Ads by Google Ads by Google

I ai se popolega i le pili e faaopoopo ai aofa’i Au Tausi Mavaega Litaea

Ua faaalia e le susuga a Aleki Sene Sr lea ua loa ona avea ma taitaifono o le komiti faafoe o le Tupe a le Litaea, sona atugaluga i luma o le komiti a le maota o sui, i le tulafono na faaulu e le alii kovana e faaopoopo ai totino o le Au Tausi Mavaega a le Litaea mai le 5 i le 9.

 

O Sene Sr. na molimau ma le susuga ia Filisouaina Taafua i luma o le komiti o le litaea.

 

Mai lea toaiva, e toalua totino o le tupe a le litaea ae o le isi toafitu e filifili mai i sui e aofia ai tagata faipisinisi, o ni isi e i ai le agavaa i tulaga o tupe.

 

I lana molimau na saunoa ai Sene e faapea, o se tasi o itu e le o talafeagai ai le pili na faaulu e le kovana ma le tulafono o lo o i ai, e le o faatulaga mai i le pili a le kovana le aofai o tausaga e tautua ai totino taitasi i le komiti ma e toatele atu sui o le a avea ma totino o le Komiti e le o ni totino o le Litaea, ma e ono avea lea tulaga ma itu e aafia ai teugatupe a le litaea.

 

“Matou te le faatuiese i le pili, pau la matou galuega o le fautua atu ina ia talafeagai le pili ma le tulafono o lo o i ai,” o le saunoaga lea a Sene.

 

Na saunoa Sene, o le toatele o sui o le komiti o le faigata foi lena ona faatino o a latou galuega, ae afai e tumau pea i le toalima o lo o i ai, o le a faigofie ona faatino galuega a le komiti aemaise lava i taimi o a latou fonotaga.

 

Na fesili le afioga i le alii faipule ia Fagasoaia Lealaitafea, o ia o le taitaifono o le komiti a le maota pe toa fia totino o le komiti e tatau ona i ai, na tali Sene, e pule lava le komiti i le aofai o sui latou te manatu e tatau ona i ai.

 

I le fonotaga a le litaea sa faia i Hawaii i le masina o Fepuari na te’a nei, lea na faatasi atu ai ni isi o faipule ma senatoa, na faailoa ai e le komiti a le litaea le silia ma le $200 miliona tupe a le litaea o lo o inivesi i maketi i fafo i le taimi nei.

 

O le masina na tea nei na pasia ai e le fono sa latou iugafono e momoli atu ai le faamalo ma le faafetai i le komiti faafoe a le litaea, ona o a latou galuega lelei ua mafua ai ona lelei ma malu puipuia teugatupe a le litaea a le atunuu.

 

SUIGA MAOTA O SUI

 

O le vaiaso nei na pasia ai e faipule la latou pili taufaaofi faatasi ai ma suiga. O suiga muamua e aofia ai le sui o le numera 9 i le numera 7.

 

O le suiga lona lua ia le itiiti ifo i le toa 4 totino o le komiti a  le au tausi mavaega o totino o le tupe a le litaea, ae o le isi toatolu e le o ni sui o le tupe a le litaea, ia i ai se toalua e i ai agavaa i tulaga tau pisinisi.

 

UMI E GALULUE AI

 

E toalua sui o le komiti o le a galulue mo le 2 tausaga; o le isi toalua e 3 tausaga; o le isi toalua e 4 tausaga, ma le toatasi e galue mo le 5 tausaga, o ia foi lea o se totino o le tupe a le litaea.

 

Ua maea ona pasia e le maota o sui la latou pili lenei i le faitauga faatolu, ua maea foi ona pasia e le senate suiga ua faia e le maota o sui i le latou pili, ma ua faamoemoe o le taeao nei e faitau faatolu ai le pili i luma o le maota maualuga.