013 e tatau ona maea ai lea galuega.

Na taua e le faipule o le Itumalo o Tualauta ia Florence Vaili Saulo e faapea, o le auala i le malae vaalele e muamua taunuu mai ai tagata malaga mai fafo pe afai e asiasi mai i le teritori, ae o se tulaga faanoanoa pe afai e vaavaai atu i le tulaga faaletonu o lo o i ai i le taimi nei.  Sa ia talosaga ia Faleosina ina ia silasila toto’a i auala o lo o i totonu o lona itumalo, le itumalo e pito toatele tagata o lo o nonofo ai.

Sa ia fesiligia le mafuaaga na tuuina atu ai le galuega i le konekarate latou te fausia ae fou le konekarate.

O le isi auala na fesiligia e Florencce, o le auala lea e ui atu i Ottoville, e pei ona fesootai ai Fagaima ma le Fatuoaiga.

Fai mai le tamaitai faipule, e tele Ekalesia o lo o i ai i le magaala lea ae ua fai lava si tulaga faaletonu, e toatele foi le atunuu latou te uia lea vaega o le atunuu, ae na taua e Faleosina e faapea, o lo o tau sailia e le matagaluega se konekarate latou te faaleleia vaega pito sili ona faaletonu i magaala eseese i le atununuu, o le taimi lava e maua ai se konekarate ona amata loa lea o ia galuega.

I totonu o le taulaga i Fagatogo, na talosagaina ai e le alii faipule ia Maugaoalii Leapai Tusipa Anoai le faatonu ina ia toe silasila i le auvai o lo o va ai le Fagatogo Square ma le maota fono, ina ia vave fai i ai se galuega lavea’i,

Mo le Falelima i Sasa’e, na talosagaina e le alii faipule ia Fatulegae’e Mauga auala e amata atu i Laulii e oo i Tula ina ia faaleleia ona o tulaga faaletonu o lo o i ai.

Sa ia talosagaina foi ni laina kolosi i luma o aoga i Tula ma Alofau ina ia mautinoa le saogalemu o fanau aoga, atoa ai ma ni faailoilo i luga o le auala e iloa ai e ave taavale, o nofoaga ia o lo o latalata i faleaoga, e tatau foi ona lemu ai le o a latou taavale.

Na talosagaina foi e le alii faipule ia Faimealele Anthony Allen le faatonu ina ia toe vaavaai i auala ma le taligalu a lona afioaga i Aua.

Ae mo le Falelima i Sisifo, na talosagaina e le afioga i le alii faipule ia Timusa Lam Yuen le faatonuina ia alofagia magaala i lona itumalo, lea ua maitauina le faaletonu i le taimi nei.

I le faaiuga o le iloiloga, na fautuaina ai e le taitai komiti ia Atualevao Gafatasi Afalava le Faatonu tofia e faapea, afai na te usitaia le fautuaga a le komiti, e aua nei tuuina atu ni galuega i konekarate tua sei vagana ua pasia atu e le Fono, o le a faaauau pea ona avea o ia ma faatonu o le matagaluega.