Ads by Google Ads by Google

Ia tele so’u sao mo Amerika Samoa

Ua toetoe tatala le Fale Fou o le ASCC Land Grant, ae sa fa’ato’a mae’a le faiva o le Fa’atonu Dr. Tapa’au Daniel Aga, o le tau saili mai o se toa e tula’i e fa’atautaia polokalama o ituaiga fa’amalositino ese’ese e mafai ona tausia lelei ai le tino paleni o tagata lautele o le atunu’u fa’apea le fanau talavou i totonu o le tatou Kolisi Tu’ufa’atasi.

Ua olioli livaliva, aua o alo o le atunu’u e toe taliu mai, o se fa’amanuiaga lea i le Malo ma ona tagata, ua taliu i fanua, ae ua agatonu mo tautua ua mae’a a’otauina ai a’o saili malo. O Ursula Te’o Martin, o se tasi o alo o le atunu’u na soifua i Hawaii, ae o le a’oa’oga na amata atu i Manulele Tausala ma fa’au’u ai i le Level 8 i Pavaiai, aua o le tama, o le Faleniu mao’io’i, le susuga Whitney Te’o ma si ona tina o Palefuiono Te’o.

Ina ua mae’a le vasega 8 a Ursula i’inei, sa toe taliu i Hawaii amatalia ai le A’oga i Kahuku High, peita’i na toe filifili matua e toe sau ma sa toe sau ai a’e i Leone High, peita’i e fa’au’u ane, ua avea ma tama’ita’i o le “Laumua o le Toa” - Tafuna High i lana vasega fa’au’u i le L-12 lona lua, talu ona fa’atu Tafuna - 1988.

 Na ulufale i le tatou Kolisi Tu’ufa’atasi, ma fa’au’u mai ai i le tausaga 1992 ma sa avea ma se tasi o tama’ita’i togi maualuluga i lona tausaga fa’au’u, ae maia ai ma lona avanoa e a’oa’oina ai i le Community College a le Air Force i a’oa’oga tau Bio-Environmental Engineering i Tampa.

“O se tasi lea o mea e le mafai ai ona momotu atu le loto mai aiga ma le atunu’u pele, aua e vala’au atu lava, fai le fa’anoi ae sau, o se fa’aeaga e maumau ma tu’uvale pe afai ae ou le taliaina, ma e tatau lava ona sau e fa’ailo le agaga fa’afetai i lana fa’aeaga mai lou malo!” O sana tala ata lea.

Ua tu’ua nei e Ursula Te’o sana galuega sa ia faia i Las Vegas, ae toe taliu i fanua, ona ua vala’auina e fa’aaoga lana taleni ma lona tomai fa’apitoa, e toe fesoasoani ai i ona tagatanu’u, lea ua matauina ai, le fa’afitauli, ua so’ona puputa, ma ua avea ma gasegase pe vave ai fo’i ona po’ia i fa’ama’i fita, e pei o le ma’i suka, toto maualuga, ma’i fatu, tele ga’o i le toto, kanesa ma isi.

O le a avea o ia ma se tasi e va’aia a’ia’i ituaiga fa’amalositino talafeagai ma le atunu’u pe a o’o atu i le falefou o le ASCC Land Grant lea ua fa’ailoa mai, “Health & Wellness Center” po’o le “Ofisa Tutotonu o Tima’iga Tau le Soifua Maloloina.”

Na fa’aipoipo Ursula Te’o i le ali’i maualuga o le Air Force - Gen.George Te’o Martin ma sa la’ua tiute fa’atasi i Guam. I le valu o masina o lona ma’itaga i le la’ua ulumatua, ae pa’u se tasi o va’alele o le Air Force ma maliu ai le tama o le aiga. O lo’o soifua mai lo la’ua lava alo e to’atasi, Guahan Aiono Te’o Martin, ua atoa nei le fa o ona tausaga, ma e fiafia le tama e nofo i le fale na fausia e ona matua matutua i Faleniu.

O galuega ma tomai ua foa’ina e le Atua ia Ursula, ua ia fa’ailoa mai, “O le a ou taumafai e fa’ailoa ma a’otauina ai tatou tupulaga talavou ae maise fo’i o matua, ina ia latou faia, ia aoga lea, e fa’asaoina ai le soifua, ia fa’aumiumi atili ai tatou mafutaga ma aiga.”