Ads by Google Ads by Google

GAOI ‘CREDIT CARD’ TOTOGI AI PASESE O LE VA’ALELE

Ua tuuaia nei e le malo le tamaitai o Chellette Foster Metuli i lona faaaoga faagaoi lea o se ‘credit card’ a se isi tamaitai, e totogi ai pasese a ana uo i le kamupani vaalele a le Hawaiian Airlines.

O tuuaiga ua faia faasaga ia Metuli na alia’e mai ina ua ia maitauina i lana teugatupe i le Faletupe a Hawaii, ni gaioiga se lua sa faia e aveese mai ai se vaega tupe mai totonu, ma mafua ai loa ona ia faila sana tagi i le Ofisa o Leoleo i Tafuna, ma tofia ai loa le alii leoleo suesue ia Det. Vaina Vaofanua e suesueina lenei mataupu.

I faamaumauga a le faamasinoga o loo taua ai e faapea, o le aso 28 Aokuso na maitauina ai e Helen Mi Sook Save le tulaga faaletonu i lana teugatupe, ma ia fesiligia ai loa le Faletupe a Hawaii mo se faamalamalamaga, ae na faailoa i ai e le Faletupe e faapea, o gaioiga e lua e pei ona taua, sa faia e totogi ai pasese a Jazmine Ape ma Paulo Akeni i le vaalele, mo le aofai e $876.70 i le ticket e tasi, tusa lea e $1,753.40 na faaaluina ai.

O le le mautonu o Helen i le mea ua tupu i lana teugatupe na ia faamatala ai loa i se tasi o lana aufaigaluega le mea ua tupu, ae faailoa i ai e le tagata lea ia Helen lona vaaia o Jazmine o alu atu i le isi aso i le latou ofisa ma fesili mo Metuli.

O le masalosalo o Helen ia Metuli na mafua ai loa ona ia fesiligia o ia e uiga i lenei mataupu, ma tautino ai loa le ua molia le mea sa tupu.

I faamaumauga a le faamasinoga, o loo taua ai e Metui ia Helen e faapea, sa i ai le aso na alu atu ai sana uo ma avatu ia te ia le $1,500 e totogi ai pasese mo le vaalele, ona ia teuina lea o le tupe i totonu o lana ato sa i luga o lana kesi ae alu ese ma le ofisa, peitai ina ua toe fo’i atu i le ofisa, ua leai se tupe sa i totonu o lana ato.

Na taua e le ua molia e faapea, e lei talanoa lava i se isi o le latou aufaigaluega e uiga i le mea ua tupu, ona sa i ai lona manatu atonu sa ia teuina le tupe i se isi mea ae ua galo ia te ia, ae ina ua tuana’i aso e lua ma ua le maua lava le tupe, sa oso ai loa lona popole, ma alu atu ai loa ua aumai le credit card a Helen sa i totonu o lana ato na taatia i luga o lana kesi, ma aumai ai faamaumauga uma sa i ai ma faaaoga ai loa e totogi ai pasese mo le vaalele a lana uo.

E fa moliaga mamafa ua tuuaia ai Metuli. O ia moliaga e fa e aofia ai moliaga e lua o le gaoi, atoa ai ma moliaga e lua o lona faaaoga faasolitulafono lea o se credit card a se isi tagata.

O lo o i tua Metuli ina ua ia totogi le $8,500 na faatulaga e le faamasinoga i lalo o poloaiga e ao ona ia usita’i i ai.