Ads by Google Ads by Google

FUAFUA SE ISI VAA FOU MO MANU’A

Ua atagia ni taumafaiga lelei, ina ia fa’afo’ia le pagatia o le mamalu i Ofu ma Olosega e fia o ane i Ta’u, ua tatau ai ona va’ai toto’a le malo ina ia sailia se isi va’a la’u pasese ma uta e mafai ona fealua’i i lea va.

Peita’i, ua fa’ailoa mai o lea va’a e i lalo o le fa’afoega a le Matagaluega o Galuega Lautele Public Works, aua e tele fo’i galuega ma e fia o’o i lea motu o le Manu’atele, ae ua fita atili feso’ota’iga tau femalaga’iga i lea va.

“O le va’a lea, ua na’o se aofaiga e 50 le pasese e mafai ona uta ai, ma e fa’amoemoe mo le fela’ua’iga o meafaigaluega a le Public Works, le latou aufaigaluega, ma nisi fo’i o le mamalu lautele, pe afai ua le toe feoa’i lava va’alele i le motu o Olosega, Sili ma Ofu.” O se fa’amatalaga lea a le susuga le Fa’atonu o Galuega, Punaofo Tilei.

“O lona uiga e le’i i ai se tau ua iloa patino, e le’i iloa fo’i po’o le a tonu le va’a ua mae’a pasia, ae ua aga’i i luma feutaga’iga ia mautu mai se Sa o le Matagaluega o Galuega Lautele, ina ia mafai ona vave fa’atino galuega i nei motu o le Manu’atele.”

E mautinoa, afai ae tino lea galuega, o le a mafai ona fa’aaoga fo’i e le matagaluega o le soifua maloloina lea tautua, aua e asia fo’i e i latou nei motu, o le a fa’aaogaina fo’i e le matagaluega o Feso’ota’iga ma le ASPA aua e i ai lava nai mea laiti e fia fa’aleleia vave e ni sui se to’alua pe to’atolu e malaga i Olosega ma Ofu, ae ona o le faigata o ala o feoa’iga, e fa’atuai ai lava ma tetele ai le afaina o nei galuega fa’atino, ae le’i vave faia lava!

Pe afai ae to’ai taunu’u i se tulaga lelei lea fanoga, o le a fa’ato’a fa’ailoa mai loa le ala o se fa’amanuiaga ua maua ai le tau o lea va’a, ae maise o le a mafai fo’i ona fa’ailoa mai uma isi tulaga o le fa’atauga mo le silafia a le mamalu o le atunu’u.