Ads by Google Ads by Google

Fuafua se tu’uga fautasi mo le vaiaso o le Mosooi

E ono toe faia se isi tuuga fautasi mo lenei tausaga i le faamanatuina o le vaiaso o le Mosooi, po o le vaiaso faapitoa mo le faatosinaina mai o tagata tafafao mai fafo i le atunuu, lea e faamanatuina i le masina o Novema o tausaga taitasi.

 

O le aofia ai o se isi tuuga fautasi i polokalama o le Mosooi o lenei tausaga, na taua ai e le alii kovana sili i le fono ma faatonusili i le vaiaso na te’a nei, “o se fuafuaga poto lea ma atamai e mafai ai ona faatosina mai turisi i totonu o Amerika Samoa.”

 

Na aofia le mataupu i le atina’eina o turisi i le atunuu i mataupu tetele o lo o agai atu le malo e faamanatuina i lenei tausaga, e pei ona talanoaina i le fono a le kovana ma ana faatonusili.

 

Na taua e le tofa Lolo Matalasi Moliga e faapea, o le atina’eina o turisi i le atunuu, e le o se galuega e faapitoa i le Matagaluega o Fefaatauaiga ma Alamanuia (DOC) a le malo, ae o le galuega e faapitoa mo tagata uma lava.

 

“O le faia o auala e faatosina mai ai turisi i le atunuu, o le tiute lena o tagata uma, e le faapitoa mo na o Keniseli (Keniseli Lafaele - Faatonusili SOC) ma lona Ofisa, ae o le galuega e mafai ona galulue faatasi uma i ai isi Ofisa o lo o aofia i le matata tau turisi e pei o le Ofisa o Faatoaga ma isi,” o le saunoaga lea a Lolo.

 

O ni isi o polokalama na taua e le alii kovana e tatau ona faia i le aso lea, o le faia lea o se Tauvaga mo le Aufai Faatoaga (Farm Fair), faia tuuga fautasi, pe vaavaai foi i le faia o ni faafiafiaga mai aufaipese e pei o auatalavou, ekalesia ma faalapotopotoga, ina ia faamatagofie atili ai polokalame o lea vaiaso.

 

Na faamaonia mai e le Faatonusili o Faatoaga ia Lealao M. Purcell e faapea, o le masina o Novema lea o lo o faatulaga e faia ai le Farm Fair a le aufaifaatoaga i le Talo Mua, e pei ona faalauiloa mai i le tausaga na tea nei ina ua maea le ulua’i tauvaga a le aufai faatoaga sa faia ai.

 

E pei ona masani i tausaga taitasi e faamanatuina ai le vaiaso o le Mosooi, e le gata i faafiafiaga e masani ona faatinoina e le Ofisa o Turisi, ae aofia ai foi ma le taamilosaga o lakapi taitoa 7 e taualuga ai polokalame o le vaiaso.

 

Na faamaonia mai e le Peresetene o le Iuni Lakapi a Amerika Samoa (ASRU) ia Aumoeualogo Te’o J. Fuavai e faapea, o lo o fuafua le Iuni mo le faataunuuina o le taitoa 7 a le Mosooi mo lenei tausaga e pei ona masani ai.

 

Na faafetaia e le alii kovana ni isi o suiga ma fuafuaga a le Ofisa o Turisi o lo o faia i le taimi e taunuu mai ai vaa meli i le taulaga o Fagatogo mo le momoliina mai o turisi, e le gata i le faalauiloaina o oloa taulima i luga o le uafu, o le faia o faafiafiaga faa Samoa, aemaise ai o le aufaigaluega o lo o latou faafeiloaia turisi i soo se taimi e taunuu mai ai.

 

Na faamatala e Lolo suiga lelei nei o ni auala e “faaosofia ai lagona o le tagata tafao mai fafo e toe fia asiasi mai foi ia Amerika Samoa i se isi taimi o i luma.”

 

“Afai tatou te manatu e saili se isi auala e maua mai ai isi alagatupe fou mo le tatou faigamalo, ia toaaga e atina’e turisi ma faia uma auala e faaleleia ai,” o le faamalosi lea a Lolo i ana faatonusili.

 

“E le o se galuega e faamoemoe e faia e le toatasi ae nofonofo le toatele, o le galuega e faia e tatou uma, aua o le isi lea alagatupe tele e mafai ona fesoasoani i le tamaoaiga o le tatou malo,” o le lu’i lea a le kovana i sui o le kapeneta.

 

O le atina’e o turisi i Samoa i le taimi nei, ua vaaia le ola ma ua tele le tamaoaiga ua maua mai ai e le malo o Samoa, e le gata i tupe mo le malo ae faapea foi i tupe mo aiga ona o galuega o lo o maua mai ai.

 

Fai mai Lolo, o le isi auala e moomia ona faaleleia o mataaga eseese i le atunuu, o isi na nofoaga e fiafia turisi e asiasi i ai.

 

Soo se taimi e taunuu mai ai vaa meli i le atunuu, e le gata e maua ai e le malo sina vaega tupe, ae o lo o faapena foi i pisinisi e pei o faleoloa, ave pasi ma ave taxi.