I’ugafono mafai ai palota sui Swains i le Fono Faitulafono

Ua i luma nei o le Maota o Sui se I’ugafono So’ofa’atasi e talosagaina ai se suiga o le Fa’avae o Amerika Samoa, ma tuu atu ai le ‘aia i le sui Faipule o le motu o Swains e palota ai i totonu o le Maota o Sui.

 

O lenei I’ugafono So’ofa’atasi na fa’aulufaleina e afioga i Faipule e to’a 6, lea e aofia ai ma le Faipula mai Swains ia Su’a Alexander E. Jennings.

 

I le tino o lenei I’ugafono Soofaatasi o lo o taua ai e faapea, ua 156 nei tausaga talu ona avea le motu o Swains ma teritori o Amerika, talu mai le aso 18 Aokuso 1856 ina ua faamauina i totonu o faamaumauga a le Konekeresi.

 

I se iugafono soofaatasi a le Konekeresi i le aso 4 Mati 1925, na tuu mai ai le motu o Swains e avea o se vaega o Amerika Samoa, o tagatanuu uma o Swains sa nonofo ai i totonu o le motu ao le i sainia lea iugafono soofaatasi i le 1925 sa taua i latou o sitiseni o le Iunaite Setete o Amerika.

 

Sa aoga tele le la’uina mai o le popo mai Swains i na vaitaimi, sa mafai ai ona maua galuega mo tagata Amerika Samoa, ae ina ua mou ese atu le lelei o le popo i totonu o le motu, sa faatuina ai loa falei’a i Amerika Samoa e fesoasoani ai i le tamaoaiga o le motu.

 

Talu mai le 89 tausaga talu ona i ai le sui o Swains i totonu o le Fono Faitulafono, e le o mafai lava ona palota i totonu o le maota o sui i le taimi e palota ai se tulafono poo se iugafono.

 

E na o le taimi o galuega a le komiti e mafai ai ona palota le sui mai Swains i totonu o le maota o sui.

 

I le suiga o le Faavae e pei ona taua i le I’ugafono Soofaatasi lenei, o le a mafai ai e tagatanuu o le motu o Swains o lo o avea ma Nesionale o le Iunaite Setete ona filifili sa latou sui mo le maota o sui, e ala i se latou fono faalauaitele e tutusa ‘aia uma ai lea sui ma isi sui o le maota o sui.

 

O lenei iugafono soofaatasi ua taoto atu nei i le komiti o Tulafono a le maota o sui, mo le faatulagaina ai o se iloiloga, ma o kopi o lenei iugafono soofaatasi ua talosagaina le tuuina atu i le afioga i le alii kovana, faapea ai ma le Failautusi o le Ofisa o le Initeria a le Iunaite Setete.

Comment Here