Ads by Google Ads by Google

Fuatuaina Faleosina e faamuamua totogi o tagata ma le faaleleia auala

Na ogatotonu finagalo o senatoa ma faipule ina ua latou fesiligia le Paketi a le Matagaluega o Galuega Lautele a le malo i le aso ananafi, i le fautuaina lea o le Faatonusili ina ia ave lana faamuamua i le faaleleia o totogi o tagata faigaluega ua tele tausaga o tautua i le matagaluega, ma faaaoga tatau tupe e faaleleia ai auala ae le o le ave e faatau mai ai nei mau masini tetele e le mafai ona fa’aaoga e faatutumu ai omoomo o le auala.

 

I totonu o le paketi a le matagaluega e $5.1miliona ua faaagaga mo le tausaga tupe fou 2014, o lo o faaagaga ai le lata i le $300,000 e faatau ai ni masini sua auala se lua (Backbhoe) e fesoasoani i le faaleleia o auala i le atunuu, ma o lea fuafuaga na tete’e i ai le afioga i le alii senatoa ia LeAtualevao Asifoa ina ua maua lona avanoa e fesiligia ai le faatonu e tusa ai o lana paketi.

 

Na taua e LeAtualevao e faapea, o masini Backhoe e lua o lo o fuafua le matagaluega e faatau, e mafai ona faaaoga mo le isi sefulu tausaga o lumana’i, ae o omoomo o auala e manaomia ona faaleleia i le taimi nei lava, e le mafai fo’i ona faaaoga masini Backhoe ia e tanu ai omoomo o le auala.

 

“E sili ai pe a aumai le tupe atoa lea e faalelei ai auala ma sii ai totogi o nai tama o lo o galulue i le fonofono ina o le auala, nai lo le faaaoga e faatau mai ai nei masini e le o manaomia i le taimi nei,” o le saunoaga lea a le alii senatoa ia LeAtualevao.

 

Ae na taua e le tamaitai faipule ia Vui Florence Vaili Saulo e faapea, e le malamalama lona sui pe faapefea ona taumafai le matagaluega e faalelei auala ae o lea lava e tele auala e le o lelei i totonu o le atunuu.

 

Na faailoa e le sui fofoga fetalai ia Iaulualo Talia Faafetai e faapea, o le faaletonu o lo o tulai mai i auala i le atunuu, e le gata e alu ai tupe a le malo ae faapena foi i tagata taitoatasi, o ni isi foi o taimi, e na o le avatu lava o le asuemu e tanu ai omoomo ae tasi lava le toulu o timuga toe leaga uma auala.

 

I auala i Manu’a, na talosagaina ai e le alii senatoa ia Nuanuaolefeagaiga S. Nua le tamaitai faatonusili, ina ia silasila toto’a i le auala o lo o fesootai ai Ta’u ma Fitiuta, e le gata ua amata ona ta’eta’ei isi vaega o le auala ae manaomia fo’i le toe faaleleia.

 

Na taua e Faleosina e faapea, e ui na te lagolagoina finagalo faasea o le komiti i tulaga faaletonu o lo o i ai auala, ae i lona talitonuga, e le taitai lava le tupe o lo o faaagaga i totonu o le paketi e faaleleia ai auala i totonu o le atunuu, ae afai o le finagalo lea o le komiti, manaia ae faaopoopo i ai e 3 miliona mai le tupe o lo o i ai ina ia faa faigofie ai ona faamanino finagalo o le komiti ma le atunuu.

 

I tulaga o totogi o tagata faigaluega, na fesiligia ai e le alii faipule ia Larry Sanitoa le tamaitai faatonu, i le mafuaaga ua maualuga ai le totogi o le tagata lea ua faa faigaluega faakonekarate mo le Ofisa i Manu’a, ae o lo o tumau pea i lalo o totogi o tagata ua leva ona galulue i Manu’a.

 

Mai avanoa faigaluega e ono ua faaopoopo i le Ofisa i Manu’a a le matagaluega o galuega, o lo o faatulaga mai ai i le va o le $32,000 ma le $40,000 totogi o i latou nei o lo o galulue konekarate, ae o tagata faigaluega tumau ua silia i le ta’i 20 tausaga o galulue ai e le atoa se ta’i $20,000 o latou totogi i le tausaga.

 

E o o foi i nai tagata faigaluega o lo o galulue mo le faaleleia o auala, o le toatele o i latou o lo o totogi i totogi pito maualalo, lea e ta’i $9,000 ma ona tupu o latou totogi e maua i le tausaga.

 

Na taua e Sanitoa e faapea, o lona faanoanoaga i le tulaga o totogi o tagata faigaluega, o tagata o lo o pito maualalo a latou totogi, o i latou ia o lo o faia galuega pito sili ona mamafa, ma e tatau ona toe silasila toto’a i ai le faatonusili ina ia sii totogi o i latou nei.

 

Na fautuaina e le alii faipule ia Maugaoalii Leapai Tusina Anoai le tamaitai faatonu, ina ia silasila i totogi o ana ‘Inspectors’ ina ia toe faaopoopo i luga, ona o isi nei tagata e pito sili ona tigaina a latou galuega o lo o faia mo le matagaluega.

 

Na faailoa e Faleosina e faapea, o le finagalo foi lea o le alii kovana, ia sii totogi o tagata faigaluega ina ia gafatia le tulaga ua i ai le tau o le soifuaga i le taimi nei.