E tasi le mafuaaga ua ala ai ona faavae le Asosi a le au fai Vaa Alia i le teritori, o le taumafai lea e tutu faatasi e lagolago lea atina’e, ma fesoasoani ia ausia ta’iala fou ua faatulaga mai e le vaega o le US Coast Guard, e pei ona sa faamanino mai e se sui o le Asosi, o Mapu Ieti, i le Samoa News.

O le afioga i le alii faipule mai Pago Pago ia  Vaamua Henry Sesepasara ua filifilia e avea ma peresetene o le Asosi.

E le’i maua Vaamua mo sona finagalo e uiga i tulafono fou a le Coast Gaurd lea ua faamamaluina nei, peitai na taua e se sui o le Asosi e lei finagalo e faalauiloa lona suafa, o le taua o le tutu faatasi o se Asosi, o le a mafai ai ona faaleo o latou manatu faatatau i tulafono fou a le malo tele.

“O le tele o mea ia e mananao mai e le Coast Guard matou te faia, e le gata e taugata ae le maua uma foi i le atunuu, o fea la o le a matou o e saili mai ai nei mea,” o le molimau lea a se sui o le Asosi.

O se tasi o itu o lo o atugalu i ai nisi o le aufai vaa alia, o le vaiaso nei lea na faamuta ai le taimi na tuuina mai e le Coast Guard e usitaia ai a latou suiga fou, e pei o le “Coast Guard Authorization Act of 2010”, lea e manaomia ai le atoatoa uma o vaega mo le saogalemu i soo se taimi o fagotaga, e pei o fagu tinei mu (fire extinguishers), o ofu faaola (life jackets) ma ia i ai foi se vaa fa’aola (rafts) e fesoasoani i le aufai faiva i soo se taimi e tutupu ai ni faalavelave i luga o le sami.

I le molimau a Telea Amituana’i, o se alii fai faiva mai Tafuna e faapea, e ui e aoga suiga ua faalauiloa e le malo tele, peitai e ao foi ona vaavaai i le malolosi o lo o i ai pisinisi a tagata fai faiva i le teritori, pe a faatusatusa i vaa fagota tetele.

“Ua masani lava tatou i Samoa i nai vaa alia nei e maua ai ni tupe e fesoasoani i o tatou aiga, e le pei o vaa fagota tetele ia ua vaaia i le taulaga, o lo o toatele tagata fagogota o loo galulue ai i luga, e silia foi i le ta 2 masina o malaga fagota,” o le saunoaga lea a Amituana’i.

O le faasea a lea alii e faapea, e oo mai lava i le taimi nei e lei maua lava ni fesoasoani mo nisi o le aufai faiva na faaleagaina a latou vaa i le taimi o le galulolo ia Setema 2009, o le toatele foi o i latou sa faaalu lava a latou tupe e toe faaleleia ai a latou vaa ona o le naunau, pau lea o le auala o loo maua ai tupe e tausi ai o latou aiga.