Ads by Google Ads by Google

I ai isi tagata matutua faamalolo o le a toe maua avanoa

E le o tagata matutua uma ua atoa le tai 48 masina o galulue i lalo o le polokalame a le “Title 5” o le a faamalolo, ae o i latou o loo i ai a latou galuega ma nisi o Ofisa o le malo e le’i mae’a ma o loo mana’omia pea la latou tautua, o le a faaauau pea ona galulue, e pei ona faamaonia mai e le Faatonusili o le Ofisa o Tagata Matutua.

I le silia i le toa 3,000 le aofai o tina ma tama matutua o loo lesitala i lalo o le polokalame lea o loo faatupe mai e le malo tele, e to’a 72 i latou ua silia ma le ta’i 4 tausaga o galulue i le polokalame, ma ua fautuaina i latou ina ia malolo ina ia faamalieina ai aiaiga o le polokalame.

“E i ai isi o le to’a 72 lea o le a maua pea le avanoa e faaauau ai la latou tautua, ona o loo i ai a latou galuega e le’i mae’a ma e manaomia ina ia faaauauina pea la latou tautua,” o le saunoaga lea a le afioga i le Faatonu ia Fa’afiti Tauanuu.

O le aso Faraile na te’a nei na faamuta ai le tautua a le silia i le to’a 70 o tina ma tama matutua ua ausia masina ta’i 48 e tatau ona galulue ai, ma le faamoemoe o le a tofia isi o loo i le lisi faatalitali mo le faatumuina o avanoa sa latou galulue ai.

Ina ua fesiligia e le Samoa News nisi o tama ma tina matutua o le a faamalolo, sa latou taua ai le leai o so latou manatu e faasea i le polokalame, ina ne’i avea ma itu e le toe maua ai ni a latou avanoa i le isi polokalame fou o loo fuafua le TAOA e tuuina atu mo i latou, peitai na saunoa le Faatonu, e leai se polokalame fou o fuafua mo i latou ua faamalolo.

“O le polokalame lava lea e tasi, pau le itu o loo manino, e maua avanoa o i latou e le’i maea a latou konekarate, atoa ai ma le toatele o loo i ai i le lisi faatalitali, o le a maua le avanoa e galulue ai ma agavaa ai i le polokalame,” o le saunoaga lea a Tauanuu.

O i latou o le a maua pea le avanoa e faaauau ai a latou tautua ona o galuega e le’i mae’a, o i latou ia o loo galulue mo le aoaoina o le gagana Samoa poo tu ma agaifanua a le atunuu i fanau aoga, aemaise ai o le aoaoina o auala e lalaga ai mea taulima e pei o pulou, ili, fala lili’i ma le anoanoa’i lava o isi galuega taulima e mana’omia le aoaoaina ai o fanau laiti.

O le faafitauli ua mafua ai ona tuai le faamaloloina o i latou ua atoa le tai 4 tausaga o galulue i le polokalame, ona sa i ai se folafolaga sa faia i tausaga ua te’a i nai tagata matutua, o le polokalame e le taofia ae faaauau pea, peitai na saunoa le alii Faatonu, o le fautuaga na tuuina atu i le kovana lea foi ua ia mulimulita’i i ai, ina ia usitaia le tulafono o loo afua mai ai le vaega tupe lea e faatupe ai le polokalame, ina ne’i soli le tulafono ona avea lea ma itu e afaina ai le toe tuuina mai o le vaega tupe mo le polokalame a tagata matutua.

Saunoa Faafiti, o loo i ai lava le faanaunauga e faaopoopo nisi tagata matutua se toatele i le polokalame, peitai o le faafitauli e le o lava le vaega tupe o loo tuuina mai e le malo tele.

O le taimi nei, e le gata i tagata matutua mai Amerika Samoa nei o loo agavaa i le polokalame, ae faapea foi ma i latou mai fafo ua umia ituaiga ID o le AA, BA ma le CA, ma ua ausia le tai 60 tausaga le matutua.