Ads by Google Ads by Google

I ai suiga tetele fuafua e le Komesina fou

Ua fa’alauiloa e le Komesina fou o le Matagaluega o le Puipuiga o le Saogalemu Lautele i le Samoa News e faapea, e i ai suiga ua ia sauni e faia mo le Matagaluega o Leoleo ina ia talafeagai ai ma le faatinoina o le galuega, e ui e le’i mafai ona auiliili mai e le susuga William Haleck ia suiga.

“O le taimi nei lea faatoa tolu o’u aso talu ona tofia a’u i le galuega, pau la’u vaega o lo o fai i le taimi nei, o le tilotilo ma maitau tulaga uma o le galuega, ae i ai suiga ua ou faamoemoe e fai i le lumana’i ina ia talafeagai ma le galuega,” o le saunoaga lea a Haleck.

Ina ua fesiligia o ia po o aofia ai le Falepuipui i Tafuna ma le Ofisa o Taavale Afi a le malo (OMV) i ia suiga, na soisoi le alii Komesina ma saunoa mai, “o le a iloa lava i le taimi e faalauiloa ai suiga.”

O le taeao ananafi na faitauina ai le aofai o taavale uma a le Ofisa o Leoleo o lo o i ai, ina ia mautinoa o lo o tutusa numera o taavale ma le aofa’i sa’o o taavale o lo o i ai.

Na taua e le alii Komesina e faapea, o le faitauina o le aofai o taavale a le Ofisa o Leoleo, o se laasaga lea ua faia ina ia usitaia ai le poloaiga ua tuuina mai e le alii kovana, ma ia matuinoa ai foi, o lo o atoa uma taavale a le Ofisa o Leoleo e pei ona i ai i faamaumauga a le malo.

“O le autu o le suesuega i le taeao nei (taeao ananafi), ia faamaonia e sui o le malo o lo o atoa uma taavale o lo o faaaoga ma le aofa’i o laisene o taavale o lo o i ai i faamaumauga a le malo, ma faia ai loa se fuafauga e faaaoga na o taavale e tatau ona faaaoga, ae taofi mai taavale e le mana’omia ona faaaoga, ona ua vaaia le soona faaaoga le tatau o taavale e tagata faigaluega,” o le saunoaga lea a Haleck.

Talu ona tofia e le afioga i le Kovana Sili ia Lolo Matalasi Moliga ia Haleck e avea ma Komesina fou o le Ofisa o Leoleo, ua i ai ni isi o laasaga ua amata ona ia aga’i atu i ai mo le siitia o le tautua a le Matagaluega i le atunuu, e pei o le amata atu i taavale a le Ofisa o Leoleo ona faamalosia ai le aveesea o tioata pogisa (tint).

Na taua e se alii leoleo, o se tasi o mataupu sa aofia ai i le ulua’i fonotaga a le Komesina fou ma taitai o le Ofisa o Leoleo, o le faamalosia lea o le tulafono i le aveesea o tioata pogisa, ma ua manatu le Komesina e faapea, o taavale leoleo uma lava o lo o i ai tioata pogisa, o le a sasae ese uma ina ia talafeagai ai le o atu o leoleo e faamalosi le tulafono i le atunuu, ae o lo o tau solomua i latou le usitai i le tulafono.

O le mataupu i tioata pogisa o lo o faaaoga e taavale la’upasese, na amata alia’e mai i le ogatotonu o le tausaga na te’a nei, ina ua sauni le Ofisa o leoleo e faamalosia le tulafono ua leva ona i ai, ae mapuna a’e ai loa ma le tele o le mau faitioga mai ni isi o ave taxi, i le taumafai o le malo e aveese tioata pogisa mai a latou taavale.

E anoanoa’i mafuaaga na faailoa e le au fai taxi la’u pasese e faatatau i le ‘tint’ faatasi ai ma lo latou talitonuga, afai ua manatu le malo e aveese le ‘tint’, e tatau ona aofia uma ai lava taavale i le atunuu, ae aua ne’i faapito na o taxi la’u pasese.