IA O FAATASI LE MATAGOFIE O LAUFANUA MA LE OLA SAOGALEMU O NAI O TATOU TAGATA
Mo le Faatonu
Ese le matagofie i le vaai o teuteuga o alatele a le malo, mo le sauniuniga i le aso o le Fu’a. Sa vaaia le to’atele o le au faigaluega a le malo, ua i ai o latou aso faatulagaina mo le faamamaina, ma le teuteuina o nai o tatou laufanua, aemaise autafa o auala tele, ina ia matagofie i le vaai, aua malo asiasi mai.
Faafetai tele i le alii kovana sili o lo tatou malo, ona o le tofa mamao, ma se utaga loloto, ua faatinoina ai lea faamoemoe.
Ae lagona a le faanoanoa, ona o le “OLA SAOGALEMU O TATOU TAGATA I FEMALAGAINA I LUGA O AUALATELE”. E le gata i auala savali, ae o auala taavale.
O a’u o se tagatanu’u o Amerika Samoa. Ou te nofo i Tafuna. E le masani ona ou ti’eti’e ta’avale i le itu i sasa’e o le motu o Tutuila. Ae ina ua nofo tane se tasi o o’u afafine i se taule’ale’a i le itu i Sasa’e o le motu, ua fai nei ma a’u masani ona o’u uia le ala lea i sasa’e.
O le mea e faanoanoa tele ai le loto, ona o NIU o lo o tutu i tafatafa ane o ala savali ma ala ta’avale. “O ISI NIU, E FALALA TONU LAVA LE PITO I LUGA I AUALA SAVALI MA AUALA TA’AVALE”. O lo o i ai POPO i luga o ia niu. E ono lamatia ai le ola o le tagata. Ma e ofo tele ai le loto i faipule ma senatoa, i le le taga’i toto’a i ia faaletonu i totonu o nai o latou itumalo. Aemaise ai fo’i pulenu’u, ua tofia e le malo, mo lea alalafaga ma lea alalafaga. O le mea e popole ai le loto, ona e ono lamatia ai le soifua po o le ola o le tagata.
Ua mavae atu le nofoaiga a Togiola ma Faoa, o e sa fai ma tama o le atunu’u, sa feagai ma ia faaletonu (Laau ma Niu e latalata ane i auala savali ma ala ta’avale). Ae faanoanoa le loto, e leai a se mea o fai iai.
O la’u talosaga i le nofoaiga fou, toe tagataga’i ane i NIU o lo o tutu i tafatafa ane o ala taavale. Pe tatau ona tu’u i lalo pe leai, mo le saogalemu o le atunu’u.
E lelei a le matagofie o si o tatou atunuu i le vaai ma le ola saogalemu o tatou tagatanu’u.
Toetoe a so’o alalafaga ma niu o lo o tutu i tafatafa ane o le ala. Ae o alaalafaga nei, ou te manatu, ua tatu ona tuu i lalo niu o lo o tutu i tafatafa ane o ala; Aua, Laulii, Alega, Auto, Fagaitua, Alofau, Amouli, Auasi, Alao, Tula, Matuu & Faganeanea, Malaeimi, Iliili, Taputimu, Vailoa, Leone, etc.
Mo le tatou faigamalo, e lelei ona fa’avae se tulafono e fofo ai ia faafitauli.
Ma le ava tele,
TETa’amu