Iakina Academy - Taualoa le Coastweek ma le Si’omaga

Ua amatalia le asiasiga a le A’oga Tulaga Lua a Iakina Academy i so latou sao mo le fa’atauaina o le Si’omaga ma le Vaiaso o le Coastweek lea e fa’atautaia e le Matagaluega o Fefa’ataua’iga a le Malo.

 

Mai le aso Lua o lenei vaiaso, na asia ai e Vasega Lua, Tolu & 4 a Iakina le Vaega o le Laufanua a le Kolisi Tu’ufa’atasi po’o le Vaega a le Land Grant. O i latou ia sa latou fa’amatala i le fanau le aoga o le tele o la’au ua totoina fa’apitoa i fa’ato’aga, o le aoga o le tausami lava o tatou tagatanu’u i fua o a tatou lava fa’ato’aga, aua o lo’o iloa fo’i e i tatou mea o tatou fa’aaogaina i fa’alelei eleele ma ua tausia lelei ai a tatou fa’aeleeleaga mo le soifua maloloina o i tatou.

 

I lea lava asiasiga sa fa’ailoa ai i le fanau, ituaiga o fuala’au aina mata, ma fuala’au aina fa’avela ua maua i o tatou laufanua, ua aoga i le tausiga o tatou soifua maloloina lelei.

 

O lea le matagaluega o le Kolisi Tu’ufa’atasi o lo’o ua a’oa’o mai ai ia toe fo’i i tatou e fa’ato’aga  e toe fa’amasani ai a tatou fanau. O le soifua tuma’oti mai le fa’alagolago i oloa mai fafo, ua tatau ona fa’aitiitia lava i o tatou tagata ma le atunu’u atoa, ae ua toe fa’atepa i tatou i ala e mafai ai ona fa’aaoga e i tatou mea toto i o tatou laufanua lava.

 

E ui ina itiiti le fanau, ae ua fa’ailoa ia i latou le aoga tele o le tausami i le laupele, kapisi ma isi fuala’au aina ma ia fa’aaoga fo’i i le sauniga o mea’ai a le aiga. Ua matauina ua tele ituaiga o pele, pe afai e taga’i i o latou lau. Peita’i na fa’aalia e Ian Gurr, “O le tele o nei laupele, sa fa’afeusua’i fugala’au o pele e lua, ona maua mai ai lea o fatu, ona toto lea ua ese mai ona foliga mai le isi ituaiga o pele. O lau o le isi pele ua mumu pa’auli ona ‘au ma o le ituaiga lea e tele na’ua ai le vitamini.”

 

I le aso Lulu na asia ai e le vasega 5 ma le 6 a Iakina lava le kamupani a GHC Reid i Tafuna, le nofoaga o lo’o toe fa’aliliu ai le alumini ma le palasitika e toe fa’aaoga. O lenei faiga e fa’ataua ai le fa’amama o le si’omaga mai le tele o otaota e ta’atitia solo ai, ae ua fa’ateleina fo’i, ma ua faigata ona fa’apala ae sili ai le toe fa’afo’i i lea kamupani e toe fa’aliliu ma la’u i fafo e toe fa’aaoga ai mo nisi atigi apa ma atigi fagu.

 

“Manatua e le tatau ona sau le alamini lea o atigi apa inu ma le apa pilikaki, OK!” O se fa’amamafa mai lea a le ali’i o Ralph Taufa’asau i le fanau, aua ua tele taga atigi apa ua avatu, ae fa’apito i totonu atigi apa sese nei.

 

Ua fa’ailoa mai e le ali’i faia’oga o Mr. Tavita, “Ona o le matou a’oga e o i le Sapati i le aso To’ona’i e le auai ai i le ta’elega i Utulei mo le fa’amoemoe i le fa’aiuga o lenei vaiaso, ae fa’afetai ua mafai ona fa’atautaia nei asiasiga e fa’ataua ai le vaiaso o le Coast Week ma ua a’oa’oina lava i potu a’oga nei mataupu ae le’i sau le asiasiga lenei.”

 

O le aso taeao lea e fa’atasia uma ai aiga i le ta’elega i Utulei mo le aso mo Aiga atoa. Tele ta’aloga o le a fa’atautaia ai ma e fa’afiafia atoa ai aiga o le a auai.

 

 

Comment Here