Ads by Google Ads by Google

FUFUSU LE AULOTU TOTONU FALESA MAFUA I TUPE

Na matua fiu tagata o le isi aulotu i le itu i Sasa’e o le atunuu e pupulu fusuaga a tamaloloa ma fafine i le aso Sa na te’a nei, ae ua atili ai ona le maua se tonu, e fai o le o o lima o tamaloloa i a latou fusuaga, ae o gutu fo’i o le itupa vaivai e le maua e se isi.

 

Fai mai le molimau, na mafua ona fufusu le aulotu e mafua mai i tupe, ma o le fusuaga a tamaloloa sa faia i totonu o le falesa na aofia atu ai ma le teutupe a le aulotu.

 

Na taua e le molimau e faapea, avau atu fusuaga a tamaloloa i totonu o le falesa ae pulu mai fo’i futifutigaulu a fafine i fafo, ao isi ua na o le tutu ma matamata i le mata’utia o nei faiga o lo o fai i totonu o le malumalu.

 

Fai mai le molimau, o lo o taumafai lava le aulotu e teuteu le vevesi na tula’i mai, ma o lo o faamoemoe e tatau ona mautu lelei tulaga o tupe a le aulotu, ina ia aua ai ne’i toe tulai mai se isi vevesi faapea i le lumana’i.

 

E pulu fusuaga a le aulotu lea i le itu i Sasa’e o le atunuu, ae o le taimi fo’i lea o lo o tau faato’a filemu ai e le faifeau ma lona faletua i se tasi o aulotu i le itu i Sisifo o le atunuu, se vevesi na tula’i mai i le aso Sa na te’a nei i lana ekalesia, e mafua mai ina ua fiu e tulituli le teutupe a le aulotu mo le faamalamalamaina o tupe o le malaga a le ekalesia sa alu i Hawaii i le masina o Novema na te’a nei.

 

Fai mai le molimau i le Samoa News, ina ua amata ona tuufesili tagata o le aulotu e faatatau i tupe o le malaga i le aso Sa muamua o Ianuari na te’a nei, na te’i ai lava ua le toe lotu le teutupe i le aso Sa na sosoo ai, ma faasolo atu ai lava seia oo mai i le aso Sa muamua o Fepuari e le’i toe oo atu lava le teutupe i se lotu.

 

Ae o le aso Sa na te’a nei ina ua toe lotu atu le teutupe, sa fesiligia ai loa o ia e se tasi o tiakono matua e faatatau i le ripoti o le malaga i Hawaii poo fea ua fai i ai.

 

Fai mai le molimau, e le’i tali lelei le teutupe i le fesili fia malamalama a si tiakono toeaina lea, ae sa faaali i ai lona fia ‘kama’, ma te’i ai loa le fia ‘kama’ o le teutupe ina ua pulupululima i ai toeaiina e toalua o le aulotu e fasi faamo’amo’a.

 

“Aga le fao ai i luga le falekua o le faifeau ga muamua aku i ai, semagu e ke’i Kapilielu ua ku faafuase’i si keukupe i faiga a le au faaulusigasiga ia e ko’alua,” o le tala ata lea a le molimau.

 

O le mea e malie ai i le tala a le molimau, e le gata na manu’a tigaina foliga o si teutupe i faiga a le au alii ia na fasia o ia, ae na atili ai ona tigaina ina ua toe faapau atu i ai ma le faletua i ona luga, ona uma ai loa lea o le ee mai o si teutupe i le fia ola, ae ua vaaia le oona ua mole.

 

O le itu e laki ai, na avea le faapau o le faletua i luga o si teutupe ma itu na sefe mai ai o ia mai isi osofaiga malolosi a le au ulu sinasina e toalua ia na fuafua o le a toe osofa’i ai o ia.

 

Ua maea nei ona toe teuteu le mumugaveve a le aulotu ma le latou teutupe, ma ua maea foi ona faamanino tala o le tupe sa nenefu ai le aulotu.