Ads by Google Ads by Google

GAOI TUPE O INISIUA A TAGATA

Ua i luma o le faamasinoga faaitumalo le mataupu faasaga i se tamaitai sa galue i le kamupani Inisiua a le South Seas Financial Services Insurance, lea ua tuuaia i lona faaaoga faagaoi lea o tupe sa totogi atu e ni tamaitai se toalua mo le Inisiua (life insurance) a o la matua.

I faamaumauga a le faamasinoga o loo taua ai e faapea, o tamaitai e toalua o loo tagi i lenei mataupu, o le la uso le ua molia, o ia lea o Katerina Siliga, o ia foi lea sa totogi i ai tupe mo Inisiua a latou matua o loo nonofo i Savai’i i le taimi nei, peitai e leai ma se tupe na oo i le Ofisa Inisiua, ae na faaaoga uma e le ua molia.

Fai mai faamaumauga a le faamasinoga, o le masina o Novema o le tausaga na tea nei na tulai mai ai lenei mataupu, peitai o le masina o Aokuso na te’a nei na toe fesiligia ai e leoleo faamatalaga uma e uiga i lenei mataupu.

I le masina o Novema 2011, na agai atu ai ni tamaitai se toalua i le ofisa o le South Seas Financial Services Insurance mo le fia faia o se life insurance a la matua o loo i Savaii, ma mafua ai loa ona malaga se sui o le Ofisa Inisiua i Savaii e pu’e mai ata o le olomatua ma le toeaina, ma faia faamaumauga uma e manaomia, ma tuuina atu ai loa pepa mo le maliliega ia Siliga, o ia lea o le a tauaveina le mataupu.

Na saini e tamaitai e toalua pepa uma mai le Ofisa Inisiua ma la totogiina ai loa le tupe amata e $240 i le aso 25 Novema 2011 i le ua molia ma le tuutuuga, o le a ia pikiina mai tupe uma e fia totogi mo le inisiua, ina ia taofia ai le la o mai mamao mai Aoa i le Ofisa mo le totogiina o tupe mo le inisiua.

E $120 sa totogi e le tamaitai o loo tagi i lenei mataupu i masina uma lava mo le inisiua a la matua, talu mai le masina o Novema 2011 seia oo mai ia Iulai o le tausaga nei. O nei tupe uma sa piki mai e le ua molia ma le talitonuga, o loo totogi agai i le kamupani Inisiua.

Ae i le masina o Aokuso o le tausaga nei, na faalogo ai tamaitai nei e toalua i se tala, fai mai e ono loka le ua molia i le falepuipui ona o mataupu i inisiua a tagata, o lea na ia telefoni ai loa i le ofisa o le Inisiua ma fesili i ai mo le inisiua a ona matua, peitai na faailoa atu i ai e se sui o le ofisa, e leai se feagaiga o se inisiua (insurance policy) a ona matua o i ai.

Na taua e molimau i leoleo ina ua fesiligia i laua, o aso 15 o masina uma lava la te totogiina ai le tai $104 mo inisiua a la matua i le ua molia, peitai a la fesiligia le ua molia i risiti o tupe ua maea ona totogi atu, ae sau lana tali e uma avatu risiti ia te i laua.

Na fesiligia foi e leoleo le sui o le Ofisa Inisiua e uiga i lea mataupu, ma faamaonia mai ai e le sui o le Ofisa e leai se maliliega o i ai i a latou faamaumauga, i lalo o igoa o matua a i laua o loo aafia i lenei mataupu.

Ina ua fesiligia e leoleo le ua molia e uiga i lenei mataupu, sa ia ioeina ai lona faaaogaina o tupe, ma ua sauni foi e toe totogi atu tupe sa ia faaaogaina.