O lo ua faia nei se a’oa’oga fa’apitoa, e mafai ai ona va’ai toto’a e le mamalu lautele fa’apea Inisinia fa’apitoa ma Matuaofaiva o le atunu’u, ituaiga fausaga e mafai ona fausia ai maota ma laoa o le atunu’u lautele ma le malo fo’i, ina ia fa’aititia le so’ona fa’aaoga o le Eletise.

“Ia iloa lelei, e ala e mafai ona fa’asaoina ai le Enetia po’o le Eletise fo’i o fa’aaoga e lou aiga, matagaluega ma lau pisinisi! E ao ina e tima’ia oe, i nei ala faigofie lava, ae mafai ona sefe ai lau tupe fa’aalu i pili o le eletise ma le suavai taumafa fo’i.” O se saunoaga fa’apitoa lea a le sui o le Ofisa o le Enetia e tusa ai o le latou masina o galuega uma lava o lo’o tima’i ai le lautele ina ia fa’aititia le so’ona fa’aalu o le Enetia.

Ua mae’a nei la a’oa’oga mo aso e lua, sa fa’alauiloa mai ai i le lautele, ua mae’a tapena e le Kamupani a le Pacific North West National Laboratory, le latou galuega na fa’atulaga mo le totogi e $260,000. ina ia latou tapena ai se seti o tulafono e aiaia ai fausaga o fale o aiga i Amerika Samoa, ina ia le so’ona fa’aalu ai le enetia. E lua aso sa fa’atulaga ai lea fonotaga fa’ale-a’oa’oga e sui e to’alua na malaga mai, Ruth Taylor ma lana soa o Pam Cole, le Project Manager & Building Energy Scientist.

Ina ua mae’a lea galuega tele sa feagai ma le to’alua lea i le silia ma le tausaga o la’ua galulue ai, sa la’ua fa’ailoa ai, “O mea uma tau le fausaga sa’o o le fale, e matua fa’asaoina ai lava le tele o le tupe fa’aalu i le so’ona fa’aalu vale o le eletise, ae tatau ona fa’asaoina na tupe ua so’ona totogi ai fo’i pili uila ma le suavai fo’i.”

Ina ua mae’a lenei galuega, ua i ai nei le tu’ufa’atasiga o aiaiga mo le fausia o fale e le ‘ai eletise, pe so’ona vevela fo’i, ma ua saunia lelei mo le siakiga a le Kovana ma sainia loa ina ia fa’aaogaina mo fausaga o fale i le tatou atunu’u. E ao ina pasia mai e le Kovana ona fa’ato’a fa’aaoga lea.

Mai le amataga o lenei tausaga, sa i ai polokalama sa fa’ataoto mai ina ia mafai ona fa’ataunu’u mo lenei tausaga atoa e fa’aaogaina ai tupe sa toina mai le USTEO i galuega e fa’ataugofie ai le eletise mo tagata uma o le atunu’u, pe o le fa’asaoina lea o le tele o le eletise ma le enetia o lo’o maumau ona fa’atauga i totonu o lotoifale o aiga, matagaluega ma pisinisi.

O le ‘auga o le taumafaiga a le ASTEO ia fa’aitiitia le Enetia e fa’aalu, ma ia le toe afaina tele ai le atunu’u ma aiga uma o i ai, pe a o’o ina fa’aititia mai suau’u maua mo le sapalai atoa o lo’o fa’aaogaina e i tatou.

O nisi ala fou e sapalaia ai le eletise mo le atunu’u, o isi na autu o galuega a le ASTEO. Lea ua o’o mai i le masina e fa’ataua ai a latou galuega tima’i, fa’asao ma le fa’ailoa atu i tagata ala e mafai ai ona ausia lea manulauti, ae ua fiafia le matagaluega lea e fa’ailoa mai, ua tele ina mae’a uma galuega nei.

O le aofaiga o fale e 56 sa fa’atulaga e ao ina suesue ma sailia ala o fa’atauga ai le eletise i nei fausaga o maota, ia mataituina ala o fa’amaumau ai, ma ia taumafai loa e fa’asa’o, ua mae’a ona faia galuega mo le tele o nei fale o le Malo.

Ua fa’aaogaina fo’i e le Matagaluega o Enetia a le tatou Malo aiaiga lelei ua fa’atulaga e le Pacific Northwest National Laboratory ina ia toe fa’aleleia ai fausaga o nei maota o le Malo, ae o nisi o lo’o fa’atautaia pea lava! O le aofaiga o le tupe na fa’atulaga mai mo le toe fausia lelei o nei fa’aletonu i fale nei e 50+ e silia ma le $5.01miliona ma ua toeititi lava mae’a atoa nei fale uma.