O le vaiaso na tea nei na faaulu ai e le Senate se pili e toe faaauau ai le lafoga 2% mai totogi o tagata faigaluega i totonu o le teritori, e fesoasoani atu ai i le tulaga pagatia tau tupe o loo feagai ma le falemai i le taimi nei.

E pei ona silafia e le atunuu, o le isi lea pili tupe na tuuina atu e le Kovana i le Fono i le tausaga na tea nei, e faatulai ai le lafoga e 4% mai totogi o tagata faigaluega uma lava i le atunuu, e fesoasoani ai i le tulaga  pagatia sa feagai ma le malo i le itu tau tupe, peitai na sui e le Fono i le 2%, e pei ona faamamaluina ai i le tausaga atoa na tea nei.

Ua taoto atu nei i le komiti o le Tupe Faasoasoa a le Senate lenei pili tupe, ma ua faamoemoe o le taeao o le aso Tofi o le vaiaso nei o le a iloiloina ai e le komiti lenei tulafono taufaaofi.

O le agaga o le pili e pei ona saunoa le alii peresetene o le Senate ia Gaoteote Palaie Tofau, o le lafoga e 2% lea sa totogi atu e tagata faigaluega uma i le malo i le tausaga na tea nei, ua manatu le Senate e tatau ona totogi agai atu i le falemai o le LBJ mo le tausaga lenei, ina ia fesoasoani ai i le tulaga pagatia o loo feagai ma le falemai.

Ua fuafua e faamuta le totogiina atu o lenei lafoga i le tausaga faalafoga lenei 2012, ma ua i ai le faamoemoe afai ae pasia e le Fono ma sainia e le kovana lenei tulafono, o le a aloaia loa i totonu o le 30 aso mai le aso na sainia ai e le alii kovana.

O le taimi nei, ua toe foi i le 4% le aofai o le lafoga o loo totogi atu e tagata faigaluega uma i le malo i le taimi nei, ae afai ae pasia le pili tupe lenei, o lona uiga o le a toe totogi e le tagata faigaluega e toatasi le 6% mai lana lafoga tipi.

O le aso 1 Ianuari 2011 e oo mai i le aso 1 Ianuari 2012 na aloaia ai le lafoga e 2% i le tausaga na tea nei, ae ina ua aloaia e le malo le tulafono lea i le masina o Mati na tea nei, sa lei tipia mai ai le lafoga e  2% sa tatau ona totogi e tagata faigaluega mai masina muamua o le tausaga, ae ua i ai le faamoemoe faatoa tipi mai lea tupe pe afai ae maua siaki o lafoga toe faafoi a tagata faigaluega uma a le malo.

Na taua e Togiola Tulafono i luma o le Fono ina ua saunoa i le tatala aloaiaina o le Tauaofiaga lona 3 o le Nofoaiga lona 32 i le vaiaso na tea nei, e $1.6 miliona le tupe na maua mai e le malo mai le lafoga lenei,

Ae ina ua fesiligia e le komiti o Sailiga o Alamanuia a le maota o sui le pule o le Ofisa o Lafoga i le vaiaso na tea nei, pe fia se tupe na maua e le malo mai le lafoga lenei i le tausaga na tea nei, na taua ai e le susuga Melvin Joseph le aofaiga e silia ma le $2 miliona.

I se tusi na tuuina atu e le alii kovana i taitai o le fono i le aso ananafi, ua ia toe tuuina atu ai le lafoga e 4% mai totogi o tagata faigaluega uma lava i le teritori, lea sa suia e le fono i le tausaga na tea nei i le 2%, ina ia faatupe ai le polokalame a le falemai o le LBJ lea e auina atu ai gasegase i fafo mo togafitiga.

Na taua e Togiola, afai ae pasia le tulafono fou lea mo le lafoga e 4%, o lona uiga, o le a le toe totogiina e tagata faigaluega le lafoga e 4% e pei ona i ai i le taimi nei, ae o le a 8%.

Ua i ai le fuafuaga afai ae pasia lea tulafono e pei ona tuuina atu i le fono, o le a taualoa loa i le aso e  sainia ai e le alii kovana.

Na taua e Togiola i taitai o le fono e faapea, o le tupe lava e manaomia e le falemai e auina atu ai gasegase i fafo mo togafitiga, e tusa ma le $10 miliona, peitai ona o le tulaga manaomia tele o se tupe e faatino ai lenei auaunaga, ua ia talosagaina ai taitai o le fono ina ia vave faia sa latou faaiuga i lenei pili ina ia pasia ma aloaia loa.

O le vaiaso foi na tea nei na talanoaina ai i luma o le maota o sui se pili na faaulu i le tausaga na tea nei, e toe faaauau mai ai i le tausaga lenei le lafoga e 2% lea na pasia e le fono, ona o le manatu ia maua ai pea e le malo se vaega tupe faaopoopo e fesoasoani ai i ana gaioiga.