Ads by Google Ads by Google

GAOTEOTE: E le taua ia te a’u pe veto kovana le $3 miliona

Na manino i le fa’afofoga a afioga i Senatoa o le Maota Maualuga i le taeao ananafi se saunoaga a le alii Peresetene ia Gaoteote P. Tofau e fa’apea, e le o popole lona loto pe ‘veto’ e le kovana le pili tupe a le Senate lea ua fa’aulu e fesoasoani i le falemai, ae o le mea taua ia silafia e le falema’i ma le atunu’u, o lo o fai galuega a le Fono.

O lea saunoaga a le alii peresetene na tu’uina atu i le taimi na talanoaina ai e le Senate la latou pili tupe lea na faaulu i le taeao ananafi, e faasoasoa atu ai le aofai e $3 miliona e fesoasoani ai i galuega faatino a le falemai o le LBJ i Fagaalu, ina ua taua e le alii Senatoa ia Velega Savali Jr sona popolega o loo i ai, i le ono ‘veto’ lea e le kovana o le pili pe afai e le mae’a ona sailiili i ai le maota.

“Ou te le popole tele i le tulaga lena o le ‘veto’ e le kovana o le tatou pili, pau le itu taua ia te a’u, ia fai se galuega a le Fono ina ia fesoasoani ai i le faafitauli o loo tulai mai i le falema’i,” o le saunoaga manino lea a le alii peresetene o le Senate.

“O a uma pili e fuafua le fono e faaulu ina ia maua ai se fesoasoani mo le falema’i, o lo’u taofi, ia fai la tatou vaega o le saili o se fofo o le faafitauli, a avatu foi ae teena mai e le alii kovana, o lana lena matafaioi, ae o le mea sili ua fai la tatou vaega,” o le isi lea saunoaga a Gaoteote e faaopoopo atu ai i lana ulua’i saunoaga.

O le taeao ananafi na faitau muamua i luma o le Senate le pili e faasoasoa atu ai le $3 miliona e fesoasoani ai i galuega faatino a le falemai, lea o loo fuafua e faatupe mai i le Teugatupe mo Taui a Tagata Faigaluega.

Na fa’amanino e Gaoteote e faapea, o le pili tupe lea ua fa’aulu e le Senate, e le tau manaomia ai se lafoga fa’aopoopo, ae o se tupe e ave’ese mai i se teugatupe o lo o i ai ni tupe, ma tuu sa’o atu loa mo le falemai.

Ae na saunoa Velega, na pau lona popolega o lo o i ai, ina ne’i pasia atu e le Fono lenei pili tupe ae te’ena e le alii kovana, ma ia fautuaina ai loa le maota, pe le talafeagai le ‘a’ami o le Komisi Faafoe o le Teugatupe mo Taui a Tagata Faigaluega, se’i fesiligia i so latou manatu e tusa ai o lenei pili tupe.

Fai mai Velega, afai e le fesiligia e le maota le Komisi ae ese se fautuaga a le komisi e ave i le alii kovana, o le isi lena mafua’aga e mautinoa ai lava le te’ena e Togiola o le pili tupe lea.

Ae na saunoa Gaoteote, o lea ua fa’ailoa mai e le kovana sana faaiuga e ala i sana tusi na tuuina mai i le fono, e faailoa mai ai lona manatu i fuafuaga a le fono, ma o ia tulaga uma e le taofia ai galuega faatino a le fono.

E i ai isi pili tupe ua fuafua le Senate e faaulu ina ia fesoasoani ai i sailiga o loo faia mo se fofo o le faafitauli o loo tulai mai i le falemai i le taimi nei.

I le faatomuga o lenei tulafono o loo taua ai, o se mea tatau le ave o le faamuamua i le tausia lelei o le soifua maloloina o tagata Amerika Samoa, ae o le faafitauli ua tulai mai i le taimi nei, ua feagai le falemai ma faafitauli matuia i le itu tau tupe, ma ua manaomia ai ni tupe e faatino ai lana tautua.

I se ripoti mai le Su’etusi a le malo o loo taua ai e faapea, o loo lava le paleni i totonu o le Teugatupe mo Taui o Tagata Faigaluega, ina ua maea ona totogi atu ni vaega tupe mo ni tagi sa faaulu i le tausaga na tea nei.

Saunoa Gaoteote, o le masina o Aperila 2011 na gata ai le totogiina atu o tupe mo tagi sa faaulu, ae o loo manino i ripoti le totogiina pea e le malo i totonu o lea teugatupe o le ta’i $100,000 i le masina, ma, talu mai le masina o Aperila e oo mai i le taimi nei, e le’i toe i ai nisi tagi sa faaulu.